Skip to content Skip to left sidebar Skip to footer

SERVIZOS

Aviso de resintonización de canles

Pola realización de cambios nos centros de extensión de cobertura do sinal de TDT, os veciños e veciñas que nestas datas deixen de recibir algunhas canles nos seus televisores, deberán resintonizar os mesmos no seu aparato.
As parroquias que poden verse afectadas por estes cambios son: Régoa, Cervo, Esteiro e Cedeira.

This image requires alt text, but the alt text is currently blank. Either add alt text or mark the image as decorative.

Cedeira inviste máis de 53.000 euros en catro novas intervencións na rede viaria

O Concello de Cedeira investirá máis de 53.000 euros en mellorar a rede viaria municipal con asfaltados nun total de 2.605 metros de lonxitude nos camiños Piñeiro, O Campón, A Pasada e Os Edreiros.

As obras serán executadas pola empresa Excavaciones Saavedra y López SL, adxudicataria do proxecto, e principalmente consistirán na limpeza de gabias, en tratamentos semiprofundos e na aplicación dunha capa de macádam de quince centímetros nos tramos que se atopen en peor estado de conservación.

O camiño de Piñeiro, que ten unha lonxitude de 360 metros e un ancho de 3,5 metros, presenta na actualidade algunhas fochancas nun firme a base de macádam e rego asfáltico. A obra contratada dará homoxeneidade a toda a superficie coa aplicación de tratamentos semiprofundos e rego de selado. Unha actuación moi similar é a que se levará a cabo no camiño O Campón, que ten 630 metros de longo e conta cun ancho de tres metros.

Unha maior dificultade presenta a intervención que se executará no camiño da Pasada, cuxa lonxitude supera o quilómetro e, ademais, está dividida en dous tramos de 450 e 600 metros. Este último é de macádam con rego asfáltico, mentres que o inicial é de saburra. As actuacións que se executarán consistirán nas substitucións do macádam por tratamento semiprofundo, rego superficial e selado no tramo principal e a saburra por unha capa de 15 centímetros de macádam e os regos correspondentes no de 450 metros.

A lonxitude do camiño Os Edreiros supera os 560 metros e o seu estado actual require un tratamento a base de macádam para eliminar as fochancas que se concentran nun tramo de 100 metros.

As intervencións agora contratadas levaranse a cabo antes de que finalice o ano e financiaranse con cargo ao Fondos Feder, participados pola administración local e Xunta de Galicia.

O alcalde, Pablo Moreda Gil, destacou a intención do goberno de Cedeira de seguir invistindo, ao longo de todo o mandato, no arranxo de camiños públicos para garantir a seguridade viaria e mellorar a comunicación dentro do territorio. O rexedor quixo agrader, así mesmo, a colaboración que o executivo local vén atopando no movemento asociativo para programar e executar os proxectos que son máis urxentes. Moreda Gil tamén pediu desculpas por adiantado aos veciños e veciñas que poidan verse afectados por este conxunto de catro actuacións.

Novos pasos para materializar a mellora da estrada entre Valdoviño e Cedeira

NOVOS PASOS PARA MATERIALIZAR A MELLORA DA ESTRADA ENTRE VALDOVIÑO E CEDEIRA

A ansiada mellora da estrada entre Valdoviño e Cedeira (AC566), na que levan traballando a Xunta de Galicia e os concellos de Cedeira e Valdoviño durante os últimos catro anos, está hoxe máis próxima a se converter nunha realidade.

Os alcaldes Pablo Moreda e Alberto González mostraban a súa satisfacción pola publicación no Diario Oficial de Galicia do anuncio da Axencia Galega de Infraestruturas polo que se somete a exposición pública a primeira fase do proxecto construtivo, así como a relación individual de bens, dereitos e propietarios afectados polas obras.

O proxecto, coinciden Moreda e González, busca esencialmente mellorar a mobilidade, reforzar a seguridade viaria e reducir os tempos de percorrido entre os dous municipios, favorecendo así a súa conexión coas principais cidades galegas e facilitando a circulación aos veciños e veciñas das dúas localidades.

É un obxectivo no que os concellos de Cedeira e Valdoviño levan traballando catro anos cóbado con cóbado coa Administración Autonómica, a través de diversas reunións entre políticos e técnicos. Así, esta primeira fase da intervención contempla habilitar tres carrís practicamente en todo o tramo entre o Carballal –saída da parroquia de Valdoviño, á altura da estrada provincial que dá acceso ao CPI Atios- e A Ramalleira, en Pantín. En concreto, en tres treitos de 800 metros cada un que cubren case que a totalidade da vía entre os dous puntos. Habilitando ese terceiro carril, os dous rexidores están convencidos, e así o avalan os informes técnicos, de que a vía gañará en fluidez e mellorarase substancialmente a mobilidade.

O prazo de execución desta primeira intervención é de dez meses e a obra saerá a licitación no primeiro trimestre do próximo ano, tal e como apuntou onte a conselleira de Infraestrutura e Mobilidade, Ethel Vázquez, nunha comparecencia pública en Ferrol.

