Skip to content Skip to left sidebar Skip to footer

MEDIO AMBIENTE

As escavacións no Sarridal son protagonistas no Congreso Internacional de Arqueoloxía

AS ESCAVACIÓNS NO SARRIDAL SON PROTAGONISTAS NO CONGRESO INTERNACIONAL DE ARQUEOLOXÍA

O castro do Sarridal e as escavacións levadas a cabo nesta zona de Cedeira está moi presente no Congreso Internacional de Arqueoloxía que estes días se está a celebrar en Vilalba (Lugo).

Onte mesmo un grupo de participantes se desprazou á vila, a primeira hora da tarde, para ter contacto directo coa escavación, na que en decembro pasado foi localizada a quinta pedra formosa atopada en Galicia.

A presenza dos congresistas deu lugar á recepción dos congresistas no popio xacemento por parte do alcalde, Pablo Moreda Gil e dos concelleiros de Cultura, Educación e Servizos Sociais, María Xosé Rodríguez Pérez, Rubustiano Labraña e Manuela López Rodríguez, respectivamente.

E os traballos que se están a realizar na zona do Sarridal volverán mañá a centrar a actividade do congreso coa participación no mesmo de Emilio Ramil, arqueólogo e director das tres escavacións executadas ata agora en Cedeira.

Ramil explicará aos asistentes as características do que é o segundo monumento con forno localizado na zona de Ortegal -Castro dos Prados (Ortigueira), o primeiro, atopouse 28 anos antes así como detalles destes traballos. A continuación, será o arqueólogo Xosé Ramón Martínez Casal, profesional que tamén está a participar nas escavacións, a persoa que leve o descubrimento ao terreo cultural, explicando a riqueza inmaterial que se deriva deste tipo de intervencións e que contribúe a contextualizar a historia dos pobos, neste caso da cedeirense.

O congreso, que arrincou onte, finalizará o venres cunha alta participación de profesionais de Galicia, Asturias, Cantabria, País Vasco, Castilla-León, e norte de Portugal. A Asociación de Amigos do Museo de Vilaba e do Museo de Prehistoria e Arqueoloxía de Vilalba está ao fronte desta cuarta edición do congreso, que ten periodicidade trianual.

Cedeira recorda que os residuos orgánicos deben ir ao colector de cor verde

CEDEIRA RECORDA QUE OS RESIDUOS ORGÁNICOS DEBEN IR AO COLECTOR DE COR VERDE

O Concello de Cedeira, a través da Concellería de Medio Ambiente, considera necesario recordar as pautas que debe seguir calquera usuario do servizo de recollida de lixo para facer un bo uso do mesmo, unha mensaxe dirixida tanto á veciñanza como ás persoas que só están de paso.

Así, infórmase de que o colector de cor verde só está destinado a recibir os residuos orgánicos e a chamada “fracción resto”, que son todos aqueles que non se poden depositar nos contedores de papel/cartón (azul), envases lixeiros (amarelo) e vidro, sempre que non se trate de voluminosos, perigosos ou farmacéuticos.

Os responsables municipais lembran que o servizo de recollida de lixo está a funcionar todos os días, agás os domingos e festivos, e reiteran que existe a obriga de pechar hermeticamente as bolsas antes de botalas nos contedores, un xesto que nunca se poderá levar a cabo nas vésperas de domingos e festivos pero si no serán do resto dos días. Quérese así evitar que os colectores se enchan prematuramente ou despidan cheiro que poida molestar aos veciños/as que viven nas proximidades dos mesmos. O Concello tamén aconsella procurar que nas bolsas non vaian líquidos para tratar de reducir a posibilidade de que acaben espallándose e manchando os interiores dos colectores.

O equipo de goberno reitera a necesidade de que Concello e veciñanza colaboren para tratar de mellorar o funcionamento dos servizos públicos, así como o seu compromiso de limpar con máis frecuencia os contedores, especialmente durante os meses de verán.

Cedeira completa a súa oferta turística con rutas de sendeirismo guiadas

CEDEIRA COMPLETA A SÚA OFERTA TURÍSTICA CON RUTAS DE SENDEIRISMO GUIADAS

O programa arrincará o martes 17 e estará vixente ata finais de agosto.

O Concello de Cedeira completa a súa oferta turística coa organización de dúas rutas de sendeirismo guiadas. Son os denominados roteiros dos Tesouros e de Santo André de Teixido. As saídas, que darán comezo o próximo martes, día 17 de xullo, serán todos os martes e xoves ata finalizar o mes de agosto.

Con respecto á ruta dos Tesouros dará lugar a unha andaina de aproximadamente 10 quilómetros cuxo obxectivo será o faro de Robaleira e súa contorna. A duración estimada é de tres horas e saída será os martes ás 9.00 horas desde a oficina de Turismo, situada no número 18 da avenida de Castelao.

En canto a segunda das propostas, tamén dará comezo ás 9.00 horas pero, neste caso, os primeiros quilómetros faranse en vehículos particulares, ata a igrexa de Régoa, punto de partida unha andaina que cubrirá unha distancia dun 16 quilómetros. A duración será de cinco horas e terá lugar os xoves.

As persoas interesadas xa poden facer a reserva de praza na oficina de Turismo (teléfono 981482 187). O número de participantes é limitado, só serán admitidos os vinte primeiros solicitantes, e a participación é gratuíta. A organización establece como material necesario calzado de monte, bastón, auga, froita e chuvasqueiro. A dificultade é baixa, polo que se trata de actividades nas que tamén poden tomar parte nenos e nenas.

Cara ao presente mes, as saídas serán os días 17, 19, 24, 26 e 31, mentres que en agosto se levarán a cabo os días 2,7,9,21,23, 28 e 30.