NOVAS

O ARQUERO OLÍMPICO MIGUEL ALVARIÑO, INVITADO ESPECIAL DA XIX FESTA DO DEPORTE DE CEDEIRA

O deporte cedeirés volve celebrar este venres a súa festa, despois de tres anos de ausencia, nunha gala enfocada a recoñecer o esforzo de todos os clubes por superar o parón da pandemia e a súa capacidade para saír dela con azos para afrontar novos retos. O Polideportivo Municipal acollerá ás 20.30 horas a Festa do Deporte, que chega este ano á súa décimo novena edición e que contará como invitado especial co deportista olímpico Miguel Alvariño, campión de Europa de tiro con arco.

Tal e como explicou o concelleiro de Deportes, Jesús Romero Carracelas, esta é unha cita que o Concello organiza coa participación de todas as entidades deportivas. Nela recibirán o seu agasallo e recoñecemento os clubes locais de pádel, remo, natación (triatlón), fútbol, karate, bádminton e baloncesto, así como a asociación deportiva Apader, o Street Dance Cedeira e o Club Candieira. Cada un deles, á súa vez, poderá aproveitar a ocasión para destacar o traballo de ata tres deportistas ou entidades.

Ademais, na gala darase a coñecer o nome da persoa ou entidade deportiva máis destacada do último ano. Todos os clubes elixiron as tres nominacións desta edición, que foron para Damián Suárez, do Club Natación Cedeira; a S.D. Cedeira, que cumpliu o pasado ano medio século de historia, e Raquel Rodríguez, do Club de Remo. De entre eles sairá o premio, unha vez máis pola votación das propias entidades deportivas.

A teor do desenvolvemento de todas as galas celebradas ata o ano 2019, esta XIX Festa do Deporte de Cedeira será unha vez máis un evento con gran participación, na que veciños e veciñas da localidade asisten para aplaudir e arroupar aos seus deportistas. Será, de novo, unha ocasión para celebrar e destacar a rica tradición deportiva que existe na localidade así como para gabar os logros acadados en competicións de todos os niveis.

A CAMPAÑA DE ALINGUA A PROL DO GALEGO CHEGA A CEDEIRA E AO SEU CENTRO DE OCIO XUVENIL

O Concello de Cedeira participa na nova campaña de Alingua, entidade que naceu hai un ano e agrupa 19 municipios implicados no traballo en rede a prol do uso do galego. Entre outras accións, a plataforma lanzou un vídeo musical cun tema eléctrico-latino no que Fátima Pego e Grande Amore cantan “É túa. Pásaa!”. A fachada do Palacete luciu desde pasado día 13 unha gran lona, que desde hoxe estará no Centro de Ocio Xuvenil, na que pode lerse o título da canción e escanear un código QR para visualizar o vídeo en Youtube – https://youtu.be/9HJXlhbBTRI-.

Ademais, da fachada do Concello pendurouse tamén estes días unha bandeirola co lema “En Cedeira alínguase”, parte da mesma campaña. Tal e como explicou a concelleira de Cultura, Ermitas García, o goberno local invituou ao colexio e ao instituto, ás asociacións socioculturais e clubes deportivos e ás entidades veciñais a recoller cadansúa bandeirola para sumarse tamén desde os seus locais e instalacións á iniciativa.

O Concello de Cedeira integrouse hai un ano nesta plataforma que agrupa actualmente a 19 municipios e que ten como obxectivo promover o traballo en rede, compartir ideas e organizar actividades para avanzar no uso da lingua galega.

CHARLA SOBRE A FRAGATA SAN JUAN BAUTISTA E O PROXECTO DE RECUPERACIÓN DOS SEUS RESTOS AFUNDIDOS

O Museo Mares acollerá este sábado, ás 12.00h, a charla “Arqueoloxía submarina en Cedeira: A fragata San Juan Bautista”, na que intervirán o arqueólogo submarino Alberto García Montes de Oca e Yago Abilleria Crespo, director e promotor, respectivamente, do proxecto de recuperación dos restos do devandito barco. Os ponentes falarán do buque e explicarán como se van realizar os traballos.

A fragata San Juan Bautista naufragou no ano 1709 ás portas da ría de Cedeira cando trataba de buscar refuxio no porto local fuxindo da piratería. Era un dos primeiros navíos “de aviso”, chamados así por ser barcos pequenos e rápidos, construídos para facer chegar o correo desde as Indias ata España. O buque procedía do Virreinato do Perú e é excepcional que navegara por estas costas, porque habitualmente estes barcos se dirixían a Sevilla ou aos portos do sur.

Coñecemos detalles do naufraxio grazas ao procedemento que lle abriron ao capitán, o vasco Francisco Sorarte, pola perda do correo da Coroa. Naquel expediente consta que o barco fuxía dos piratas e trataba de entrar na ría de Cedeira no medio dun forte temporal que terminou por levalo contra as rochas nunha zona situada entre Pedras Brancas e a pena denominada Con Cagado. As xentes de Cedeira saíron socorrer á tripulación e conseguiron, de feito, salvar a todos os homes salvo un, así como gran parte da carga, que no medio da tormenta puxeron a salvo na capela de San Antonio.

A comisión de seguimento do Museo Mares, integrada polo Concello de Cedeira, a Confraría de Pescadores e a mesma Asociación Mares, acordara xa no ano 2020 darlle apoio loxístico ao proxecto, denominado “Ría de Cedeira”. A meteoroloxía impediu levar a cabo a campaña cando estaba previsto e logo a pandemia retrasou as tarefas.