DEPORTES

O CONCELLO REPARTE 36.000€ EN AXUDAS ENTRE UNHA DUCIA DE ASOCIACIÓNS LOCAIS NO EIDO SOCIOCULTURAL

A Xunta de Goberno de Cedeira vén de aprobar a concesión das axudas para asociacións socioculturais do municipio, por un valor total de 36.000€. Como en anos anteriores, a convocatoria resolveuse polo sistema de concorrencia competitiva, segundo criterios obxectivos, e os fondos repártense entre o capítulo de actividades, dotado con 30.000€, e o de investimentos, cos 6.000€ restantes. Unha ducia de entidades obteñen subvención este ano e nove delas fano nas dúas categorías.

Segundo comentou o alcalde, Pablo Diego Moreda Gil, este ano o número de entidades que concurriron á convocatoria foi maior que o pasado, o que confirma a definitiva recuperación e volta á normalidade do tecido asociativo da localidade. O rexedor celebrou a vitalidade que teñen as asociacións locais e a súa variedade, que se pode comprobar na mesma resolución.

Así, as axudas para realización de actividades repartíronse entre as asociacións Acordeóns de Cedeira (3.056,31€), a Sociedade Artística Eixil (2.961,54€), as asociacións veciñais de San Román (2.748,31€), Cervo Tarroiba (2.250,77€) e San Xulián de Montoxo (1.563,23€), a asociación Patchwork (2.606,15€), a Asociación Mulleres da Vila de Cedeira (2.985,23€), Buxainas (2.914,51€), Aturuxeiras (2.394€), a Rondalla de Cedeira (2.795,69€), a asociación Discalzos polo Festival (2.724,62€) e a Asociación de Maiores (1.000€).

As axudas para investimentos, dotadas cun total de 6.000€, foron para a Asociación de Acordeóns (743,52€), Eixil (720,46€), as asociacións veciñais de San Román (668,59€), Cervo Tarroiba (547,55€ ) e San Xulián de Montoxo (587,90€), Mulleres da Vila (726,22€), Buxainas (708,93€), Aturuxeiras (634,01€) e Discalzos (662,82€).

O CONCELLO LICITA A SUBSTITUCIÓN DO PAVIMENTO DO POLIDEPORTIVO MUNICIPAL POR MÁIS DE 187.000€

O Concello de Cedeira acaba de publicar na Plataforma de Contratación do Sector Público o expediente de licitación para a substitución do pavimento do Polideportivo Municipal, un proxecto valorado en 187.201,41€ (IVE incluído), que se vai acometer a través do convenio suscrito o pasado 1 de xullo coa Deputación da Coruña. A administración provincial asume o 80% e a local o 20% dun investimento que o alcalde de Cedeira, Pablo Diego Moreda Gil, considera “importantísimo para ofrecer as mellores condicións á cancha de xogo, que ten un uso intensísimo e que sofre un alto grao de deterioro”.

O goberno local de Cedeira comezou traballar neste proxecto xa no ano 2018, cando encargou o primeiro informe técnico sobre a situación do pavimento do pavillón deportivo municipal. A actuación que se vai acometer abrangue a substitución do solo de madeira da pista de xogo, cunha superficie de 1.211,37 metros cadrados, e tamén o pavimento de linóleo que está nas zonas anexas, nunha superficie total de 165 metros cadrados. A cancha actual ten parquet cruzado deportivo de 25 mm, directamente colocado sobre o formigón e sen capa de impermeabilización. Hai madeiras levantadas e podres e están especialmente danadas aquelas situadas nas zonas de unión co linóleo, onde afectou máis a humidade.

As obras consistirán no levantamento do chan actual e a colocación dun novo pavimento de tablas de madeira laminada sobre rastreis especialmente deseñada para o uso deportivo. O novo solo irá asentado sobre un conxunto de tiras de goma, baixo os rastreis, destinado a evitar a deformación da superficie e a absorber os impactos. Nas zonas anexas á pista de xogo instalarase un pavimento sintético, pero desta volta cunha capa de impermeabilización por debaixo que garanta unha maior durabilidade. Xunto co chan, o proxecto tamén inclúe a substitución do actual marcador por un dixital que se adaptará a todos os deportes que se desenvolven neste espazo.

