SERVIZOS

Os proxectores do pavillón xa están a iluminar as instalacións deportivas do CEIP Nicolás del Río

OS PROXECTORES DO PAVILLÓN XA ESTÁN A ILUMINAR AS INSTALACIÓNS DEPORTIVAS DO CEIP NICOLÁS DEL RÍO

O Concello de Cedeira vén de dar novo uso aos 12 proxectores LED que no seu día foron retirados do pavillón municipal. Son os que esta semana xa están a iluminar o polideportivo do CEIP Nicolás del Río.

O proxecto tivo un custo cero para as arcas municipais, ademais de representar un gran avance en canto ao aforro e eficiencia enerxética. Os proxectores agora colocados nas instalacións deportivas do colexio cedeirense fixeron posible a retirada de outros de 400W e de vapor de mercurio, máis contaminantes e menos rentables desde o punto de vista do consumo enerxético. A potencia dos actuais é de 110W.

Esta actuación deu lugar así mesmo á substitución das 16 lámpadas situadas ao longo do corredor central do centro educativo por outras de 20W de tipo Led, unha actuación que tamén se valora polo seu compoñente decorativo.

Desde o inicio do presente mandato, o goberno de Cedeira está a manter unha habitual liña de colaboración coa dirección do Nicolás del Río para atender as necesidades que poidan ir xurdindo ao longo do curso escolar.

O Ministerio de Transición Ecolóxica segue a dar novos pasos cara á recuperación da cetaria do Sarridal

O MINISTERIO DE TRANSICIÓN ECOLÓXICA SEGUE A DAR NOVOS PASOS CARA Á RECUPERACIÓN DA CETARIA DO SARRIDAL

A Subdirección General para la Protección de la Costa, dependente do Ministerio de Transición Ecológica, xa está a traballar nos trámites previos que darán lugar á recuperación da antiga cetaria do Sarridal. Así o confirmou o responsable do devandito organismo estatal, Ángel Muñoz Cubido, ao alcalde de Cedeira, Pablo Moreda Gil, nun encontro que tivo lugar onte en Madrid e que o rexedor valorou de xeito especial por tratarse “dunha actuación que contribuirá á posta en valor do patrimonio local e que ten moito interese cara ao sector turístico”.

O compromiso do responsable da Protección de la Costa pasa por axilizar ao máximo os informes e trámites pendentes coa fin de garantir o inicio dos traballos inmediatamente despois de que exista a consignación orzamentaria correspondente. Pola súa banda, o alcalde reiterou a oferta que se fixo desde a administración local no sentido de colaborar economicamente na execución dunhas obras cuxo importe actualizado podería superar os 300.000 euros. A achega municipal sería fixa, tal e como se ten acordado, pero aínda está sin determinar a súa cantidade.

O Concello ademais xa realizou o procedemento de impacto ambiental e, por parte da Demarcación de Costas, sometouse a exposición pública un proxecto que se atopaba paralizado desde o ano 2010 por unha decisión técnica e que consistirá na recuperación das estruturas existentes e en darlle accesibilidade ao lugar, moi próximo ao castelo da Concepción e mesmo tamén ao xacemento arqueolóxico no que foi localizada a quinta pedra formosa de Galicia.

O goberno municipal de Cedeira valora e aprecia o compromiso que o Ministerio de Transición Ecológica está a demostrar coa administración de Cedeira, tanto por parte do máximo responsable Subdirección General para la Protección de la Costa, Ángel Muñoz, como pola de Rafael Eimil e Carlos Gil no caso da Demarcación de Costas de Galicia. Esta colaboración xa deu lugar, o pasado mes de febreiro, á licitación da redacción do proxecto e o estudio de impacto ambiental da praia da Madalena, estimado en 110.000 euros e cun prazo de execución de 12 meses.

