CULTURA

O CONCELLO INVISTE MÁIS DE 61.000€ NO ARRANXO DAS FACHADAS E O TELLADO DA AMPLIACIÓN DA ESCOLA INFANTIL

Dous anos despois da ampliación da escola infantil municipal de Cedeira, o Concello vén de contratar obras, por valor de 61.353€, para a adecuación exterior do edificio que cedeu para dotar de novos espazos ao centro. Os traballos, tal como explicou o alcalde, Pablo Diego Moreda Gil, consisten na reparación e pintado das fachadas, así como no cambio dos ventanais, o arranxo do beirado do tellado, que mesmo presenta risco de caer, e a colocación de novos caleiros.

Tal como recordou o alcalde, Pablo Diego Moreda Gil, no ano 2019 o Concello de Cedeira colaborou co Consorcio Galego de Servizos de Igualdade e Benestar para facer posible a ampliación da escola “A galiña azul”. Daquela, a institución municipal puxo a disposición do organismo autonómico os locais necesarios, no edificio da súa titularidade contiguo á escola. As obras cinxíronse ao interior, cun presuposto de 141.000€ dos cales o Consorcio asumiu a maior parte, e permitiron incrementar o número de prazas das 58 anteriores ás 78 actuais.

Porén, quedaba pendente a adecuación do exterior do inmoble no que se executou a ampliación. Así, o Concello contratou recentemente o cambio dos seis ventanais do inmoble á empresa Proinor, por un presuposto de 11.736€ (IVE incluído). A esta obra, que aínda está por executar, súmanse agora outras intervencións necesarias. Está xa en marcha a limpeza, reparación e pintado e impermeabilización das fachadas, que realiza a empresa Agustín González Carro por un presuposto de 18.966€. Prieto Mouriz farase cargo do arranxo do beirado da cuberta, coa desmontaxe de parte das tellas e o formigonado das cornixas, por 24.891€, e Canalones Valdoviño renovará os caleiros por 2.347€.A todo isto súmase a instalación das estadas precisas para o desenvolvemento dos traballos, que fixo Alquileres F-3 por 3.412€.

O alcalde, Pablo Diego Moreda Gil, recordou que o goberno local está á espera de poder reunirse coa conselleira de Política Social, Fabiola García, para abordar a construción dun Centro de Día en Cedeira. O goberno local ten o proxecto de facelo realidade nunha parcela de titularidade municipal, próxima á antiga estación de autobuses. “É unha demanda moi necesaria, para Cedeira e tamén para outros municipios da zona, que temos que impulsar a través dun acordo de cofinanciación”, explicou Moreda.

A BANDA DE MÚSICA VILA DE CEDEIRA OFRECERÁ ESTE XOVES O TRADICIONAL CONCERTO VILA DE CEDEIRA

A Banda de Música Vila de Cedeira ofrecerá este xoves, ás 18.30 horas, o seu tradicional Concerto de Nadal no Auditorio Municipal, baixo a batuta do seu novo director Eduardo Mallén. A veterana formación cederá o escenario no transcurso da súa actuación aos alumnos e alumnas da Escola de Música da localidade, coa que mantén unha estreita relación e colaboración, para que toquen tamén diante do público.

A Banda de Música Vila de Cedeira é unha formación cunha traxectoria de 40 anos e de espíritu inquedo, que adoita ofrecer un repertorio non só formado por pezas habituais deste tipo de formación senón tamén por outras máis actuais encadradas en estilos como o pop ou o rock.

A entrada será libre ata completar o aforo e será obrigatorio amosar o certificado de vacunación.

CEDEIRA CELEBRARÁ O DÍA 26 DE DECEMBRO UNHA NOVA EDICIÓN DA CARREIRA LÚDICA DE SAN SILVESTRE

O Concello colabora un ano máis co Club Natación Cedeira na organización da carreira de San Silvestre, unha proba de carácter lúdico e festivo que adoita ter unha alta participación de persoas de todas as idades. A actividade está programada para o vindeiro 26 de decembro, domingo, ás 20.30 horas, e desde as 19.00 horas poderán recollerse os dorsais no punto de saída, o Pavillón Municipal.

A definición como “carrera/andaina” que aparece no cartel desta San Silvestre destaca o seu carácter aberto e non competitivo. De feito, non é precisa a inscrición e tampouco ten clasificación. A cita deportiva, na que cada quen corre ou camiña ao seu ritmo, celebrouse por primeira vez no ano 2013 e desde aquela mantívose todos os anos excepto o pasado, pola pandemia, cunha alta participación.

Como en anteriores edicións, haberá un percorrido curto, de 3.240 metros, e outro longo, de 5.255 metros. No primeiro, o trazado vai pola rúa dos Deportes, Salinas, Camiño Real da Madalena, Santo Isidro, Camiño Real da Madalena, praza 18 de Decembro e avenida de España ata a meta, que estará no Pavillón Municipal. As persoas que opten polo percorrido longo, seguirán, ao chegar á praza 18 de Decembro, pola rúas Rosalía de Castro e Ortigueira, o Camiño da Acea, rúa Gaias da Area, avenida da Area, praza de Galicia e volverán pola avenida de España ata o pavillón.