Ademais, concellos e Xunta xa traballan na redacción dunha segunda fase, que incorporará dúas importantes propostas trasladadas por Cedeira e Valdoviño. O proxecto apunta que se habilitará un terceiro carril na estrada ao seu paso pola parroquia de Esteiro para facilitar os adiantamentos e proponse así mesmo a mellora da intersección da estrada á altura do vial que dá acceso ao CPI Atios. Un cruce a renovar, tanto en condicións de visibilidade como de control de velocidade, e que rexistra unha alta densidade de tráfico.

(Imaxe: Diario de Ferrol)

Cedeira convoca unha xornada formativa para dar a coñecer o uso e posibilidades da sede electrónica

CEDEIRA CONVOCA UNHA XORNADA FORMATIVA PARA DAR A COÑECER O USO E POSIBILIDADES DA SEDE ELECTRÓNICA

O Concello de Cedeira convoca para o día 25 unha xornada formativa, dirixida ao público en xeral, para que a veciñanza coñeza as posibilidades e vantaxes que ofrece a sede electrónica á hora de facer xestións e trámites administrativos vía telemática.

As persoas interesadas deben apuntarse na oficina de Turismo (avenida Castelao, número 18), no teléfono 981 482 187, ou ben facelo a través do correo electrónico enrique.vazquez@cedeira.gal.

A sala de usos múltiples, situada no pavillón polideportivo municipal, acollerá unha iniciativa que dará comezo ás 10.30 horas e que será impartida por unha profesional do sector. A administración local conta coa colaboración da Deputación da Coruña para a realización dunha xornada que se está a difundir baixo o lema “O teu concello máis preto”.

Desde o goberno municipal invítase os veciños e as veciñas de Cedeira a participar nunha iniciativa que abre novas vías de comunicación coa administración, que axiliza os trámites e que ademais é respectuosa co medio ambiente porque reduce o consumo de papel.

O polideportivo será accesible coa instalación dun elevador de escaleiras

O POLIDEPORTIVO SERÁ ACCESIBLE COA INSTALACIÓN DUN ELEVADOR DE ESCALEIRAS

O Concello de Cedeira investirá 14.450 euros na instalación dun elevador de escaleiras no polideportivo municipal como medida de accesibilidade.

Trátase dunha solución que permitirá o acceso ás bancadas do primeiro e segundo andar do pavillón a aquelas persoas con dificultade de mobilidade.

A empresa Soluciones Técnicas Nexoted levará a cabo a obra, para a que foron solicitadas tres ofertas. A intervención estará rematada dentro do presente exercicio.

A realización deste novo proxecto obedece ao interese do equipo de goberno de cumprir coa obriga legal de eliminación de barreiras arquitectónicas nos edificios públicos.

Só nos últimos anos, o executivo local investiu case 200.000 euros na reforma da biblioteca, cuxa actuación principal consistiu na instalación dun ascensor que agora poden utilizar persoas con problemas de mobilidade. Tamén acometou distintos proxectos para a eliminación de barreiras arquitectónicas, como a ampliación de beirarrúas executada na avenida das Pontes de García Rodríguez para favorecer o tránsito de persoas en cadeiras de rodas.

O alcalde, Pablo Moreda Gil, apuntou que o asunto da accesibilidade segue a ser unha das prioridades cara ao presente mandato, como xa o foi durante o primeiro no que tamén se construíu unha rampla no palacete. Segundo o rexedor municipal, “o obxecto é facer de Cedeira un concello accesible, tanto a hora de utilizar os edificios municipais como a de facer deporte, pasear polos espazos públicos ou camiñar polas beirarrúas”.

Cedeira amplía cunha pick-up Navara o parque móbil da agrupación de Protección Civil

CEDEIRA AMPLÍA CUNHA PICK-UP NAVARA O PARQUE MÓBIL DA AGRUPACIÓN DE PROTECCIÓN CIVIL

O Concello de Cedeira acaba de incorporar un novo vehículo ao parque móbil de Protección Civil, integrado ata agora por un vehículo todo terreo e unha motobomba urbana.

O que recibiu hoxe o concelleiro de Facenda e Servizos Económicos, Manuel Martínez, da man do director xeral de Emerxencias e Interior, Santiago Villanueva, foi unha pick-up Navara, da marca Nissan, que se destinará a tarefas de rescate e busca de desaparecidos, segundo apuntou o xefe da Policía Local, Alberto Díaz.

O alcalde de Cedeira, Pablo Moreda Gil, agradeceu a axuda da Xunta en materia de protección civil e emerxencias porque “permite dotar os membros dos servizos municipais dun equipamento adecuado para facer o seu traballo nas mellores condicións posibles”. Esta colaboración, segundo o alcalde, “contribúe a que a atención sexa máis eficaz e garante, así mesmo, a seguridade das persoas”. Moreda Gil destacou o labor que os membros de Protección Civil realizan ao longo de todo o ano e que tamén pasa por combater a praga da velutina coa retirada de niños.

O acordo de colaboración coa Xunta obriga o Concello a facerse cargo de gastos de matriculación e seguro, mentres que a administración autonómica financia o custo dun vehículo, que supera os 30.000 euros, segundo o rexedor municipal.