Cedeira contrata por 143.979 euros a renovación de beirarrúas en cinco viais do centro urbano da vila

CEDEIRA CONTRATA POR 143.979 EUROS A RENOVACIÓN DE BEIRARRÚAS EN CINCO VIAIS DO CENTRO URBANO DA VILA

O Concello de Cedeira vén de adxudicar á empresa Sergonsa Servicios SL o proxecto de mellora de beirarrúas nalgunhas das principais vias do centro da vila coa finalidade de favorecer a mobilidade peonil e mellorar o estacionamento. O acordo pechouse por importe de 143.979,11 euros (IVE incluído). O número de empresas licitadoras foi doce.

Trátase dun conxunto de cinco intervencións, que se executarán nun prazo de cinco mes e que se levarán a cabo na avenida da Area e nas rúas Camiño da Madgalena, Mariñeiros, Ponte Nova e As Pontes de García Rodríguez.

Todas as actuacións consistirán na demolición das beirarrúas que agora existen para dar lugar á realización doutras novas, con pavimentos a base de pedra artificial, baldosa ou terrazo e, nalgúns caos, tamén na ampliación das prazas de estacionamento e do espazo reservado aos peóns.

Este será o caso do proxecto que se levará a cabo na rúa das Pontes de García Rodríguez, na que as actuais beirarrúas dun metro de ancho pasarán a ter 1,5 metros, no tramo das avenidas Castelao e España, e 1,80 no comprendido entre as avenidas de España e da Area. A obra tamén inclúe a creación de novas áreas de estacionamento en liña e un carril central de 3 metros.

No caso do Camiño da Magdalena, a actuación levarase a cabo no tramo comprendido entre a rúa José Pascual López Cortón e o final da parcela do colexio Nicolás do Río, mentres que na dos Mariñeiros a obra afectará ás beirarrúas existentes entre a praza do Peixe e a rúa Longa.

No vial da Ponte Nova, as novas beirarrúas estarán entre a rúa Rosalía de Castro e a ponte nova e na avenida da Area a intervención levarase a cabo en ámbolos dous marxes da estrada, de maneira que entre a travesía da Silva e o camiño da Xunqueira materializarase polo lado esquerdo e entre a rúa As Pontes e o camiño da Xunqueira, polo dereito.

O proxecto, cuxo prazo de garantía é dun ano, tamén inclúe a renovación da sinalización horizontal e o recrecido das tapas dos pozos de rexistro e arquetas.

Cedeira licita por 98.508 euros a instalación do saneamento nos lugares de Casal de María e Vila do Río

CEDEIRA LICITA POR 98.508 EUROS A INSTALACIÓN DO SANEAMENTO NOS LUGARES DE CASAL DE MARÍA E VILA DO RÍO

O goberno de Cedeira vén de sacar a licitación a obra que dotará de saneamento aos núcleos de Casal de María e Vila do Río, dous lugares dos 24 que existen na parroquia de San Román de Montoxo.

O proxecto, licitado por 98.508,14 (IVE incluído), consistirá na canalización das augas residuais domésticas ata os colectores da EDAR ubicada na mesma parroquia. Así, no caso do lugar Casal de María, a intervención dará lugar á instalación de 807 metros de tubaxes e á creación dun total de 20 pozos prefabricados.

En Vilar do Río, pola súa banda, a obra para a posta en funcionamento do servizo require instalar 193,5 metros de canalizacións e a construción de 6 pozos.

O prazo de execución dos traballos é de oito semanas e o relativo á presentación de ofertas concluirá o día 4 do próximo mes de abril. As empresas interesadas poden consultar os contidos da oferta na páxina web do Concello (www.cedeira.gal), así como os relativos á contratación na Plataforma de Contratación do Sector Público.

O goberno municipal agradece a colaboración das entidades veciñais na demanda e realización deste tipo de iniciativas, que seguen ser das prioritarias para o executivo local.

