Skip to content Skip to left sidebar Skip to footer

NOVAS

TEATRO GHAZAFELHOS PORÁ ESTE SÁBADO EN ESCENA A PEZA “NINJA. A VIAXE MÁIS LONGA COMEZA CO PRIMEIRO PASO”

A compañía de teatro Ghazafelhos, toda unha referencia para o público familiar en Galicia, estará este sábado no Auditorio de Cedeira coa obra “Ninja. A viaxe máis longa comeza co primeiro paso”. A representación comezará ás 20.00 horas e as entradas poden reservarse anticipadamente a través do whatsapp no número 649 876 614.

A peza, chea de humor e cunha compoñente pedagóxica, conta a historia de Tori, unha nena do rural que está fascinada pola cultura oriental, o karate, o kung fu, o jiu jitsu, as pelis de Bruce Lee, Jackie Chan… A pequena soña con ser unha auténtica Ninja e xoga a pasar inadvertida e observar o que pasa ao seu arredor, como faría unha guerreira xaponesa. Actuando con sixilo descobre que no colexio hai nenos e nenas que tamén queren pasar inadvertidos, non para ser Ninjas como ela, se non para que outros compañeiros e compañeiras non abusen deles. Tori buscará a axuda do señor Edelmiro para lograr que cambien as tornas.

Tamén este sábado, o Centro de Ocio Xuvenil de Cedeira vai celebrar o seu primeiro aniversario. Cúmprese un ano desde a súa reapertura tras a pandemia, cando o centro comezou a funcionar coa actual dinámica, baixo a coordinación dunha educadora social, Nerea P. Carballeira, na que os propios mozos e mozas usuarias participan directamente na promoción de actividades.

A festa será de nove da tarde ás doce da noite e ás 22.30h está previsto un sorteo de bonos con descontos para comprar na libraría. Haberá xogos, petiscos e música para animar a celebración, aberta á rapazada de 12 a 18 anos da localidade.

O CONCELLO PON EN MARCHA O PROGRAMA “DE RUTA” CON TRES SAÍDAS POLOS EXCEPCIONAIS PAISAXES DO MUNICIPIO

O Concello de Cedeira pon en marcha durante o próximo período de vacacións de Semana Santa o programa ”De Ruta” con tres saídas guiadas a pé polos excepcionais paisaxes do municipio. O goberno local conta coa empresa local de turismo activo Portal Norte para organizar estas tres saídas, que serán os días 1, 5 e 8 de abril, todas de balde e cun límite máximo de 15 participantes.

O programa “De Ruta” comezará o sábado 1 de abril cun percorrido ao faro de Robaleira. Será unha saída de 8km, de dificultade baixa/media e que se realizará nunhas catro horas, con saída desde o Palacete Municipal ás 10.00 da mañá. O itinerario será circular, parte del polo sendeiro que vai desde as vellas fábricas de San Isidro ao faro. Unha vez alí o grupo poderá ver a antiga cetaria, a cala Mi Señora e gozar coas vistas da ría de Cedeira. A volta realizarase polo camiño que leva da praia das Cerdeiras ao Barral.

Para o mércores 5 de abril, a proposta é unha ruta polos Altos de Santo André. Serán tamén 8km dunha dificultade técnica baixa/media, pero con saída desde o mirador dos Carrís. A cita será alí, tamén as 10.00 da mañá, e o percorrido irá pola Serra da Capelada e permitirá gozar coas vistas dos cantís de Santo André de Teixido, a Vixía de Herbeira e as rías de Ortigueira e Cedeira.

A última ruta, o sábado 8 de abril, será un percorrido lineal desde Punta Candieira a Punta Sarridal, cubrindo unha distancia de 10km que, se estima, levará cinco horas. Nesta saída non se vai pisar asfalto e a organización levará ás persoas participantes, en furgonetas, ata o lugar de inicio da andaina. O punto de encontro será no Palacete Municipal ás 09.30 horas.

As persoas interesadas teñen que realizar a súa inscrición no Polideportivo Municipal, ou ben chamando ao número 981 482 633 ou enviando un mail a polideportivocedeira@gmail.com.

O AUDITORIO ACOLLE ESTE SÁBADO A OBRA DE TEATRO “CRÓNICA DUNHA HETEROSEXUAL INSATISFEITA”

A particular viaxe de autodescubrimento dunha muller de mediana idade chega este sábado ao escenario do Auditorio Municipal de Cedeira. A compañía Verdeveras Expresións Artísticas presenta “Crónica dunha heterosexual insatisfeita”, unha obra coproducida polo Centro Dramático galego e escrita e interpretada por María Ángeles Iglesias. A representación, dirixida a un público adulto, será ás 20.30 horas e as entradas poden reservarse anticipadamente a través do whatsapp do número 649 876614.

“Crónica dunha heterosexual insatisfeita” fala dunha muller normal, desas que non van aparecer nunca nun libro de historia, que cae na conta de que está a facerse vella e que, se non fai nada para remedialo, vai morrer conxelada. E decide facer realidade unha das súas fantasías.

A obra é unha comedia con moito fondo, na que se reflexiona sobre a construción da sexualidade, as parellas, os desexos e as motivacións. Unha viaxe na que a protagonista renace e comeza a voar.

Verdeveras Expresións Artísticas naceu no ano 2011 en Santiago de Compostela e está integrada pola dramaturga María Ángeles Iglesias e o músico e compositor Tato López.