O colexio Nicolás del Río xa ten o seu propio desfibrilador, que no verán operará na praia

O COLEXIO NICOLÁS DEL RÍO XA TEN O SEU PROPIO DESFIBRILADOR, QUE NO VERÁN OPERARÁ NA PRAIA

O Concello de Cedeira acaba de facer entrega dun desfibrilador á comunidade escolar do Nicolás del Río. Trátase do terceiro equipo destas características que está a funcionar no municipio e chega despois dos instalados no campo de fútbol e pavillón municipal.

O acto tivo lugar hoxe nas instalacións do colexio e no mesmo déronse cita o alcalde, Pablo Moreda Gil; a directora do centro, Marta Cameselle; a concelleira de Turismo, Carmela Prieto Cal, e o secretario e profesor de Educación Física, Alejandro Martínez.

O alcalde, Pablo Moreda Gil, destacou a intención do executivo local de crear unha rede de desfribriladores que abarque a totalidade das instalacións municipais coa intención de poñer as ferramentas necesarias para poder actuar o máis axiña posible ante un accidente cardiorrespiratorio. Moreda tamén apuntou que, durante os meses de verán, este novo desfibrilador estará operativo para atender aquelas posibles urxencias que poidan ter lugar no areal da Madalena.

Pola súa banda, a directora do Nicolás del Río agradeceu o “agasallo” do Concello e explicou que, cando menos, desde a dirección do colexio existe a intención de facer partícipe ao alumnado da incorporación deste novo aparato á vida cotiá do centro así como informar dos seus usos.

O investimento, asumido na súa totalidade polo Concello, superou os 1.800 euros.

O Concello repartirá esta semana o boletín As7parroquias que volve á rúa despois do verán

O CONCELLO REPARTIRÁ ESTA SEMANA O BOLETÍN AS7PARROQUIAS QUE VOLVE Á RÚA DESPOIS DO VERÁN

O boletín As7parroquias, que edita o Concello de Cedeira para ter informada a veciñanza, volverá este xoves estar na rúa despois do verán. Por esta razón, na publicación recóllense balances moi exitosos tanto no campo deportivo como no relativo á campaña turística, así como outros moitos asuntos de actualidade.

Durante o tempo estival o municipio acolleu competicións de tríatlon, pádel, fútbol sala e fútbol praia, ao tempo que recibía unha morea de viaxeiros que se achegaron á vila para visitar o castelo da Concepción, o santuario de Santo André de Teixido ou mesmo para tomar parte nas xeorrutas e roteiros promovidos polo Concello dentro da súa oferta turística. Case 7.000 persoas pasaron este verán pola oficina de turismo e xa son máis de 2.000 as que nos últimos tres anos se acercaron á xeoloxía a través das saídas gratuítas, que fan desta riqueza natural un recurso turístico diferencial.

No boletín tamén houbo espazo para explicar os contidos dos orzamentos que se aprobaron no mes de agosto e estarán vixentes ata final de ano, a aposta do goberno municipal para incrementar o número de lámpadas de tecnoloxía LED tanto na zona rural como urbana, así como a licitación da obra que fará do castelo da Concepción o centro interpretativo do xacemento arqueolóxico de Punta Sarridal.

O goberno de Cedeira inviste na conservación da biblioteca coa obra de pintura exterior do edificio

O GOBERNO DE CEDEIRA INVISTE NA CONSERVACIÓN DA BIBLIOTECA COA OBRA DE PINTURA EXTERIOR DO EDIFICIO

O goberno de Cedeira acomete obras de pintura exterior na biblioteca pública López Cortón, por considerar que “poñen en valor a zona vella, favorecen a conservación do edificio e completan as melloras xa realizadas”, segundo apuntou o alcalde, Pablo Moreda Gil.

Os traballos xa están en marcha desde hai uns días e corren a cargo da empresa Agustín González Carro. O investimento supera os 6.655 euros.

A deterioración que presentaban as paredes exteriores da biblioteca facía imposible demorar por máis tempo a realización das obras. Estas, ademais de mellorar a estética, dotarán o edificio dunha protección antihumidade para garantir a súa conservación e contribuirán a poñer en valor un dos edificios máis singulares do casco antigo da vila. Cabe recordar que a súa construción primixenia se remonta ao século XVIII e que foi sede consistorial durante moitos anos.

O proxecto contratado axudará así mesmo a facer máis atractivo, e polo tanto máis visible, un servizo público que o goberno municipal sempre quere revitalizar, motivo que tamén estivo detrás dun investimento de máis de 200.000 euros en melloras de accesibilidade e funcionamento. A instalación dun ascensor, a renovación do mobiliario e o uso das novas tecnoloxías LED foron só algunhas das obras acometidas na recta final do anterior mandato.

Máis recentemente, tamén foron debuxadas a faciana e versos de Rosalía de Castro nas fachadas posterior e principal, respectivamente, do edificio da biblioteca municipal. Ningún destes traballos desaparecerán coa execución da obra que agora se atopa en proceso de realización.