SERVIZOS

Cedeira leva o arte urbano ao peche e a parede exterior do colexio Nicolás del Río

CEDEIRA LEVA O ARTE URBANO AO PECHE E A PAREDE EXTERIOR DO COLEXIO NICOLÁS DEL RÍO

O Concello de Cedeira segue na súa loita contra o feísmo nos espazos públicos. E así, é despois de debuxar a Rosalía de Castro na fachada da biblioteca e de encher de paisaxes locais a estación de bombeo, agora vén de ilustrar o peche e a parede exterior do CEIP Nicolás del Río con motivos infantís e cunha paisaxe na que están representados tanto o mar como a montaña.

Estes dous novos traballos son obra do artista local Adrián Taracido, licenciado en Bellas Artes e autor tamén da nova imaxe que a día de hoxe ofrece a EDAR. Foron necesarios máis de dous meses de traballo durante as fins de semana para cubrir con lapis de cores e con animais da fauna autóctona un muro cuxas medidas son de 90 metros de longo por 1,60 de ancho. As dimensións da parede da antiga vivenda do conserxe ocupan un total de 30 metros cadrados, un espazo do que Taracido fixo principal protagonista a un corzo pero no que tamén se atopan unha vacaloura e un paxaro nun niño de lapis.

Fronte ao feísmo, o goberno municipal de Cedeira está a apostar por “facer dos espazos públicos museos de balde sen paredes nin teitos”. “Onde antes había un branco balorento, un recebo descascado, …, agora queremos transformalo en luz e cor”, din. O executivo local xa baralla novas intervencións de “street art” ou arte urbano para darlle continuidade a esta política rexeneradora.

Concedida a autorización para ampliación de horario durante as festas patronais

CONCEDIDA A AUTORIZACIÓN PARA AMPLIACIÓN DE HORARIO DURANTE AS FESTAS PATRONAIS

A Alcaldía solicitou á Xefatura Territorial da Vicepresidencia e Consellería de Presidencia, Administracións Públicas e Xustiza unha ampliación de horario para os locais de hostalería en xeral con motivo das Festas do Apóstolo Santiago e Santa Ana e as Festas Patronais-2019.

Con data 23 de xullo de 2019 recibiuse a Resolución da Xefatura Territorial da Vicepresidencia e Consellería de Presidencia, Administracións Públicas e Xustiza, pola que se CONCEDE a ampliación dunha hora para os locais de hostalería e os espectáculos públicos de Cedeira, para os días 25 e 26 de xullo e dende o día 10 ao 17 de agosto de 2019.

Pode consultar toda a información ao respecto nas seguintes ligazóns:

Descarga PDF Circular Autorización para ampliación de horario durante as festas patronais

Descarga PDF Resolución Autorización para ampliación de horario durante as festas patronais

Cedeira mellora a recollida de lixo na zona rural con bases de cemento e sistemas de suxeición de colectores

CEDEIRA MELLORA A RECOLLIDA DE LIXO NA ZONA RURAL CON BASES DE CEMENTO E SISTEMAS DE SUXEICIÓN DE COLECTORES

O Concello de Cedeira vén de acometer obras na zona rural que gardan relación co servizo de recollida de lixo.

O proxecto, que xa foi executado, consistiu na construción de bases de cemento e na instalación de sistemas de suxeición para evitar o desprazamento dos contedores.

As melloras foron acometidas no conxunto das sete parroquias, dando lugar a un total de 40 intervencións nas zonas de Montexo Vello, Igrexa de San Román, Casal de María, San Miguel, Sisalde, Os Hedreiros, Gaias da Area, cemiterio de Piñeiro, As Pontigas, cruce das Barbosas, Remesal e Rabadán, entre outras.

As obras estiveron a cargo da empresa Prieto Mouriz, que presentou a oferta que despois resultou ser a máis vantaxosa para os intereses do Concello e cuxo importe foi de 17.520,80 euros (IVE incluído).

9

Cedeira acometerá catro novas obras para mellorar a rede municipal de camiños públicos

CEDEIRA ACOMETERÁ CATRO NOVAS OBRAS PARA MELLORAR A REDE MUNICIPAL DE CAMIÑOS PÚBLICOS

O Concello de Cedeira contempla un gasto de 67.518,28 euros para darlle continuidade este verán ao plan de mellora de camiños públicos.

Catro son as novas intervencións que o executivo local prevé sacar a licitación nas próximas datas. En concreto, trátase dos viais situados en Piñeiro, O Campón, A Pasada e o coñecido como Hedreiros.

As obras consistirán na reparación das estruturas viarias, que na actualidade presentan fochancas e outras deficiencias, mediante tratamentos asfálticos e selado en toda a superficie, así como na limpeza das gabias e na aplicación dunha capa de macadam naqueles tramos que se atopen en peor estado de conservación.

