SERVICIOS SOCIAIS

O CONCELLO DE CEDEIRA CONCEDE AXUDAS POR VALOR DE 36.000€ ENTRE OITO ENTIDADES SOCIOCULTURAIS DA VILA

A Xunta de Goberno do Concello de Cedeira acaba de resolver a convocatoria de subvencións para as entidades socioculturais do municipio, nos seus dous apartados de actividades e investimentos. Segundo informou o alcalde, Pablo Diego Moreda Gil, as axudas repartidas esgotan na súa totalidade o orzamento previsto, de 36.000€, unha circunstancia “que é unha satisfacción, porque denota que o tecido asociativo recupera folgos despois dun ano moi complicado e que volve a promover actividades que darán vida e animación á veciñanza”.

A convocatoria reservaba 30.000 euros para actividades e 6.000 para investimentos en material inventariable das asociacións. Oito entidades da vila repártense os fondos, que se adxudicaron polo sistema de concurrencia competitiva.

Na primeira destas categorías, a de actividades, as entidades beneficiarias son as seguintes:

Sociedade Artística Eixil: 5019,61€
Asociación de Veciños Cervo Tarroiba: 5521,57€
Asociación de Mulleres Vila de Cedeira: 5333,33€
Asociación de Veciños e Amigos de San Román: 5333,33€
Asociación Acordeóns de Cedeira: 4400€
Asociación Cultural Discalzos polo Festival: 4392,16€

Na segunda categoría, adicada a investimentos, o reparto de axudas foi a que sigue:

Sociedade Artística Eixil: 795,17€
AVV Cervo Tarroiba: 931,48€
Asociación As Aturuxeiras: 681,57€
Asociación de Mulleres Vila de Cedeira: 851,96€
Asociación cultural Rondalla de Cedeira 679,00€
Asociación de Veciños San Román: 942,84€
Asociación cultural Buxainas: 567,98€
Asociación Acordeóns de Cedeira: 550,00€

O CONCELLO REPARTIRÁ 70.000€ ENTRE OS NEGOCIOS DA LOCALIDADE PARA MINIMIZAR O EFECTO DA COVID

A Xunta de Goberno do Concello de Cedeira acaba de aprobar a convocatoria dunha nova liña de axudas dotada con 70.000€ e dirixida a paliar as perdas que a pandemia provocou ás pequenas empresas e autónomos da localidade. Tal como informou o alcalde, Pablo Diego Moreda Gil, é un novo programa financiado ao 100% con fondos municipais cuxo obxectivo é “que ningún negocio local quede sen apoio, é dicir, garantir que aqueles que non obtiveron o respaldo do PEL Reactiva conten desta volta con axuda para remontar a difícil situación que atravesaron e que aínda teñen que enfrontar”. Segundo explicou, a convocatoria foi consensuada coa oposición, á que agradeceu o seu respaldo no tema.

As axudas van destinadas a traballadores/as autónomos/as con ou sen empregados e pequenas empresas que teñan en Cedeira o seu domicilio fiscal ou un local de negocio. Quedarán excluidas nesta ocasión as empresas que constituiron o obxecto de financiación do programa PEL Reactiva – hostalería e axencias de viaxes-.

As bases establecen axudas de 1.000, 1.250 e 1.500€ para as persoas autónomas sen traballadores ao seu cargo; para os autónomos ou empresas con entre un e cinco empregados e para os autónomos ou empresas con máis de cinco traballadores, respectivamente. Porén, a convocatoria establece que se esgotará o crédito dispoñible, de 70.000€, entre todas as solicitudes que cumpran os requisitos e que, no seu caso, ratearanse os fondos proporcionalmente para garantir que todos reciben unha axuda.

As subvencións servirán para financiar gastos estruturais e de funcionamento correntes vencellados ao mantemento da actividade no período comprendido entre o 1 de xaneiro e o 31 de decembro de 2021, ben sexan de aluguer de local ou vehículos de empresa, pago de hipoteca da sede da empresa, dixitalización do negocio, nóminas de traballadores, cotas da Seguridade Social, subministracións de materias primas, servizos profesionais, seguros, facturas de luz, electricidade ou gas, etc.

Segundo informou o alcalde, as bases serán publicadas en breve no Boletín Oficial da Provincia e a continuación abrirase o prazo dun mes para presentar as solicitudes. Moreda recordou que no ano 2020 o Concello de Cedeira convertiuse no primeiro da zona en artellar con fondos propios un programa de axudas para os negocios locais e subliñou que esta nova liña de axudas vén completar e complementar aquel programa e o do PEL-Reactiva, que se convocara posteriormente.

Así, o Concello de Cedeira eleva a máis de 170.000 euros os fondos municipais destinados a paliar as consecuencias da covid na economía local. Así, na convocatoria exclusivamente municipal repartíronse 76.750€ entre 112 microempresas e autónomos de Cedeira e na do PEL Reactiva pagáronse 62 axudas por un importe total de 135.324,46€, do que a Deputación custeou o 80% e o Concello, o 20% restante.

O CONCELLO E FEGADACE ORGANIZAN UNHA CHARLA INFORMATIVA SOBRE O DANO CEREBRAL ADQUIRIDO

O Auditorio de Cedeira acollerá este mércores, día 26, ás 18.00 horas, unha charla informativa sobre “O dano cerebral adquirido”. Trátase dunha actividade que organiza o Concello coa colaboración da Fegadace (Federación Galega de Dano Cerebral) e que ten o obxectivo de ofrecer orientación e axuda ás familias de persoas cunha discapacidade consecuencia dun accidente cerebral. En Galicia hai máis de 35.000 persoas con este problema e o 78% dos casos foi provocado por un ictus.

A charla correrá a cargo dunha traballadora social de Fegadace e tratará sobre as causas do dano celebral adquirido –a maior parte das veces o ictus e tamén os traumatismos por accidentes de tráfico-. A relatora ofrecerá tamén consellos para a prevención naqueles casos nos que é posible e ofrecerá pautas útiles para o coidado e a rehabilitación das persoas afectadas. Compartirá tamén o contacto e os recursos que que familiares e amigos das persoas afectadas poden atopar a través da Federación e a súa referencia máis próxima, a Asociación de Dano Cerebral da Coruña (Adaceco).

A actividade conta co financiamento da Consellería de Política Social, dentro dos programas con cargo á asignación tributaria do 0,7% do IRPF; é dicir, grazas ás persoas que marcan a X Solidaria na súa declaración da renda.