Skip to content Skip to left sidebar Skip to footer

Author: MonicaFdz

Novo aviso sobre subvencións municipais

NOVO AVISO SOBRE SUBVENCIÓNS MUNICIPAIS

As novidades das que se tivo coñecemento no Concello no día de onte con respecto á publicación das bases das subvencións de libre concorrencia, obrigan a volver a emitir un novo aviso sobre a xestión e os prazos de solicitude das subvencións municipais. A intención non é confundir senón todo o contrario, pero deben facerse as publicacións segundo se vai informando dos novos trámites. Aclarar que todas estas novidades á hora da publicación e entrada en vigor das bases das subvencións afectan a todos os Concellos por orde do Ministerio de Hacienda ás entidades locais.

Neste ano 2017, todas as subvencións de libre concorrencia municipais presentan una novidade importante, primeiro teñen que ser publicadas no BOP (Boletín Oficial da Provincia), e a continuación hai que publicar o anuncio do BOP na Base Nacional de Subvencións. Desta base aínda se teñen que volver a remitir ao BOP e nesta última publicación é cando entran en vigor.

Esta novidade que se impón este ano aos Concellos no tema de subvencións de libre concorrencia pode crear confusión por ser este o primeiro ano que ten carácter obrigatorio, pero calquera dúbida que se teña ao respecto pode consultarse no Concello, tanto na Secretaría, como na Intervención ou directamente á concelleira de Cultura e Turismo.

Sinalar que irase informando puntualmente e anunciarase cando realmente se abran os prazos para tramitar as solicitudes. Todas as asociación e entidades deportivas poden ir preparando xa os anexos e documentación que se vaia a presentar cando se abran os prazos. Por último, lembrar que todos os trámites teñen que facerse a través da sede electrónica.

Na seguinte ligazón pode consultarse a información e o estado das subvencións municipais:

IR Á LIGAZÓN Subvencións municipais

O Concello pecha a campaña de verán con datos que converten a Cedeira na referencia turística do Ortegal

O CONCELLO PECHA A CAMPAÑA DE VERÁN CON DATOS QUE CONVERTEN A CEDEIRA NA REFERENCIA TURÍSTICA DO ORTEGAL

O Concello de Cedeira estase a converter na referencia turística do Ortegal, como así o demostran os datos relativos a temporada estival que rematou hai tan só uns días. Tanto as consultas recibidas na oficina de turismo como os datos relativos á participación nas Xeorutas e o número de visitantes ao castelo da Concepción crecen con respecto aos do ano anterior. Así, o total de persoas que pasaron no verán pola oficina de información turística foi de 6.748 frente as 5.320 que o fixeron na temporada do 2016, o que representa un incremento de case 1.500 visitantes en só tres meses. Un ano máis agosto mantense como o mellor en canto a cifras. O número de consultas recibidas ese mes foi de 4.155, cando en 2016 apenas superaron as 3.100.

Estes bos resultados aínda son máis relevantes no caso do programa das xeorutas, cunha ocupación que rondou o 90% -chegou ao 100% na da Praias Negras e na do Granate-, e unha suba dun 3,1% das inscricións, o que representa no seu conxunto un incremento dun 4,2% respecto ao 2016. O número de participantes foi de 464 persoas -ruta dos Cantís 16,1% (74), Praias Negras 34,1% (158), Cromo 34,4% (159) e Granate 15,4% (73)-. En canto á procedencia dos viaxeiros produciuse un incremento na participacion local nun 8,3%, un descenso do 29,3% da xente de Galicia e unha notable suba dun 30,4% de persoas do resto de España. O número de extranxeiros tamén multiplicouse por 10 respecto ao ano 2016. Como no caso da oficina de turismo, agosto cun total de 216 participantes consolídase como o mes vacacional por excelencia, tamén no caso de Cedeira.

Tampouco queda atrás o castelo da Concepción con respecto a estes bos resultado da campaña estival. Neste caso, o número de visitantes deste verán foi de 4.349 persoas frente ás 1.805 rexistradas no 2016. Cabe apuntar que este ano a fortaleza tamén estivo aberta algúns días de xuño. O mes de agosto volve a destacar, tanto no que se refiere á afluencia de turistas -duplicouse o número de visitantes do mes de xullo (1.672)- como ao incremento das cifras con respecto ao agosto anterior -das 874 persoas de 2016 se chegou ás 2.327 contabilizadas este ano-.

O Concello informa, ao fío destes datos, de que neste mes de setembro mudou o horario de visitas ao castelo da Concepción, que tamén permañecerá aberto ao público durante todo este mes. Así, as persoas que desexen coñecelo poderán facelo de martes a sábado de 11.30 a 13.30 e de 18.00 a 20.00 horas e os domingos de 17.30 a 20.00 horas. O luns permanecerá pechado.

A Concelleira de Cultura e Turismo, María Xosé Rodríguez Pérez, recoñeceu estar moi satisfeita polos resultados obtidos e sinalou a presenza case constante de visitantes ao longo de todo o verán, un afluxo que, segundo a representante municipal, aínda continua durante estes primeiros días do mes de setembro. Rodríguez Pérez destacou o papel que vén desempeñando a oficina de turismo á hora de informar e atender aos visitantes e, neste sentido, comentou como anécdota que este ano houbo unha persoa que chegou a preguntar a que hora non había néboa na garita de Herbeira. A concelleira adiantou que cara ao próximo ano o Concello seguirá apostando por un turismo atractivo pero sostible, polo que desde o goberno local buscaranse novos recursos e manteranse en boas condicións as rutas de senderismo e os espazos naturais.

Cedeira pon en marcha o programa de envellecemento activo, que inclúe clases de zumba, memoria e ximnasia terapeútica

CEDEIRA PON EN MARCHA O PROGRAMA DE ENVELLECEMENTO ACTIVO, QUE INCLÚE CLASES DE ZUMBA, MEMORIA E XIMNASIA TERAPEÚTICA

O Concello de Cedeira, a través da Concellería de Xuventude, Ensino e Igualdade, pon en marcha un ano máis as actividades orientadas ao colectivo da Terceira Idade. De feito, esta mesma semana xa daban comezo as clases de zumba, que se imparten os luns, martes e xoves na sala Áncora, a partir das 11.00 horas.

Cara á segunda quincena do presente mes, a responsable da área Manuela López Rodríguez, informou da posta en funcionamento do obradoiro de memoria e mesmo tamén do de ximnasia terapeútica. Este ano, como xa se fixo o curso pasado, estas últimas actividades impartiranse na vila de Cedeira e tamén nas parroquias. Estes días as técnicas do departamento están a traballar na organización do calendario.

López Rodríguez recordou así mesmo que está abierto o prazo de inscrición para aquelas persoas que este ano desexan asistir por primeira vez ás clases, mentres que para as veteranas non é necesario dito trámite. En calqueira caso, as oficinas de Servizos Sociais serán a referencia tanto para facer as reservas de praza como para recibir información sobre o programa de envellecemento activo.