En conxunto, serán máis de 2,5 quilómetros dunhas intervencións coas que se busca mellorar a seguridade viaria e mesmo a comunicación polo municipio. O prazo de execución dos traballos será de oito semanas, segundo as previsión dos responsables locais.

Prazos e solicitudes para a autorización das fogueiras de San Xoán e de San Pedro 2019

PRAZOS E SOLICITUDE PARA A AUTORIZACIÓN DAS FOGUEIRAS DE SAN XOÁN E SAN PEDRO 2019

O prazo para presentar as solicitudes de autorización das fogueiras de San Xoán e San Pedro do ano 2019 empeza o xoves 6 de xuño e remata o día 18 de xuño ás 14:00 horas. O modelo de solicitude cuberto deberá presentarse no Rexistro do Concello de Cedeira.

As persoas solicitantes poderán recoller a pertinente autorización no Concello a partir do xoves 20 de xuño.

O Concello de Cedeira agradece a colaboración de todos os veciños e veciñas para o bo desenvolvemento das festas e o cumprimento das normas de seguridade publicadas no Bando de alcaldía con fecha do 3 de xuño de 2019.

Pode consultar toda a información ao respecto nas seguintes ligazóns:

Descarga PDF Normas para as fogueiras da noite de San Xoán / San Pedro

Descarga PDF Solicitude de permiso para realizar fogueiras de San Xoán / San Pedro

Descarga Bando normas para as fogueiras da noite de San Xoán / San Pedro

Aviso de corte do tráfico nas estradas Cariño-Mera e Ferrol-Viveiro

AVISO DE CORTE DO TRÁFICO NAS ESTRADAS CARIÑO-MERA E FERROL-VIVEIRO

Con motivo da celebración do Campeonato de España de Media Maratón Máster, e seguindo as indicacións da DGT e da Dirección Provincial da Garda Civil de Tráfico, infórmase á cidadanía de que mañá sábado 25 de maio estableceranse os seguintes cortes na circulación pola estrada CP-6121 (Cariño-Mera) e a AC-862 (Ferrol-Viveiro):

  • Ás 16.45 horas pecharanse as saídas de Ortigueira e Cariño pola AC-862 e a CP 6121, respectivamente. A vía alternativa recomendada de saída e entrada a Cariño será sempre a CP 2205 (Cariño-San Andrés de Teixido-Cedeira).
  • Ás 17.10 horas pecharase a CP 6121 en Mera dirección Cariño, e non voltará a ser aberta ata a fin da proba.
  • Estímase que sobre ás 18.15 horas a estrada AC 862 quedará totalmente aberta ó tráfico.
  • A estrada CP 6121 irase abrindo segundo vaia transcorrendo a proba no tramo Mera-Cariño.

Todos os horarios son estimados, podendo variar en función do que no seu momento determinen as autoridades supramunicipais responsables do tráfico.

En todo caso recoméndase que na medida do posible non se empregue o coche, e de ter que facerse evitar os períodos conflitivos (16.45 h -19.40 horas aproximadamente).

Cedeira avanza cara ao proxecto construtivo do futuro centro de día

CEDEIRA AVANZA CARA AO PROXECTO CONSTRUTIVO DO FUTURO CENTRO DE DÍA

O goberno de Cedeira segue a dar pasos cara á construción dun centro de día para cubrir unha necesidade dos veciños e veciñas de máis idade.

Hoxe mesmo a concelleira de Cultura e Turismo, María Xosé Rodríguez Pérez, e máis o titular da Concellería de Deportes, Nicolás Vergara, reuníronse con técnicos da Xunta para confrontar opinións con respecto ao proxecto construtivo elaborado polos servizos técnicos municipais. Este encontro responde á colaboración brindada no seu día polo responsable do Consorcio Galego de Servizos de Igualdade e Benestar, Perfecto Rodríguez, no sentido de traballar coordinadamente para garantir a realización do proxecto.

A reunión foi moi positiva, segundo apuntou a responsable de Cultura, xa que houbo case unha total sintonía cos representantes da Xunta. Trataríase dun edificio de nova construción e planta baixa, situado ao pé da estación de autobuses, en terreos de propiedade municipal. Aínda sen cuantificar, a edificación acollería dúas zonas perfectamente delimitadas, de maneira que había unha específica para persoal e servizos e outra dedicada exclusivamente aos usuarios. Dúas salas de rehabilitación, unha cociña, un almacén e un gran salón comedor son algúns dos servizos que nun futuro poderán utilizar as persoas maiores que acudan ao centro de día de Cedeira.

A obra da variante das Pontigas xa está en marcha

A OBRA DA VARIANTE DAS PONTIGAS XA ESTÁ EN MARCHA

A obra da variante das Pontigas está en marcha desde hai uns días coa execución dos primeiros traballos de sinalización e acondicionamento do chan. Trátase dunha intervención financiada pola Deputación da Coruña que suporá a modificación do trazado da estrada DP-2204, ao seu paso polo núcleo do que recibe o nome a intervención, en cuxa execución vanse investir algo máis de 464.000 euros, ao marxe dos 124.000 previstos para as expropiacións. O orzamento de licitación superaba os 731.00 euros, entre gastos de obras (607.086,65 euros) e os máis de cen mil das expropiacións.

