Skip to content Skip to left sidebar Skip to footer

SERVICIOS SOCIAIS

Pablo Moreda propuxo a Fabiola García a sinatura dun convenio para construír o centro de día

A conselleira de Política Social, Fabiola García Martínez, visitou onte a vila de Cedeira para comprobar o resultado da obra de ampliación da escola infantil, un proxecto financiado entre a Xunta de Galicia e o Concello no que foron investidos un total de 141.000 euros. García Martínez estivo acompañada do xerente do Consorcio Galego de Servizos de Igualdade e Benestar, Perfecto Rodríguez.

O alcalde, Pablo Moreda Gil -acompañado polos concelleiros de Turismo, Carmela Prieto Cal; de Facenda e Servizos Económicos, Ocio e Tempo Libre, Manuel Martínez López, e de Cultura, Ermitas García- recibiu na escola infantil a titular de Política Social coa que, posteriormente, percorreu unhas instalacións nas que a diario acollen 49 nenos e nenas e ás que no mes de febreiro se incorporarán oito máis. O número de traballadoras ascende a 12.

Pablo Moreda aproveitou este encontro coa titular da Consellería de Política Social para darlle a coñecer o proxecto de nova construción dun centro de día que“cubra as necesidades dos veciños e veciñas de máis idade”, segundo apuntou o rexedor municipal.

Trátase dunha iniciativa que o goberno de Cedeira proxecta para acoller entre 25 ou 30 dependentes nun edificio dunha única planta situado nunha parcela municipal localizada na zona da antiga estación de autobuses. Dúas salas de rehabilitación, unha cociña, un almacén e un gran salón comedor son algúns servizos que incluirá o centro de día, que o goberno municipal considera prioritario para atender os 120 dependentes que existen en Cedeira e os doutros municipios limítrofes.

O alcalde falou da posibilidade de asumir unha parte da realización da obra, para o que propuxo a firma dun convenio, e tamén de buscar outras posibles axudas supramunicipais para garantir a execución dun proxecto que no seu día suscitou a recollida masiva de sinaturas, foron máis de 2.500, e para o que existe unha total unanimidade por parte de todas as formas políticas representadas na corporación. De feito, o goberno ten previsto invitar o resto dos grupos a participar na realización da proposta que no seu momento será remitida á Xunta de Galicia.

Pablo Moreda, que invitou a Fabiola García a asinar no libro de ouro do Concello, agradeceu a súa presenza no municipio e acordou con ela seguir en contacto para ver de que xeito se pode levar a cabo a realización do centro de día, para o que a conselleira de Política Social tamén se mostrou partidaria de buscar a colaboración económica da Deputación da Coruña.

Cedeira convoca á veciñanza a unha concentración con motivo do 25 n

O Concello de Cedeira fai un chamamento ao conxunto da poboación local a participar o próximo luns na concentración que, con motivo do 25 N, se celebrará a partir das 12.00 horas na praza do Concello.

Ademais, pídeselles aos asistentes que acudan vestindo de negro, como símbolo de loito e de loita ante todo tipo de violencia contra as mulleres.

O acto consistirá na lectura participativa dun manifesto, nun minuto de silencio polas vítimas e rematará cunha actuación musical.

Todo o conxunto da corporación municipal considera necesario darlle visibilidade á loita contra a violencia machista como método de denuncia e reivindicación do conxunto da sociedade ante unha lacra que só este ano acabou coa vida de 50 mulleres e coa de máis de 1.000 desde que no 2003 comezaron a contabilizarse.

 

Cedeira compra 7 camas xeriátricas máis para mellorar a atención dos usuarios do servizo de axuda no fogar

O Concello de Cedeira acaba de adquirir sete novas camas xeriátricas para “dar unha prestación de calidade aos usuarios do Servizo de Atención de Axuda no Fogar, atendendo as necesidades particulares de cada un”, segundo se pon de manifesto desde o executivo local.

O investimento ascendeu a 9.500 euros (IVE incluído) e Coloro SL foi a empresa subministradora da totalidade das unidades: catro de 105 por 190 centímetros e tres de 90 por 190.

A concelleira de Servizos Sociais e Igualdade, Magdalena Pérez Villar, apuntou que con estas novas incorporacións serán un total de 17 camas as que estarán ao servizo daquelas persoas que as necesitan pero que non dispoñen de recursos para adquirilas.

Pérez Villar sinalou que coa entrada destas novas unidades “conseguiremos unha mobilidade moito mellor e facilitaremos o traballo das empregadas do servizo para que poidan prestar unha correcta atención no seu traballo diario.”