Cedeira contrata por case 60.000 euros a reurbanización da rúa Convento

CEDEIRA CONTRATA POR CASE 60.000 EUROS A REURBANIZACIÓN DA RÚA CONVENTO

O Concello de Cedeira vén de adxudicar, por importe de 59.519,94 euros, a obra de reurbanización da rúa Convento, unha vía peonil de 45 metros de longo e 10 de ancho na que se atopa o auditorio municipal.

O prazo de execución dos traballos correrán a cargo da empresa Construcciones Canosa SL é de 42 días laborais, segundo consta no contrato asinado esta mesma semana.

As obras consistirán na substitución do pavimento, eliminando os tramos de adoquín e formigón impreso para poñer granito, e na mellora dos servizos, principalmente coa incorporación de tubaxes para a recollida das augas pluviais.

A rúa manterá aqueles elementos que a caracterizan, incluíada a escultura pero, polo contrario, estreará mobiliario e iluminación. O primeiro dará lugar á instalación de catro bancos (dous dobres e un triple), así como a incorporación de xardineiras e papeleiras separativas. Un total de catro luminarias distribuiranse ao longo dunha vía moi transitada pola presenza na mesma do centro cultural e social.

O proxecto tamén prevé a instalación de catro bolardos empotrados e extraíbles para evitar o tráfico rodado desde a rúa María Mediadora.

Convocadas as axudas da Deputación a entidades asociativas agrarias e labregas para investimentos

CONVOCADAS AS AXUDAS DA DEPUTACIÓN A ENTIDADES ASOCIATIVAS AGRARIAS E LABREGAS PARA INVESTIMENTOS

O pasado luns 25 de febreiro tivo lugar a publicación no Boletín Oficial da Provincia (BOP) da resolución número 2019/5877 da Presidencia da Diputación da Coruña pola que aprobouse a convocatoria do programa de subvencións dirixido a entidades asociativas agrarias e labregas da provincia da Coruña para a realización de investimentos durante o ano 2019.

Nas seguintes ligazóns pode acceder á publicacións no BOP e na Base de Datos Nacional de subvencións da convocatoria das axudas:

IR Á LIGAZÓN Publicación no BOP do programa de subvencións a entidades asociativas agrarias e labregas da provincia da Coruña para a realización de investimentos durante o ano 2019

IR Á LIGAZÓN Publicación no Sistema Nacional de Publicidade de Subvencións do programa de subvencións a entidades asociativas agrarias e labregas da provincia da Coruña para a realización de investimentos durante o ano 2019

O Ministerio de Transición ecolóxica saca a licitación o proxecto construtivo e o estudo ambiental da praia

O MINISTERIO DE TRANSICIÓN ECOLÓGICA SACA A LICITACIÓN O PROXECTO CONSTRUTIVO E O ESTUDO AMBIENTAL DA PRAIA

O goberno de Cedeira recibiu con gratitude e optimismo a licitación, por parte do Ministerio de Transición Ecológica, do proxecto construtivo e do estudio de avaliación ambiental da praia da Madalena, por considerar que “os seus resultados dirannos a orixe do problema para así tamén poder darlle a solución que demanda”, segundo declarou o alcalde, Pablo Moreda Gil.

O importe do contrato supera os 100.000 euros (91.675 euros + IVE) e a licitación do mesmo correspóndelle á Dirección General de Sostenibilidade de la Costa y del Mar. O prazo de execución é de doce meses e o período para a recepción das ofertas finaliza o día 26 do presente mes de febreiro.

O executivo destaca o importe do investimento e o cumprimento, por parte do Ministerio e da Demarcación de Costas de Galicia, do compromiso que no seu día adquiriron co goberno local de financiar uns informes que son claves para analizar, no seu conxunto, a deterioración que está a afectar á praia.