O proxecto consiste na construción dunha nova variante cunha lonxitude de 1,2 quilómetros e o acondicionamento dun vial de enlace de 330 metros que permitirá salvar o núcleo de Pontigas, onde as edificacións están moi próximas á estrada actual, o que fai imposible a súa ampliación.

A obra permitirá ademais diminuír o tráfico que circula a diario polo devandito núcleo de poboación mellorando notablemente a seguridade viaria na zona e evitando a afectación dun ben patrimonial cultural da localidade, como é a casa-pazo do Sete. O proxecto suporá así mesmo a ampliación do ancho da vía, que pasará a ter sete metros de plataforma e un de beiravía.

O equipo de goberno valora o inicio duns traballos que, unha vez estean rematados, contribuirán a mellorar a seguridade viaria, grazas ao incremento do ancho da plataforma e a unha maior visibilidade.

A estrada DP-2204 rexistra un importante volume de tráfico debido á circulación de autobuses en dirección a San Andrés de Teixido e aos miradoiros dos cantís da zona. A estrada actual so ten cinco metros de ancho e discorre por unha zona de curvas, moi próxima ás vivendas dos veciños.

Cedeira organiza unha charla para informar da praga que está a afectar ao buxo

CEDEIRA ORGANIZA UNHA CHARLA PARA INFORMAR DA PRAGA QUE ESTÁ A AFECTAR AO BUXO

O caruncho asiático é unha praga que afecta ao buxo e que está a xerar intranquilidade entre a veciñanza, por representar unha seria ameaza para a supervivencia das prantas. Este é o motivo polo que Concello de Cedeira, a través da Concellería de Medio Ambiente, organiza para a xornada do mércores día 8 unha charla coa fin de abordar o problema contando coa voz autorizada dos expertos. Será na biblioteca do auditorio, a partir das oito da tarde, e correrá a cargo do enxeñeiro técnico agrícola Francisco Pico que pronunciará a conferencia “Como tratar a enfermidade do buxo”, e que tamén responderá ás preguntas dos asistentes.

O caruncho asiático, tamén chamada polilla china u oruga do boj, é un lepidóptero orixinario do oeste asiático que chegou a Europa no 2006, entrando por Alemania pero estendéndose moi rapidamente por Holanda, Reino Unido, Suiza, Francia, Austria, Bélxica, Rusia, Turquía, ata chegar a España no ano 2014.

O súa orixe está na distribución é a comercialización de plantas ornamentais infectadas e, a día de hoxe, pódese tratar a base de trampas de feromonas ou tendo como aliado ao seu depredador natural, que é a avespa asiática.

 

A obra de saneamento nas rúas Paz, Silva e Floreal dará comezo o luns día 13 de maio

A OBRA DE SANEAMENTO NAS RÚAS PAZ, SILVA E FLOREAL DARÁ COMEZO O LUNS DÍA 13 DE MAIO

O proxecto de mellora na rede de saneamento nas rúas Paz, Silva e Floreal dará comezo o día 13 do presente mes. Así o puxo de manifesto o alcalde, Pablo Moreda Gil, no momento da sinatura do contrato co representante da empresa que levará a cabo uns traballos que se prolongarán por espazo de 60 días naturais.

Urespa Proyectos y Obras é a construtora adxudicataria dun concurso no que tomaron parte un total de 10, cunha oferta económica de 113.069,44 euros (IVE incluído), a segunda máis baixa, e coa puntuación máis alta en criterios como estabilidade temporal de fixos e mulleres, prazo de garantía e plan de igualdade, entre outros. O prezo de licitación era de 146.896 euros.

A intervención consistirá en transformar a actual rede unitaria de saneamiento “moi deteriorada” por unha nova separativa nestas tres rúas, que supoñen case medio quilómetro de lonxitude. As obras consistirán na substitución dos colectores de augas residuais por outros de PVC, así como na execución dun novo colector exclusivo para pluviais. Tamén se contempla a realización dun total de 65 acometidas domiciliarias, a construción de 21 pozos de rexistro fabricados en formigón e o mesmo número de sumidoiros, cuxa capacidade de desaugadoiro será suficiente para absorber polo menos o 70% do caudal de referencia. O proxecto culminará coa reposición dos asfaltados que se poidan ver afectados.

O goberno municipal valora especialmente a realización desta obra, por canto, ademais de mellorar a calidade de vida dos veciños, tamén se deixará sentir tanto na praia como na ría coa posta en marcha nun novo tramo de rede separativa. A obra está financiada ao cen por cen pola Deputación da Coruña e a súa realización enmárcase na línea de actuación que o executivo local está levando a cabo desde o seu acceso á Alcaldía.