NOVAS

O Museo Mares acollerá este sábado, ás 12.00h, a charla “Arqueoloxía submarina en Cedeira: A fragata San Juan Bautista”, na que intervirán o arqueólogo submarino Alberto García Montes de Oca e Yago Abilleria Crespo, director e promotor, respectivamente, do proxecto de recuperación dos restos do devandito barco. Os ponentes falarán do buque e explicarán como se van realizar os traballos.

A fragata San Juan Bautista naufragou no ano 1709 ás portas da ría de Cedeira cando trataba de buscar refuxio no porto local fuxindo da piratería. Era un dos primeiros navíos “de aviso”, chamados así por ser barcos pequenos e rápidos, construídos para facer chegar o correo desde as Indias ata España. O buque procedía do Virreinato do Perú e é excepcional que navegara por estas costas, porque habitualmente estes barcos se dirixían a Sevilla ou aos portos do sur.

Coñecemos detalles do naufraxio grazas ao procedemento que lle abriron ao capitán, o vasco Francisco Sorarte, pola perda do correo da Coroa. Naquel expediente consta que o barco fuxía dos piratas e trataba de entrar na ría de Cedeira no medio dun forte temporal que terminou por levalo contra as rochas nunha zona situada entre Pedras Brancas e a pena denominada Con Cagado. As xentes de Cedeira saíron socorrer á tripulación e conseguiron, de feito, salvar a todos os homes salvo un, así como gran parte da carga, que no medio da tormenta puxeron a salvo na capela de San Antonio.

A comisión de seguimento do Museo Mares, integrada polo Concello de Cedeira, a Confraría de Pescadores e a mesma Asociación Mares, acordara xa no ano 2020 darlle apoio loxístico ao proxecto, denominado “Ría de Cedeira”. A meteoroloxía impediu levar a cabo a campaña cando estaba previsto e logo a pandemia retrasou as tarefas.

A Deputación da Coruña sacou a concurso a obra de rectificación do trazado da estrada provincial DP 2206, a que leva a San André, para eliminar a pronunciada curva de Tide pola que os vehículos teñen que circular a 30km/hora e que dificulta moito o paso dos numerosos autobuses que se dirixen ao núcleo de Teixido. Sae a licitación este proxecto despois de que a administración provincial actualizara o presuposto, dos anteriores 350.305,36€ aos actuais 406.061,08€.

A actuación, que se levará a cabo entre os puntos quilométricos 0+920 e 1+220, vai permitir ampliar a sección da estrada e incrementar de xeito notable a visibilidade. O novo trazado implica a construción dun terraplén e a creación dunha obra de drenaxe transversal en marco de formigón armado para dar continuidade a un regato.

É este un proxecto que a Deputación tiña xa redactado en xullo de 2020. Porén, no tempo que se adicou a obter os terreos e as autorizacións precisas doutras administracións, entre elas Augas de Galiza, os prezos no sector da construción sufriron unha acusada subida. Foi preciso aprobar un novo orzamento para sacar a licitación a iniciativa.

As empresas teñen ata o 15 de maio para presentar as súas ofertas. O prazo de execución, unha vez contratada a obra, será de cinco meses. O expediente está publicado na Plataforma de Contratación do Sector Público.

O Ministerio para a Transición Ecolóxica e o Reto Demográfico publicou no Boletín Oficial do Estado a declaración de impacto ambiental do proxecto de rexeneración da praia cedeiresa da Madalena. A actuación, dirixida a acabar definitivamente co desequilibrio que afecta ao areal e que fai que o seu cordón dunar estea retrocedendo, terá un orzamento de execución duns 2,4 millóns de euros. Co cumprimento deste trámite queda xa unicamente pendente a licitación do proxecto de execución.

Os problemas da praia cedeiresa da Madalena veñen de finais da década dos noventa. Prodúcese desde aquela un retroceso da liña de costa que afecta ao cordón dunar e que, ata o de agora, se combatiu con sucesivos aportes de area que amosaron non ser máis que solucións provisionais. O goberno local de Cedeira comezou a traballar na procura dunha solución definitiva xa no anterior bipartito, coa colaboración do BNG e Anova e coa implicación da Plataforma en Defensa da Ría, así como da Confraría de Pescadores. Despois de diferentes xestións e dunha reunión en Madrid do alcalde, Pablo Diego Moreda Gil, co subdirector xeral para a Protección da Costa, Ángel Muñoz Cubillo, a Demarcación de Costas licitou, en febreiro de 2019, a redacción do proxecto e o estudo de impacto ambiental. A pandemia ralentizou un pouco a finalización destes traballos, que finalmente foron sometidos a exposición en 2021.

O proxecto que prevé acometer o Ministerio para a Transición Ecolóxica vai afectar fundamentalmente á metade septentrional da praia. Construirase un espigón corto na marxe esquerda de desembocadura do Condomiñas e un encauzamento da desembocadura do rego da Veiga, na parte central da Madalena, así como movementos de area que garantizán un ancho de praia seca mínimo de 55 metros na parte dunar máis afectada polos temporais. Para rematar, o proxecto abrangue a repoboación con vexetación autóctona que contribuirá a manter o equilibrio dinámico da zona.