Skip to content Skip to left sidebar Skip to footer

MEDIO AMBIENTE

O CONCELLO ENTREGOU 18 NOVOS COMPOSTEIROS A OUTRAS TANTAS FAMILIAS DA VILA

O Concello de Cedeira fixo entrega esta semana, nun acto celebrado no Auditorio Municipal, de 18 composteiros a outras tantas familias da vila que van utilizalos para aproveitar de xeito eficiente os residuos orgánicos da casa, converténdoos en abono para a terra. O goberno local iniciou no ano 2016 o Programa de Compostaxe Doméstico, en colaboración con Sogama, e actualmente son preto de 200 os fogares cedeireses que se adheriron ao mesmo.

Previo á entrega dos composteiros impartiuse, por parte de técnicos de Sogama, un breve cursiño sobre o correcto uso dos mesmos e os seus beneficios. Trátase de volver a un método tradicional para a fabricación de abono, aproveitando os residuos orgánicos da casa, que adoitan ser o 40% do total. É un sistema que ten claras vantaxes meioambientais e tamén económicas.

O Concello de Cedeira dispón de máis composteiros, da partida de 30 que recibiu o pasado mes de setembro, para as familias da vila que conten con xardín ou horta. As interesadas teñen que cubrir o modelo de solicitude que está colgado na web do Concello, no apartado de Medio Ambiente, e presentalo en rexistro (aberto de 09.00 a 14.00 horas) ou ben na sede electrónica – sede.cedeira.gal- ou por correo electrónico -correo@cedeira.gal-. Darase prioridade aos veciños que non tiveran participado no programa en anos anteriores.

Os composteiros son resistentes á intemperie e de sinxelo montaxe e mantemento. Están deseñados para minimizar os cheiros e controlar mellor a condicións idóneas para facer o compost.

Na seguinte ligazón pódese descargar o modelo de solicitude:

http://cedeira.gal/wp-content/uploads/2020/09/MODELO-SOLICITUDE-COMPOSTEIRO.pdf.pdf

O CONCELLO INICIA UN ESTUDO DA SITUACIÓN AMBIENTAL DUN TRAMO DE 5 KM DO RÍO CONDOMIÑAS

O Concello de Cedeira vai levar adiante un estudo da situación do leito fluvial do Río Condomiñas nun treito de aproximadamente cinco quilómetros, curso arriba desde a Ponte da Acea ata pasado o muíño de Chimparra. Segundo explicou o alcalde, Pablo Diego Moreda Gil, o traballo porase en marcha nos vindeiros días e servirá para a posterior redacción dun proxecto técnico de acondicionamento ambiental deste tramo do río. “A idea é contar cun documento técnico que proporcione o coñecemento real e sobre o terreo da situación de partida, para definir as actuacións a realizar”.

O alcalde explicou que o informe vai aportar unha visión integradora do río. Así, abordará o estudio hidráulico, hidrolóxico, xeolóxico e ambiental do Condomiñas, cun levantamento topográfico de detalle do cauce e as súas marxes. Estes aspectos serán completados tamén cunha investigación dos elementos do patrimonio histórico, cultural ou etnográfico que existen ao longo do treito a analizar.

Moreda Gil explicou que unha vez estea listo o informe, dividirase a zona de actuación en tres tramos de similar lonxitude e complexidade, coa finalidade de facilitar ao Concello a posta en marcha de sucesivas fases, en función das posibilidades orzamentarias, coas que ir avanzando no acondicionamento ambiental do río.

Agradementos

Moreda Gil agradeceu en nome do Concello a colaboración que prestan nesta e outras actuacións no eido do medio ambiente a Asociación de Amigos dos Ríos de Cedeira (ARCE) e o Club Candieira, e fixo mención especial da axuda que prestou o biólogo cedeirés Antón Pérez Cribeiro na definición deste proxecto, como gran coñecedor que é da zona. O alcalde fixo extensivo o agradecemento ao Concello da Coruña, onde traballa como técnico Pérez Cribeiro, por permitir e facilitar o seu apoio.

“O río Condomiñas e a ría son o patrimonio máis valioso de Cedeira e queremos preservalo e recuperalo alí onde estea deteriorado”, comentou o alcalde. Ao fío da realización deste estudo de situación do cauce fluvial, Moreda Gil recordou a recente iniciativa do Concello de poñer ao pé de varios sumidoiros das zonas peonís da vila a mensaxe “A ría comeza aquí. Axuda a mantela limpa”, coa que se quere sensibilizar á cidadanía sobre a importancia que teñen as súas accións para o coidado de medio ambiente.

O CONCELLO CONTRATA 22 NOVOS FAROIS LED PARA A ZONA DO PASEO ARRIBA DA PONTE E A RÚA PONTHUS

O goberno local de Cedeira adxudicou á empresa Diexfe a suministración de 22 novos farois e as súas correspondentes bombillas de tecnoloxía LED, que sustituirán ás actuais lámpadas de vapor de sodio. O alcalde, Pablo Diego Moreda Gil, explicou que o investimento se realiza con cargo ao Fondo de Compensación Ambiental 2020, ao que o Concello xa acudiu en exercicios anteriores para emprender o camiño da eficiencia no sistema de alumamento público da vila.

A oferta adxudicataria ascende a 9.103,95€ (+IVE) e o importe inclúe o suministro dos 22 novos farois que persoal municipal se encargará de colocar no Paseo Arriba da Ponte (6 deles), a rúa C. Phontus (11) e a rúa Ezequiel López (2), así como na Rúa Ortigueira (as 3 restantes), na outra beira do Condomiñas.

A introdución da tecnoloxía LED no alumamento público ten grandes vantaxes tanto no coidado do medio ambiente como no eido económico. As novas lámpadas precisan menos da metade da potencia eléctrica para dar a mesma luz que as de vapor de sodio, de maneira que co seu uso baixan as emisións á atmósfera de dióxido de carbono e tamén o custo para as arcas municipais. Son tamén, de por si, menos contaminantes que as tradicionais porque non teñen mercurio. E ofrecen moita maior durabilidade e rendemento, polo que o Concello tamén aforra no mantemento. A todo isto súmase que as bombillas LED permiten axustar mellor a cantidade de luz necesaria, algo que evita unha innecesaria contaminación lumínica.

No presente ano, o Concello de Cedeira está a darlle un importante impulso á renovación da rede de alumamento público na zona rural da vila, con tres procesos de licitación pendentes de resolver que se traducirán na renovación de máis de 2.000 puntos de luz. Trátase dos proxectos de subministración de lámpadas LED no Lugar de Fragoso, Veciñeira, San Miguel e outros, que contempla a substitución de 1.452 farois; o das rúas Nosa Señora do Mar e outras, que prevé o cambio de 91 farois; e o dos Lugares de Bouza, Purrei, Ardeón e outros, coa colocación doutras 517 lámpadas. En total, estas actuacións suman un investimento de máis de 124.000 euros. Cómpre sinalar que este mesmo ano o Concello tamén contratou, por preto de 40.000 euros, a instalación de 97 puntos de luz de tipo LED na Avenida de Castelao, na zona urbana, ás que se sumarán agora estas novas 22 no Paseo Arriba da Ponte e rúa Ponthus.

O alcalde recordou a firme aposta do goberno local pola loita contra o cambio climático, tanto a través deste tipo de actuacións que melloran a eficiencia enerxética das instalacións municipais, como a través da participación do Concello de Cedeira, desde xaneiro de este ano, no “Pacto das alcaldías para o Clima e a Enerxía”.