Skip to content Skip to left sidebar Skip to footer

SERVIZOS

O CONCELLO ENVÍA Á DEPUTACIÓN O PROXECTO TÉCNICO PARA A SUBSTITUCIÓN DO PAVIMENTO DO POLIDEPORTIVO

O pleno da corporación de Cedeira aprobou na súa última sesión o proxecto técnico para a substitución do pavimento do polideportivo municipal e a colocación dun novo marcador, despois de subsanar unhas cuestións requiridas polo Servizo de Contratación da Deputación da Coruña. Avanza así a tramitación para a sinatura dun convenio a través do cal a institución provincial vai financiar o 80% do custo da intervención, valorada en 187.201€. O alcalde, Pablo Diego Moreda Gil, destacou que o seu equipo leva traballando desde hai anos para facer realidade estas obras, que van mellorar considerablemente a calidade do pavimento da cancha no pavillón. “Afortunadamente temos un concello cunha grande actividade deportiva, o que fai que esta instalación teña un uso intensivo ao longo de todo o ano, e de aí que os beneficios da mellora vaian repercutir en moita xente”, comentou.

O proxecto técnico contempla a substitución do solo de madeira da cancha deportiva, que ten unha superficie de 1.211 metros cadrados, así como das zonas anexas, tamén empregadas para o desenvolvemento de actividades, que teñen pavimento de linóleo e suman outros 165 metros cadrados. O actual chan está formado por parquet cruzado deportivo de 25mm, que está directamente colocado sobre o formigón, sen capa de impermeabilización. Están especialmente danadas, ou xa non existen, as madeiras das zonas de unión co linóleo.

As obras prevén a colocación de tablas de madeira maciza de 22mm sobre rastreis de madeira laminada, cun conxunto de tiras de goma por debaixo que están especialmente deseñadas para este tipo de uso e que evitan a deformación do solo e melloran a absorción dos impactos. Fóra da cancha instalarase un pavimento sintético, cunha capa de impermeabilización. O proxecto contempla tamén unha mellor solución para as liñas de unión entre os dous tipos de chan.

Na intervención está incluída tamén a dotación dun novo marcador que servirá mellor para todos os deportes que se practican na cancha e ás súas actuais normativas.

A ESCOLA INFANTIL DE CEDEIRA LOCE XA UN EXTERIOR ARRANXADO E UNIFORME TRAS AS ÚLTIMAS OBRAS

A escola infantil de Cedeira loce xa co seu exterior arranxado e uniforme despois das obras que realizou o Concello no edificio da ampliación. A administración municipal investiu máis de 61.000€ nos traballos de reparación e pintado das fachadas, no cambio dos ventanais e o arranxo do beirado do tellado. O goberno local amósase satisfeito co resultado da intervención neste edificio, que acollía antigamente o colexio de Santa María do Mar e ao que se ten especial cariño na vila, e destacan que o centro presenta un aspecto moi alegre, pola estética do propio inmoble e tamén polo mural que adorna o peche, obra do artista local Adrián Taracido e parte do programa de arte urbano que puxo en marcha nos últimos anos o Concello.

Cómpre recordar que a ampliación da escola da rede A Galiña Azul en Cedeira levouse a cabo hai dous anos e permitiu pasar de 58 a 78 prazas para nenos e nenas de cero a tres anos. O centro ocupaba antes un dos dous inmobles xemelgos que formaban o colexio de Santa María do Mar e o Concello cedeu o segundo para levar adiante o proxecto. Daquela acometeuse a adecuación interior do inmoble cun investimento de máis de 141.000€ que asumiu o Consorcio Galego de Servizos de Igualdade e Benestar coa colaboración municipal, que custeou unha terceira parte da actuación. Estaba pendente a adecuación do exterior do inmoble, para resolver as deficiencias que presentaba e tamén para facer uniforme, co edificio anexo, o aspecto do centro.

Os traballos consistiron no cambio de seis ventanais, a limpeza, reparación, pintado e impermeabilización das fachadas e no arranxo do tellado. Concretamente, esta última parte da obra consistiu na desmontaxe de parte das tellas e o formigonado das cornixas, nas que tamén se instalaron novos caleiros.

O ALCALDE SOLICITA Á XUNTA QUE INICIE OS ESTUDOS PREVIOS PARA A MELLORA DA AC-566 NA ZONA DE LANDEIRA

O alcalde de Cedeira, Pablo Diego Moreda Gil, e a concelleira Carmela Prieto reuníronse recentemente coa conselleira de Infraestruturas, Ethel Vázquez, para falar do avance nas obras de mellora do trazado da estrada AC-566. No encontro, que tivo lugar no Edificio Administrativo de Monelos, na Coruña, o rexedor local expresou a satisfacción do goberno municipal polo bo ritmo destes traballos e a minimización das molestias para o tráfico rodado, ao tempo que reclamou que se inicien os estudos previos para acometer a mellora do tramo das curvas de Landeira.

As obras que está a executar a Consellería afectan a catro quilómetros desta estrada que une Valdoviño e Cedeira, concretamente desde a saída do primeiro dos concellos ata a zona da Ramalleira. A intervención supón o ensanchamento da calzada nalgúns tramos para incorporar un terceiro carril e a rectificación das curvas máis pronunciadas e perigosas. Moreda Gil recoñeceu a importancia deste proxecto, longamente demandado, pero solicitou tamén que o departamento de Ethel Vázquez comece os estudos previos para facer posible unha intervención similar no tramo de Landeira, que abrangue un percorrido de algo máis de dous quilómetros nos que se suceden 25 curvas. “Sabemos que a definición e posta en marcha dunha obra deste estilo leva anos, e comprendemos que son moitas as zonas de Galicia que teñen necesidade de mellorar as súas infraestruturas viairas, porén, cómpre comezar os estudos previos para que a mellora sexa realidade nun prazo razoable”, explicou Moreda.

Xunto con esta demanda, o alcalde de Cedeira solicitou á conselleira outra intervención, esta con carácter máis inmediato, para arranxar a AC-566 no seu último tramo, no que discorre pola entrada á vila ata a rotonda da praza de Galicia. Segundo explicou, a calzada precisa unha nova capa de aglomerado e o novo pintado da sinalización horizontal, xa que se atopa en mal estado. É unha zona, recordou, que ten moita intensidade de tráfico, especialmente no verán.