Skip to content Skip to left sidebar Skip to footer

SERVIZOS

Cedeira executa obras de asfaltado nos camiños Sartego-Birizo, Sisalde, Ventosa e Faro Candieira

Xa foron executados catro novos proxectos de asfaltado incluídos no plan de mellora de camiños que o goberno de Cedeira executa con cargo aos fondos Agader 2018 e con aportacion municipal. Estas novas obras son Sartego-Birizo, Sisalde, Ventosa e Faro Candieira.

En total foron arredor de 3.500 metros de novos asfaltados que, divididos en diferentes tramos, teñen unha media de 882 metros cada un deles. En todos os casos, as obras consistirán na limpeza de cunetas por ámbalas dúas marxes, en ampliar en 15 centímetros a altura da capa de rodaxe e no rego asfáltico semiprofundo e superficial no conxunto das superficies intervidas.

Este último investimento supera os 45.000 euros e os traballos foron executados pola empresa SYR-AMG. O goberno municipal, a través do alcalde, Pablo Moreda Gil, considera necesario seguir investindo en infraestruturas para garantir a seguridade de condutores e peóns, así como para facilitar a comunicación en todo o termo municipal.

Nos últimos tres meses, o Concello leva gastado case 100.000 euros na reparación de camiños. Cabe recordar que no mes de novembro invistiu outros 54.762,95 euros na reparación doutros camiños rurais de titularidade municipal: Vilarcay, Meizoso, As Bieiteiras e Igrexa de Cervo.

Cedeira construirá novos vestiarios no campo de fútbol para favorecer a igualdade de xénero

O Concello de Cedeira leva o tema da igualdade de xénero ás instalacións deportivas. O goberno municipal vén de contratar por 59.502,33 euros á empresa Mecano, Obras y Reparaciones SL para a construción de novos vestiarios no campo de fútbol municipal do Beco. A obra virá completar a edificación existente fronte aos terreos de xogo, respectando a tipoloxía, alturas e mesmo as súas características estéticas.

O prazo de execución da obra é de dous meses e a realización da mesma obedece a necesidade de adecuar as instalacións á incorporación da muller á práctica regular do fútbol. A realidade, segundo apuntou o alcalde, Pablo Moreda Gil, “é que a presenza feminina é cada vez maior en todas as categorías”. A vila conta ademais cun equipo, Discalzas Cedeira SD, que está a competir na liga Feminina de Fútbol 8.

A idea é permitir o uso diario dos dous campos de fútbol oito e suplir as carencias que había con respecto á ultilización dos vestiarios por parte das xogadoras.

O proxecto consiste na construción de dous vestiarios, cunha superficie útil de 82 metros cadrados cada un deles e con capacidade para un mínimo de 15 usuarios á vez. Haberá zona de entrada, espazos para as duchas -unha para cada tres persoas-, cabinas accesibles, bancos, aseos, lavabos e taquillas con chave.

A realización deste proxecto forma parte das actuacións levadas a cabo desde o goberno municipal para mellorar as instalacións deportivas, por considerar que tamén así se está a promocionar o deporte. Esta política deu lugar hai pouco á compra de bicicletas verticais e de spinning para o ximansio, a obras de mantenimiento e mellora do sistema de auga quente no pavillón polideportivo, á erradicación de humidades e á substitución dos bancos soterrados utilizados por adestradores e xogadores suplentes no campo de fútbol de O Beco. O investimento rondou os 40.000 euros.

A política de aforro enerxético chega á iluminación da Praza de Galicia e avenidas Area e Zumalacárregui

O Concello de Cedeira vén de substituír as lámpadas de vapor de sodio na iluminación pública da praza de Galicia, avenida Area, rúa Cuartel e avenida Zumalacárregui por outras de tecnoloxía led, seguindo así coa política municipal de apostar polo aforro enerxético, a diminución das emisións de dióxido de carbono e a redución da contaminación lumínica.

O importe desta última intervención ascendeu a 36.166,90 euros (IVE incluído) e foi executada pola empresa Hallmann Energy. Son obras que dan continuidade ás acometidas máis recientemente nos xardíns da praza Roxa e na praza de López Cortón, así como ás tamén realizadas desde hai tempo tanto no centro urbano -rúa Ezequiel López, Mariñeiro e Real- como noutros puntos da zona rural.

Os traballos de iluminación da praza de Galicia, as avenidas Area e Zumalacárregui e rúa Cuartel completáronse ademais coa instalación de puntos de luz nos pasos de peóns existentes ao longo das devanditas estradas. Forman parte dun plan municipal para dar maior visibilidade aos peóns co fin de que os automobilistas poidan percibir a presenza de persoas sobre a calzada. Este sistema xa está a funcionar en case todo o centro urbano da vila de Cedeira.