Skip to content Skip to left sidebar Skip to footer

MEDIO AMBIENTE

Charla gratuíta orientativa para entender a factura de electricidade

CHARLA GRATUÍTA ORIENTATIVA PARA ENTENDER A FACTURA DE ELECTRICIDADE

O próximo venres día 3 de agosto e o martes día 7 de agosto, na sala de usos múltiples do Polideportivo municipal a partir das 11.00 h ámbolos dous días, terá lugar unha charla gratuíta para entender a factura de electricidade organizada polo Concello.

As prazas son limitadas e, para asistir á charla, os interesados deberán realizar a inscrición na Oficina de Turismo ata mañá xoves 2 de agosto.

A Oficina de turismo permanecerá aberta hoxe e mañá de 9.00 a 14.30 e de 15.30 a 21.00 h.

O Goberno reitera a súa aspiración de redactar e executar un proxecto construtivo na Madalena

O GOBERNO REITERA A SÚA ASPIRACIÓN DE REDACTAR E EXECUTAR UN PROXECTO CONSTRUTIVO NA MADALENA

O goberno de Cedeira reitera que a súa aspiración e máis a da Plataforma en Defensa da Ría é a redacción e posterior execución dun novo proxecto construtivo para a praia da Madalena. É a resposta do equipo de goberno ante as novas críticas do Partido Popular polo estado actual do areal.

Sobre esta cuestión os responsables municipais poñen de manifesto que “a nosa idea é opoñernos a que se sigan gastando os cartos públicos en mover area para disimular o valado de contención de madeira durante os meses de verán, para que despois os temporais a leven de novo ao punto de partida” e consideran que os accesos ao areal “presentan un aspecto moi semellante ao que houbo ao longo dos últimos dez anos”. Entenden así mesmo que a solución pasa por abordar o problema de “maneira global e definitiva” e recordan que a día de hoxe “a pelota está no tellado da Demarcación de Costas”. Recordarase que o compromiso dos responsables da Demarcación pasa por financiar a redacción e execución do proxecto construtivo con cargo aos orzamentos xerais do Estado deste ano.

O goberno, que recorda que o PP é a única formación política con representación no Concello que non quixo tomar parte da plataforma, recoñece que “desde o Concello non deixamos de preocuparnos” e que se está a presionar diante das autoridades competentes, tanto na Demarcación de Costas en Galicia como no propio Ministerio -o alcalde entrevistouse co subdirector xeral para a Protección de la Costa-, para tratar de mudar a situación.

Tamén invita á oposición a abordar estes asuntos dentro dos mecanismos democráticos que existen dentro do Concello de Cedeira antes de airealos nos medios de comunicación e nas redes sociais sen que o goberno teña a posibilidade de explicarse.

O Concello da por finalizada a consolidación do monumento con forno de Punta Sarridal

O CONCELLO DA POR FINALIZADA A CONSOLIDACIÓN DO MONUMENTO CON FORNO DE PUNTA SARRIDAL

O Concello de Cedeira deu hoxe por concluída a terceira escavación levada a cabo no castro de Punta Sarridal, a primeira financiada pola administración local.

Desde hoxe mesmo, o xacemento arqueolóxico, no que no mes decembro de 2017 era localizada a quinta pedra formosa de Galicia, pode xa ser visitado polas persoas que queiran ver un pouco máis de cerca a construción dun asentamento galaico-romano cuxas orixes os expertos sitúan entre os séculos II ou III d.C.

Os responsables municipais, ademais de pedir o máximo respecto á hora de visitar o lugar, entenden que a súa misión é precisamente dar a coñecer un patrimonio que está na esencia do pobo cedeirense e que fala da súa singularidade e identidade propia. A idea do goberno de Cedeira tamén pasa pola colocación dun peche para delimitar a zona escavada e pola instalación de paneis informativos para que os visitantes poidan ter datos sobre o traballo realizado e os resultados acadados. Estas obras se levarán a cabo de seguido.

Esta terceira intervención, que daba comezo nos primeiros días do presente mes e na que estiveron traballando ata oito persoas, tiña como obxectivo a consolidación e posta en valor dos elementos ata o de agora localizados.

Con cargo a un orzamento de 12.000 euros (IVE incluído), a tarefa realizada deu lugar á recuperación do lousado e empedrado do acceso á antecámara así como dun banco situado en dita estancia. Tamén se actuou no arco de entrada á cámara, se consolidou a boca do forno e se deixou á vista tanto o paramento exterior do monumento con forno como o do exterior da muralla. Nun deles, ademais, foi localizado e recuperado un canal de auga.

Os primeiros traballos arqueolóxicos en Punta Sarridal deron comezo o día 1 de decembro do 2017. Con anterioridade, o Concello tiña levado a cabo unhas catas e localizados restos de cerámica e de muros de orixe castrexa. Tan só terían que pasar trece xornadas máis desde aquel día de decembro para que Cedeira entrase pola porta grande no mundo da arqueoloxía castreña co descubrimento dunha “pedra formosa”, a quinta da que se ten constancia en Galicia.