Unha noticia moi importante, segundo os responsables municipais, para o municipio e mesmo para a Plataforma en Defensa da Ría de Cedeira, para as agrupacións políticas (PSOE, BNG, Anova e Cedeira pola Esquerda) e para os veciños e veciñas que veñen secundando a postura oficial do Concello de “abordar o problema de maneira global e definitiva”. O goberno ten agora para todos eles palabras de agradecemento por apoiar unha política coa que se trata de “garantir unha praia para toda a vida”.

A conservación do areal da Madalena é un asunto prioritario para o goberno cedeirense desde a súa chegada á Alcaldía. A denuncia de actuacións pouco respectuosas co medio ambiente, así como a realización do proxecto construtivo e do estudo de avaliación ambiental, agora en proceso de contratación, forman parte da política levada a cabo a través dun longo proceso de reunións e escritos entre administracións, polo que “hoxe é un bo día para estar contentos e esperanzados”, segundo apuntou o rexedor municipal.

O goberno municipal destaca a boa sintonía co Sergas cara a ampliación do Centro de Saúde

O GOBERNO LOCAL DESTACA A BOA SINTONÍA CO SERGAS CARA Á AMPLIACIÓN DO CENTRO DE SAÚDE

O goberno de Cedeira segue a dar pasos firmes cara á ampliación do Centro de Saúde. Onte mesmo o alcalde, Pablo Moreda Gil, reuníase co xerente de Xestión Integrada de Ferrol, Ángel Facio Villanueva, para darlle a coñecer o acordo plenario que deu lugar á adquisición de propiedades anexas ao actual edificio e para analizar, de forma conxunta, os trámites e as accións precisas para dotar de máis recursos sanitarios á vila de Cedeira.

Así, o Concello xa remitiu hai uns días a Patrimonio da Xunta de Galicia a documentación relativa á compra de tres plantas do edificio das vivendas sindicais que, xunto ás que xa eran propiedade do Concello, serán cedidas á Consellería de Sanidade e que incrementarán ata nun 40% o espazo construtivo do actual Centro de Saúde, un servizo asistencial falto de recursos para facer fronte ás necesidades reais da veciñanza e mesmo dos visitantes e turistas ocasionais.

Desde o equipo de goberno destácanse, entre outros problemas, as deficiencias estruturais no servizo de urxencias (PAC), a falla dunha sala acondicionada para cirurxía menor, a necesidade de reubicar a área de pediatría e mesmo a de mellorar a accesibilidade á zona de consultas. No encontro de onte tamén se acordou celebrar unha reunión conxunta entre técnicos da Xunta e do Concello, unha vez que estean resoltos todos os trámites, así como unha posible visita á vila de Cedeira do conselleiro de Sanidade, Jesús Vázquez Almuíña, para analizar sobre o terreo a necesaria ampliación do actual Centro de Saúde.

O goberno municipal destacou a “boa sintonía” que hai entre o Sergas e o executivo local para acometer o proxecto de ampliación e expresou a satisfaccion que a día de hoxe existe entre os responsables municipais polos avances conqueridos cara á consecución dun obxectivo “bo para o pobo e necesario para garantir unha sanidade de calidade”.

O acordo plenario que deu lugar á compra das tres plantas do edificio das sindicais foi adoptado por unanimidade na sesión celebrada o día 26 de decembro e a compra pechouse pola cantidade de 60.913,93 euros. A planta baixa, a terceira e o baixo cuberta que foron adquiridas polo Concello eran propiedade da Consellería de Medio Rural.

Cedeira inviste máis de 12.400 euros en substituír as 32 luminarias do pavillón por outras de maior potencia

CEDEIRA INVISTE MÁIS DE 12.400 EUROS EN SUBSTITUÍR AS 32 LUMINARIAS DO PAVILLÓN POR OUTRAS DE MAIOR POTENCIA

O Concello de Cedeira vén de mellorar a iluminación do pavillón polideportivo substituíndo as luminarias actuais por outras de maior potencia. É a resposta do goberno municipal á demanda que viñan realizando tanto os usuarios como os clubs que utilizan as devanditas instalacións para os seus adestramentos e competicións. Esta reclamación ten o seu orixen no ano 2013 cando as luminarias de 400 w foron reemplazadas polas que agora acaban de se retirar.

