NOVAS

O AUTODITORIO DE CEDEIRA ACOLLE ESTE SÁBADO A OBRA DE TEATRO “ESAS COUSAS MARABILLOSAS”

O Auditorio de Cedeira acolle este sábado ás 20.30 horas a representación de “Esas cousas marabillosas”, o tenro e emocionante relato dun neno que afronta o intento de suicidio da súa nai reunindo nunha lista todas as razóns polas que paga a pena vivir. O actor Elisardo de la Cruz e Empatía Teatro producen esta obra con texto do dramaturgo inglés Duncan MacMillan. As persoas interesadas poden reservar as súas localidades anticipadamente enviando unha mensaxe por whatsapp ao número 649 87 66 14. O prezo é de 2,5€.

Elisardo de la Cruz estreou a obra o pasado ano no Festival Internacional do Monólogo “Singular” do Padroado da Cultura de Narón e desde aquela máis de duas mil persoas teñen visto “Esas cousas marabillosas”, con cheos na Coruña, Boiro e Carballo.

O texto que escribiu Duncan MacMillan hai unha década, e que se mantivo en escea coas entradas esgotadas durante tres anos no Festival de Edimburgo, está hoxe de total actualidade polo preocupante aumento dos casos de suicidio, especialmente entre adolescentes. “Esas cousas marabillosas” é un monólogo que se vai construíndo coa participación do público e que trata o tema dunha maneira natural e humana, con toques de humor e cunha visión esperanzadora.

Tamén o mesmo sábado, o establecemento O’Peirao acollerá a presentación do libro “Me llamaré Silver Stardust”, que Nuria Martínez Deaño (Madrid, 1971) terminou de escribir en Cedeira, localidade na que reside desde a pandemia. Esta editora, tradutora e xornalista, filla e neta de galegos, atopou na vila a tranquilidade necesaria para sacar adiante a súa primeira novela, que xa ten recibido o aplauso de Rosa Montero –considerouna unha obra “tensa, afiada e estremecedora”-.

“Me llamaré Silver Stardust” é a historia dun yonqui que deambula polo Madrid dos anos 90 en busca de redención, a través do cal coñecemos a España dos 70 e os 80 e a fenda xeracional que marcou a relación entre pais e fillos naqueles anos posteriores ao franquismo.

A CORPORACIÓN CEDEIRESA RECLAMOU IGUALDADE REAL NO ACTO INSTITUCIONAL CELEBRADO ESTA MAÑÁ POLO 8M

A corporación de Cedeira participou esta mañá la lectura dun manifesto institucional polo Día da Muller, no que se recordou a loita do feminismo ao longo da historia e se recordou que hoxe en día perviven a fenda salarial, o teito de cristal e as violencias machistas, “exemplos do longo percorrido que aínda nos queda por facer socialmente e tamén institucionalmente”.

No texto ao que deron lectura por quendas os representantes de todas as formacións políticas con presencia na corporación quedou patente a loita de tantas mulleres esquecidas e invisibilizadas para gañar a igualdade no espazo público e tamén no privado. Neste último, recordaba o manifesto que o actual sistema de benestar “construiuse sobre o traballo de mulleres en situación de desigualdade e falta de recoñecemento económico e social” que desenvolveron tradicionalmente os coidados dentro do eido familiar.

“Reivindicamos o dereito das mulleres a participar en todos e cada un dos eidos da vida social e desempeñar calquera profesión ou actividade, a necesidade de crear espazos sen discriminación e a fin de contas, de acadar na nosa sociedade unha situación de igualdade real, sen violencias e sen discriminación”, proclamou a corporación a través do manifesto. O acto institucional, que se celebrou este mediodía na praza da Reitoral, rematou cun pequeno recital do grupo da Escola de Música de Cedeira. Os actos organizados polo Concello de Cedeira con motivo do 8M continúan este venres, día 10, coa entrega do premio “Muller da Vila”, que cada ano concede a Asociación Mulleres da Vila. Nesta ocasión, o acto será ás 19.00 horas no Auditorio e o recoñecemento irá ao equipo de fútbol feminino Discalzas SD.

O programa rematará o vindeiro día 17 de marzo, data na que está prevista a proxección, no Auditorio Municipal, do traballo “Diversas mulleres, mulleres diversas”. É un audiovisual realizado polo equipo Faro de Igualdade do IES Punta Candieira.

UN MURAL CHEO DE COR E DE ACTIVIDADE DECORA A FACHADA DO POLIDEPORTIVO MUNICIPAL DE CEDEIRA

Un mural adorna desde hai pouco a fachada exterior do Polideportivo Municipal de Cedeira. O goberno local confioulle ao artista multidisciplinar Carlos García Romero esta nova obra de street art, que consonte coa actividade deportiva que se desenvolve no interior do edificio e tamén noutros espazos da vila, retrata a xente practicando diferentes disciplinas como atletismo, fútbol, remo, ximnasia rítmica, natación, etc.

O alcalde, Pablo Diego Moreda Gil, destacou que o traballo mellora moito o aspecto do edificio, cambiando o anterior formigón gris por unha parede chea de cor “que conecta coa intensa vida deportiva de Cedeira”. Adiantou tamén o rexedor local que en breve vai pintarse outra obra de street art no muro lateral do novo espazo público creado a carón do Pazo Moscoso. “Vai ser un mural sobre o Xeoparque, financiado con fondos do proxecto”, explicou Moreda Gil, que tamén explicou que haberá unha obra alusiva ao mesmo tema en cada un dos concellos implicados.

O Concello investiu 4.961€ (IVE incluído) nesta nova peza do museo ao aire libre que leva anos promovendo para embelecer diferentes puntos da vila. Confioulle esta nova creación ao autor da pintura “As mulleres do mar”, que decora a parede cega dun edificio de cinco alturas na rúa Cariño. Carlos García Romero plasmou nesta ocasión diversas actividades deportivas cun fondo moi acuático, que recrea o vaso dunha piscina e que tamén nun punto do mural reproduce a paisaxe da praia da Madalena. Xunto ás crianzas que nadan e as persoas adultas que practican diferentes deportes, o pintor reservou un espazo para uns ratos moi simpáticos que tamén se afanan por remar, bucear ou xogar coa pelota. En total, o mural cubre os máis de 50 metros de lonxitude da fachada principal do Polideportivo, na Avenida España.

A anterior incorporación ao museo de street art de Cedeira, “As mulleres do mar”, foi o resultado do concurso que convocou o Concello de Cedeira para animar a particulares ou comunidades de veciños a adornar os seus muros. Daquela os propietarios do edificio de cinco plantas no número 5 da rúa Cariño presentaron o seu proxecto, no marco de dita convocatoria, e contaron tamén con Carlos García Romero para a execución.

Nas rúas de Cedeira están tamén a obra adicada a Rosalía de Castro no exterior da biblioteca municipal, que asinou Agustín González; os coloristas murais de Adrián Taracido no exterior da estación de bombeo e nos peches da escola infantil A Galiña Azul e do CEIP Nicolás do Río. Leandro Lamas encargouse de adornar os baixos da Ponte Nova e Laura Recio fixo a pintura adicada ao Samaín na rúa da Cruz. Xunto con estas obras, tamén promoveu o Concello o mural participativo sobre a igualdade que fixeron alumnos e alumnas do IES Punta Candieira, nunha parede situada preto do centro, así como o que fixo Luis Davila, o coñecido creador das tiras cómicas O Bichero.