DEPORTES

DÚAS CITAS DEPORTIVAS E TEATRO PARA O PÚBLICO FAMILIAR, NA AXENDA DA FIN DE SEMANA DE CEDEIRA

O Concello de Cedeira contará hoxe sábado, ás oito da tarde no Auditorio Municipal, coa compañía Teatro del Andamio e a súa obra “A nova historia da cigarra e a formiga” dirixida ao público familiar. Outras dúas citas deportivas están tamén na axenda para a mesma xornada: a cuarta edición do Duatlón Escolar Xogade e o Día do Baloncesto, propostas que levarán á vila centos de deportistas e seguidores de toda a provincia.

Teatro del Andamio propón unha nova versión da clásica fábula. Desta volta, a formiga traballadora vive na saída de emerxencia do formigueiro e adícase a coidar das flores e inventar cantigas. A cigarra preguiceira chega a escena despois dunha viaxe de moito tempo na procura dun lugar para vivir en paz. As entradas, ao prezo de 2,5€, poderán mercarse media hora antes en taquilla.

Uns 200 nenos e nenas da provincia da Coruña, de entre 6 e 16 anos das categorías benxamín, alevín, infantil e cadete, participarán no Duatlón Escolar Xogade. A proba desenvolverase na contorna do paseo marítimo e San Isidro, cun percorrido de carreira e outro de diclismo. Por ese motivo, e tal como xa estivo informando a Policía Local, haberá restricións de aparcamento e de tráfico polos lugares polos que vai o percorrido.

Por outra banda, a Concentración Baby Basket reunirá no pavillón municipal a xogadores e xogadoras do CB As Pontes, Baxi Ferrol, Costa Ártabra, BBCA, Cedeira Baby Basket, Basket Narón e Basket School. Tras a xuntanza pola mañá, que se prolongará desde as 10.30 ás 11.30h, pola tarde están previstos dous partidos entre diferentes equipos do Cedeira Basket e o Baxi Ferrol. Ás 16.30 xogarán as categorías Premini e Mini, e ás 18.30h as de Infantil e Cadete. Entre os dous encontros actuará a Street Dance School.

O ARQUERO OLÍMPICO MIGUEL ALVARIÑO, INVITADO ESPECIAL DA XIX FESTA DO DEPORTE DE CEDEIRA

O deporte cedeirés volve celebrar este venres a súa festa, despois de tres anos de ausencia, nunha gala enfocada a recoñecer o esforzo de todos os clubes por superar o parón da pandemia e a súa capacidade para saír dela con azos para afrontar novos retos. O Polideportivo Municipal acollerá ás 20.30 horas a Festa do Deporte, que chega este ano á súa décimo novena edición e que contará como invitado especial co deportista olímpico Miguel Alvariño, campión de Europa de tiro con arco.

Tal e como explicou o concelleiro de Deportes, Jesús Romero Carracelas, esta é unha cita que o Concello organiza coa participación de todas as entidades deportivas. Nela recibirán o seu agasallo e recoñecemento os clubes locais de pádel, remo, natación (triatlón), fútbol, karate, bádminton e baloncesto, así como a asociación deportiva Apader, o Street Dance Cedeira e o Club Candieira. Cada un deles, á súa vez, poderá aproveitar a ocasión para destacar o traballo de ata tres deportistas ou entidades.

Ademais, na gala darase a coñecer o nome da persoa ou entidade deportiva máis destacada do último ano. Todos os clubes elixiron as tres nominacións desta edición, que foron para Damián Suárez, do Club Natación Cedeira; a S.D. Cedeira, que cumpliu o pasado ano medio século de historia, e Raquel Rodríguez, do Club de Remo. De entre eles sairá o premio, unha vez máis pola votación das propias entidades deportivas.

A teor do desenvolvemento de todas as galas celebradas ata o ano 2019, esta XIX Festa do Deporte de Cedeira será unha vez máis un evento con gran participación, na que veciños e veciñas da localidade asisten para aplaudir e arroupar aos seus deportistas. Será, de novo, unha ocasión para celebrar e destacar a rica tradición deportiva que existe na localidade así como para gabar os logros acadados en competicións de todos os niveis.

MATERIAL DEPORTIVO, CENTRO MUSICAL E PARQUE CANINO, ENTRE AS PROPOSTAS DOS ORZAMENTOS PARTICIPATIVOS

O alumnado de 3º de ESO do IES Punta Candieira ten listas xa catro propostas para os Orzamentos Participativos de Cedeira que serán sometidos a votación en asemblea o vindeiro día 26. A terceira edición deste proceso democrático, no que o Concello reserva 20.000€ das súas contas para investilos no que decidan os mozos e mozas do instituto, culminará o 5 de maio nun pleno extraordinario no que eles defenderán a súa proposta final e que servirá tamén para aprobar a constitución do Consello Local da Infancia e Adolescencia.

Un total de 47 alumnas e alumnos de 3º de Secundaria foron este ano os implicados no proceso de Orzamentos Participativos, que se desenvolve por terceiro ano consecutivo en Cedeira. Nos últimos meses recibiron formación sobre a elaboración de proxectos, diagnóstico do territorio e funcionamento da administración municipal e as súas competencias. Pasaron despois a elaborar propostas de gasto que, como xa sucedeu en anos anteriores, están moi centradas no eido do deporte e na programación de actividades culturais. A concelleira de Participación Cidadá e Xuventude, Carmela Prieto, destaca a excelente experiencia que supón este proceso “para os rapaces e rapazas, porque coñecen en primeira persoa os procedementos e condicionantes que ten o goberno local para sacar adiante calquera iniciativa, e tamén para os propios políticos, porque podemos escoitar directamente as demandas das novas xeracións”.

Finalmente, as propostas viables que serán elevadas á asemblea de votación do vindeiro mércores son as seguintes:

 CEDEIRA RESPIRA DEPORTE / ADQUISICIÓN DE EQUIPAMENTO DEPORTIVO PARA O XIMNASIO MUNICIPAL, por importe de 22.602,47€. Na proposta inclúense varios xogos de halteres, ketlebel ou pesas rusas, moble de baldas para gardar este material e 8 máquinas para o fortalecemento de diversos músculos e partes do corpo (dorsais, abductores, femorais, glúteos, deltoides, etc.)

 LUZ NO SKATE BOWL, consistente nun punto de iluminación para o paseo marítimo na zona do skate bowl (2 proxectores de luz instalados nunha columna) por importe de 4.694,05€.

 CENTRO MUSICAL, coa adquisición de equipamentos musicais e para poder gravar cancións, coa idea de formar grupos musicais ou bandas por importe de 5.000,00€

 PUPPY PARK ou construción dun parque canino na Rúa Ortigueira 16, con valado de madeira para peche e porta de dobre acceso, cartel indicativo en poste de madeira. Inclúe a instalación de varios módulos, como slalom, módulo de pasarela, de roda de detención e túnel para cans, ademais de papeleira. Esta iniciativa vai á asemblea por importe de 26.065,99€

Aínda que algunhas destas propostas exceden da cifra de 20.000€ reservada aos Orzamentos Participativos, o Concello de Cedeira decidiu incorporalas igualmente. Outras non chegaron a esta fase final por estar xa en proxecto ou mesmo en funcionamento e algunhas quedaron fóra por ser inviables técnica ou economicamente, como unha nota piscina municipal, a creación dun carril bici, unha boleira ou unha pista de karts.

A asemblea do vindeiro día 26 celebrarase no salón de actos do IES Punta Candieira. O alumnado elixirá a representación que vai levar diante do pleno da corporación municipal o resultado da súa votación, o vindeiro 5 de maio.