Skip to content Skip to left sidebar Skip to footer

SERVIZOS

A PRAZA ROXA PASARÁ A CHAMARSE PRAZA ARCO DA VELLA

Dentro das obras de remodelación das prazas de Cedeira, incluídas nas axudas europeas do PostNext Generation 4.1, a praza Roxa cambiará o seu nome e a cor do firme pasando a ser Praza Arco da Vella.
As obras, que xa levan dous meses de execución, comezaron o pintando do chan hoxe mesmo. A pintura levará unha capa de resina por riba, extraída dos piñeiros máis europeos que atopemos na Capelada, resaltando así o compromiso cos fondos que promoven esta obra.
Unha vez rematada, esperamos que antes do entroido, comezará a remodelación da praza do peixe que pasará a ser a rotonda menudo peixe! coa colocación dunha escultura dunha merluza de 15 metros de altura no seu centro con iluminación de leds, un millón, e que se acenderá cada nadal.

O CONCELLO INVISTE MÁIS DE 61.000€ NO ARRANXO DAS FACHADAS E O TELLADO DA AMPLIACIÓN DA ESCOLA INFANTIL

Dous anos despois da ampliación da escola infantil municipal de Cedeira, o Concello vén de contratar obras, por valor de 61.353€, para a adecuación exterior do edificio que cedeu para dotar de novos espazos ao centro. Os traballos, tal como explicou o alcalde, Pablo Diego Moreda Gil, consisten na reparación e pintado das fachadas, así como no cambio dos ventanais, o arranxo do beirado do tellado, que mesmo presenta risco de caer, e a colocación de novos caleiros.

Tal como recordou o alcalde, Pablo Diego Moreda Gil, no ano 2019 o Concello de Cedeira colaborou co Consorcio Galego de Servizos de Igualdade e Benestar para facer posible a ampliación da escola “A galiña azul”. Daquela, a institución municipal puxo a disposición do organismo autonómico os locais necesarios, no edificio da súa titularidade contiguo á escola. As obras cinxíronse ao interior, cun presuposto de 141.000€ dos cales o Consorcio asumiu a maior parte, e permitiron incrementar o número de prazas das 58 anteriores ás 78 actuais.

Porén, quedaba pendente a adecuación do exterior do inmoble no que se executou a ampliación. Así, o Concello contratou recentemente o cambio dos seis ventanais do inmoble á empresa Proinor, por un presuposto de 11.736€ (IVE incluído). A esta obra, que aínda está por executar, súmanse agora outras intervencións necesarias. Está xa en marcha a limpeza, reparación e pintado e impermeabilización das fachadas, que realiza a empresa Agustín González Carro por un presuposto de 18.966€. Prieto Mouriz farase cargo do arranxo do beirado da cuberta, coa desmontaxe de parte das tellas e o formigonado das cornixas, por 24.891€, e Canalones Valdoviño renovará os caleiros por 2.347€.A todo isto súmase a instalación das estadas precisas para o desenvolvemento dos traballos, que fixo Alquileres F-3 por 3.412€.

O alcalde, Pablo Diego Moreda Gil, recordou que o goberno local está á espera de poder reunirse coa conselleira de Política Social, Fabiola García, para abordar a construción dun Centro de Día en Cedeira. O goberno local ten o proxecto de facelo realidade nunha parcela de titularidade municipal, próxima á antiga estación de autobuses. “É unha demanda moi necesaria, para Cedeira e tamén para outros municipios da zona, que temos que impulsar a través dun acordo de cofinanciación”, explicou Moreda.

O GOBERNO CENTRAL ADXUDICOU O PLAN DE BANDA ANCHA PARA O RURAL QUE BENEFICIARÁ AO MUNICIPIO DE CEDEIRA

O Concello de Cedeira celebra que o municipio estea entre os máis de 4.500 en España nos que se vai estender a banda ancha de moi alta velocidade, tal como fixo público hai poucos días o Ministerio de Asuntos Económicos e Transformación Dixital coa resolución definitiva do Programa de Universalización de Infraestruturas Dixitais para a Cohesión (UNICO). O alcalde, Pablo Diego Moreda Gil, comentou que a pandemia puxo de relevo unha vez máis a desvantaxe das zonas rurais canto á cobertura de internet se refire e eloxiou que este asunto sexa precisamente unha prioridade do Plan de Recuperación do Goberno central.

Tal como se informou no seu momento, en xuño pasado o Concello de Cedeira consultou á veciñanza e trasladou ao Ministerio información detallada sobre algúns puntos con baixa conectividade, que se sumaron aos que xa estaban localizados no municipio, precisamente para que se incluíran neste programa. Agora, o Ministerio acaba de publicar unha resolución na que se adxudica a tres operadores a despregadura da banda ancha en puntos con baixa cobertura de 4.516 municipios en España.

A maioría deses puntos son “zonas brancas”, é dicir, que contan con menos de 30 Mbps (megabit por segundo), e o resto son “grises”, aquelas que non chegan aos 100Mbps. O desenvolvemento das novas infraestruturas garantirá unha velocidade superior aos 100 megabits por segundo. As operadoras adxudicatarias dos 52 proxectos que se van desenvolver en toda España van investir 479.456.480 euros e recibirán axudas por valor de 249.930.122 euros do Goberno.

O despregamento nos puntos de baixa cobertura de Cedeira correrá a cargo de Telefónica, dentro do proxecto adxudicado para a provincia da Coruña, no que está previsto investir 4.469.994 euros, dos que o 78% será custeado coas axudas públicas.

Moreda Gil celebrou a boa nova e subliñou que unha rápida conexión de internet é un factor que contribuirá a atraer poboación e ofrecerá novas oportunidades para a formación e para o traballo dos veciños e veciñas da zona, sen que residir nunha zona rural teña que constituír unha marxinación neste sentido.