SERVIZOS

CEDEIRA DÓTASE DUNHA ORDENANZA REGULADORA DA TAXA DE RETIRADA DE VEHÍCULOS DA VÍA PÚBLICA

O pleno da corporación cedeiresa aprobou na súa última reunión a proposta da nova ordenanza que vai regular, por primeira vez no Concello, a taxa a cobrar pola inmobilización, retirada, depósito e custodia de vehículos. Tal como expón o texto, que agora deberá someterse a exposición pública antes da súa entrada en vigor, este é un servizo público de competencia local que obrigatoriamente ten que contar coa súa contraprestación económica.

Tal como explicou o alcalde, Pablo Diego Moreda Gil, o feito de non contar con esta regulación facía complicado, polos procedementos administrativos que ten que seguir o Concello, contratar o servizo de guindastre cando hai que retirar vehículos que están estacionados diante dalgún vado e impiden a saída e a entrada, ou ben en eventos festivos ou deportivos que fan necesario despexar a calzada. “A ordenanza dótanos dunha ferramenta importante para facilitar e axilizar a retirada de coches, unha situación que a miudo é precisa e tamén urxente”, comentou Moreda.

Segundo establece a ordenanza, a taxa pola retirada será de 60€ para motocicletas e vehículos con taxa máxima autorizada inferior a 750 quilos; 90€ para turismos e vehículos con máis de 750kg e 200€ para camións, autobuses, etc. Dito importe incrementarase en 5 euros diarios, nos dous primeiros casos, ou 10 euros, para o terceiro, polo depósito e custodia.

Tamén especifica a ordenanza a taxa para a inmobilización, que será de 20€ para motos e turismos e de 30€ para camións e autobuses, cun incremento de 5 e 10€ diarios, respectivamente, por depósito e custodia.

O CONCELLO DE CEDEIRA RECIBIRÁ MÁIS DE 630.000€ DO POS+2022 E DESTINARÁ O 69% A INVESTIMENTOS

O pleno da corporación de Cedeira aprobou na súa última sesión, cos votos a favor do PSdeG e o PP e a abstención do BNG, a proposta do goberno local para a participación do municipio no Plan Único de Concellos da Deputación da Coruña (POS+2022). En total, Cedeira contará no seu orzamento con 638.729,85€ procedentes do programa provincial, dos que 195.022,57€ serán para cubrir gastos correntes e os restantes 443.707,28€ se destinarán a investimentos. Xunto con esta proposta tamén saiu adiante, por unanimidade, a do POS+Adicional para gastos sociais extraordinarios, que supón unha achega de 68.257€.

Así, o Concello consignou no POS de Obras dous proxectos por valor de 178.512,97€ con cargo ás achegas provinciais 2021 e 2022, aos que se suman outros valorados en 265.194,31€ que van no Plan Complementario. Os primeros son a ampliación da rede de saneamento nas Pontigas, por un importe de 99.963,73€, e a construción dunha senda peonil e ampliación da calzada en Cordobelas, orzamentado en 80.995,03€ dos que o Concello asumirá poco máis dun 3% (2.445,79€).

Tamén incorporou o goberno local, na mesma proposta, catro proxectos para o Plan Complementario 2022, que ten carácter “supletorio” e que se vai dotando en función dos créditos dispoñibles por parte da administración provincial. Están nesta relación a cubrición do parque infantil da praza Floreal (70.730,88€); a mellora do firme e da rede de pluviais nas rúas Viveiro e Cerdido (41.951,62€); as obras de mellora do firme e a rede de saneamento da rúa María Mediadora (67.845,69€) e a renovación do alumbrado público nas avenidas Area e Castelao (84.666,12€).

Na mesma sesión plenaria aprobouse tamén, neste caso por unanimidade, a participación no POS+Adicional para gastos sociais extraordinarios. Cedeira vai recibir unha achega de 68.257,90€ para o reforzo de persoal asignado aos Servizos Sociais, a adquisición de equipamento que será cedido ás persoas usuarias e outros investimentos.

O CONCELLO PROXECTA RECUPERAR DOUS LAVADOIROS SITUADOS EN MONTOXO E PIÑEIRO

O Concello de Cedeira vén de presentar unha solicitude ao programa de axudas para a corrección de impactos paisaxísticos, da Xunta de Galicia, coa finalidade de impulsar a recuperación de dous lavadoiros situados nas parroquias de San Xulián de Montoxo e San Cosme de Piñeiro. O alcalde, Pablo Diego Moreda Gil, explicou que a execución deste proxecto ten un orzamento de 27.511,93€ e que a subvención solicitada cubriría o 70%. “Temos o empeño de seguir adiante co noso programa de recuperación de fontes e lavadoiros, elementos singulares da nosa arquitectura aos que está ligada a historia cotiá dos nosos veciños e veciñas”, comentou o rexedor local.

Neste caso trátase de rehabilitar e acondicionar o lavadoiro de Penela, no lugar de Muruxás (San Xulián de Montoxo), e o do Peneiro, no Beco (San Cosme de Piñeiro). Ambas as dúas estruturas son de formigón e están moi deterioradas, incluso con danos que cómpre corrixir para garantir a seguridade das persoas usuarias.

Os traballos, nos dous casos, van consistir na limpeza da vexetación e os paramentos, pavimentos e os propios lavadoiros, que presentan fendas e outros desperfectos. O lavadoiro do Peneiro ten unha cuberta de placas de fibrocemento, que se vai cubrir con tella do país, mentres que o do Peneiro ten un teito de formigón e lousa moi deteriorado que vai ser preciso picar para ver o estado da armadura para sustituila ou reparala. A obra incluirá tamén nas dúas fontes o cambio dos caños e a renovación dos morteiros, así como a colocación dun chapado de pedras irregulares do país no conxunto de Muruxás.

Estas dúas novas fontes rehabilitadas sumaranse ás da Barca, das Saíñas, Fernando Lago, do Areal, de Vilar e de Vila do Río, que tamén foron xa recuperadas nos últimos anos polo goberno local. Todas tiñan en común o abandono no que caeran nas últimas décadas, ainda que algunha seguía a ser utilizadas pola veciñanza. É o caso do lavadoiro da Penela, un elemento que ten a día de hoxe moita importancia na vida veciñal da parroquia de San Xulián de Montoxo.