O proxecto, polo tanto, consistiu na substitución das 32 luminarias actuais de 108 w de potencia por outras de 200, unha mellora que se fixo en base ao estudo lumínico realizado en 2018 pola empresa Grupo Energal para garantir unha visibilidade óptima para o desenvolvemento das actividades deportivas.

A obra, xa executada, foi realizada pola empresa Hallamann Energy e o seu importe ascendeu a 12.465,13 euros. Trátase de luminarias tipo campana, Factory 200 w 5500k.

O alcalde, Pablo Moreda Gil, destacou a satisfacción que a día de hoxe existe entre os usuarios do pavillón e o goberno local pola cobertura e a garantía que representa a obra executada cara á celebración de competicións e mesmo adestramentos nunhas instalacións fundamentais para o deporte local. Moreda recordou que a esta situación se chega pola decisión do anterior goberno de rebaixar a potencia, “deixando en precario a luminosidade da pista polideportiva”.

A Consellería do Mar comprométese a iniciar os trámites cara á construcción da fábrica de xeo para o porto

A CONSELLERÍA DO MAR COMPROMÉTESE A INICIAR OS TRÁMITES CARA Á CONSTRUCIÓN DA FÁBRICA DE XEO PARA O PORTO

O goberno local e a Confraría de Cedeira arrincaron da Consellería do Mar un primeiro compromiso para comezar a tramitar a construción da fábrica de xeo, unha demanda que se vén reclamando desde hai tempo pola escasa eficiencia da actual para abastecer a frota local de baixura -formada por un 15 barcos- e máis a lonxa, e aos barcos que teñen como punto de amarre o porto cedeirense.

Da realización deste proxecto depende o futuro do porto de Cedeira. Así o entenden tanto o sector pesqueiro local como os responsables municipais, que onte mantiveron unha reunión coa titular da Consellería, Rosa Quintana. No encontro tamén se atopaban presentes a directora de Desenvolvemento Pesqueiro, Susana Rodríguez; o alcalde, Pablo Moreda Gil; o patrón maior, Eduardo González, e a secretaria da Confraría, María Rodríguez.

Os froitos desta reunión comezarán a materializarse nos próximos días co envío por parte da Confraría do orzamento desglosado do proxecto de construción da planta para a fabricación de xeo, valorado en algo máis de 850.000 euros (IVE non incluído). Inicialmente, a Xunta ten a intención de asumir integramente o investimento, para o que ten previsto recorrer ás axudas europeas.

Pablo Moreda Gil valorou este primeiro punto de partida para a realización dun proxecto moi demandado polos profesionais do sector e puxo de manifesto o total apoio da administración local para facer que sexa unha realidade o máis axiña posible. Moreda recordou a importancia que a pesca ten para a economía local e mostrou a súa total disposición a participar en todos os encontros que sexan necesarios para conquerir o devantido obxectivo. Non hai moito o alcalde tamén estivo presente na reunión co presidente de Portos, José Juan Durán Hermida, no que se falou do saneamento do porto e das melloras na recollida de lixo e da iluminación pública.

A Confraría de Pescadores de Cedeira estima nuns 100.000 euros os gastos anuais que está a xerar a actual fábrica polas moitas avarías que ten ao longo do ano -a factura correspondente ao último exercicio superou os 38.000 euros- e polo elevado consumo eléctrico pola utilización duns equipos pouco eficientes desde o punto de vista enerxético, cuxo importe anual está en 55.500 euros. Desde o pósito cedeirense considérase que o futuro da pesca pasa polo funcionamento dunha fábrica que poida dar resposta ás necesidades que demanda a frota, ao tempo que se valora este primeiro compromiso por parte da Xunta para seguir avanzando nese obxectivo.