As empresas interesadas en presentar a súa oferta ao concurso poden facelo ata o vindeiro 17 de outubro. O concurso segue o procedemento aberto simplificado e o prazo de execución será de dez semanas.

Moreda Gil subliñou a importancia desta actuación e recordou que no que vai de ano o goberno local ten investido xa preto de 80.500€ en diferentes obras menores para a mellora e posta ao día de diferentes instalacións deportivas, aos que hai que sumar os 36.000€ en axudas a clubes da localidade. O alcalde agradeceu a colaboración da Deputación, esencial para que o Concello poida acometer unha actuación desta envergadura, e recordou que a administración provincial ten tamén en marcha os trámites para realizar un investimento de máis de 350.000€ na mellora do trazado da estrada DP-2206 na curva de Tide.

AS RUTAS QUE TRASLADAN AOS SEUS VISITANTES A MEMORIA DO LITORAL CEDEIRENSE

O proxecto Cedeira Mariñeira ten como finalidade principal valorizar o labor e a memoria pesqueira e marisqueira a través da creación de dúas rutas nas que se resalten as infraestruturas, enclaves e colectivos que protagonizan a actividade no mar. Así, na elaboración destas rutas tematizadas para promocionar o patrimonio mariñeiro material e inmaterial, leváronse a cabo labores de recollida de datos por varias vías.

Por unha parte, fíxose un estudo das zonas potenciais polas que poderían discorrer as rutas, para valorar o seu estado, a súa adaptabilidade e a viabilidade do percorrido. Deste xeito puidéronse marcar os tracks que compoñerán estes itinerarios que se poderán realizar tanto a pé como en BTT. Por outra parte, realizouse unha recollida de información a partir de entrevistas a algúns dos colectivos profesionais claves no territorio. Así púidose coñecer máis sobre a historia e os oficios que caracterizan o litoral e elaborar o relato que conformará as rutas.

Unha vez feita a documentación previa e traballado o territorio, realizouse o deseño das rutas e dos contidos informativos que as acompañarán. O resultado son dúas alternativas circulares nas que se traballan dúas partes moi importantes do municipio. Unha ruta urbana de baixa dificultade (duns 6km) na que se repasa a historia mariñeira da vila, pasada e presente, a través de puntos clave como o porto, a lonxa ou o casco histórico. Tamén, unha ruta litoral na que desprazarse polas panorámicas da contorna da serra da Capelada que reflicten outra gran parte dos oficios e a actividade no mar. Esta última presenta dúas versións, unha máis curta (algo máis de 7km) na que ir bordeando toda a serra e unha versión máis longa (9,5km), na que podes baixar ata o núcleo de Santo André de Teixido antes de volver ao punto inicial.

Ambas rutas contarán cun perfil en Wikiloc no que estarán dispoñibles os datos máis relevantes para a súa realización: lonxitude, duración aproximada do percorrido, nivel de dificultade, desniveis, altitude e información sobre os puntos máis relevantes que se visitarán, así como fotografías destes enclaves. Ademais, estes itinerarios subiranse á web de turismo municipal, na que se atoparán os enlaces ao perfil en Wikiloc, a información sobre os puntos que se visitan na ruta, audios en tres idiomas (galego, español e inglés) que farán máis accesibles os contidos e dúas videotestemuñas protagonizadas por dous dos colectivos profesionais do mar explicando os seus oficios. O proxecto denominado como “Definición, deseño e implementación de rutas tematizadas para a promoción do patrimonio mariñeiro do concello de Cedeira. CEDEIRA MARIÑEIRA” está impulsado polo Concello de Cedeira e conta co respaldo do GALP A Mariña-Ortegal e do Fondo Europeo Marítimo e de Pesca (FEMP).