NOVAS

CEDEIRA ENCARA OUTRA BULIDEIRA FIN DE SEMANA, COA FESTA DO PERCEBE E OUTRAS MOITAS ACTIVIDADES

O municipio de Cedeira encara unha nova fin de semana chea de actividade. Sen dúbida, a Festa do Percebe que organiza a Confraría de Pescadores da localidade co apoio do Concello vai ser un forte atractivo, que sumado a outras citas musicais e deportivas van levar a miles de persoas ata a localidade entre o venres e o sábado. Así, xunto ao evento gastronómico desenvolverase o festival Discalz@s, o Certame de Bandas de Música, a proba do Circuito Nacional de Volei Praia e a Travesía a Nado Ría de Cedeira.

O mercado determinará máis preto do venres os prezos aos que finalmente se servirán os percebes e o resto das viandas que o público poderá degustar o sábado e o domingo nesta vixésima Festa do Percebe de Cedeira. Como en anos anteriores, a Confraría ten previsto despachar arredor de 500 kilos de percebe e outros tantos de polbo, preparado á feira. Tamén haberá empanadas de berberecho e liscos. Instalarase unha gran carpa no peirao e as racións serviranse ininterrompidamente desde as 12.00 ata as 17.00 horas tanto o sábado como o domingo. Como é tamén habitual haberá unas billeteiras nas que o público poderá retirar os tíckets.

Discalz@s polo Festival e Certame de Bandas
O veterán evento musical Discalz@s polo Festival celebra este sábado unha nova edición na praza do Floreal , con entrada gratuíta. Haberá sesión vermú e actuacións nocturnas, a primeira a partir das 12.45h a cargo de Pastelón de Ferreñas e Quinkillada. Inlogic abrirá os concertos da noite a partir das 22.00h, dando paso despois a Fillas de Cassandra, Familia Caamagno e TanDuB, nunha noite que promete prolongarse máis aló das tres da mañá. O festival misturará un ano máis diferentes estilos e propostas musicais nun ambiente case familiar.

Outra cita coa música de esta fin de semana é o XX Certame de Bandas de Música “Vila de Cedeira”. O evento desenvolverase o domingo, a partir das 18.30h, no parque de Floreal. As bandas de Visantoña (Santiso, A Coruña) e Lourenzá (Lugo) actuarán xunto coa anfitroa, a local Banda “Vila de Cedeira”, de larga traxectoria e calidade recoñecida. As formacións realizarán en primeiro lugar un pequeño desfile pola praza e as actuacións comezarán ás 19.00h.

Voley praia e travesía a nado
O areal da Madalena é desde hai días un espazo de xogo de volei Praia. Así, a pasada fin de semana desenvolvéronse as probas das categorías alevín, infantil e cadete clasificatorias para o Campionato Galego desta disciplina, coa participación de 125 xogadores e xogadoras de toda Galicia. Desde este venres día 4 ata o domingo 6 terá lugar, no mesmo espazo, unha proba de dúas estrelas do Circuíto Nacional e puntuable para o campeonato nacional. Participarán na mesma as 24 mellores parellas femininas e outras tantas masculinas, procedentes de toda España, e as probas garantirán sen dúbida un espectáculo deportivo de gran nivel para o público asistente.

Segundo explicou o concelleiro de Deportes, Suso Romero Carracelas, o Concello de Cedeira mantén un acordo co clube Aldebarán de San Sadurniño para promover o volei praia na localidade. A vila conseguiu entrar no circuito nacional –Cedeira e A Coruña son as únicas localidades en Galicia- e tamén está a desenvolver, no marco de dito acordo, un campus no que están a participar uns 60 rapaces e rapazas ao longo de toda esta semana e a vindeira. Ata o 11 de agosto están, de 09.00 a 13.00 horas, aprendendo e practicando este deporte.

Por outra banda, este domingo, 6 de agosto, a partir das 18.30 horas terá lugar a edición número 25 da Travesía a Nado Ría de Cedeira, na que participarán entre 150 e 200 persoas. Haberá cinco categorías segundo a idade (promesas, benxamíns, alevíns, infantil e absoluta), que farán un percorrido entre 50 e 1500 metros. Nas categorías absolutas os premios serán económicos para as primeiras posicións, e trofeos e medallas nas outras categorías.

As inscricións están abertas ata o mesmo día da proba. O custo é de seis euros, que aumentará a sete a partir do venres. Para anotarse é preciso chamar ou mandar Whatsapp ao 652 21 48 33 e cubrir un formulario. Participarán deportistas de gran relevancia

MERCEDES PEÓN E MONDRA TOCARÁN A VÉSPERA DA TRADICIONAL XIRA NAS FESTAS DA PATROA DE CEDEIRA

O Concello de Cedeira celebrará do 11 ao 17 de agosto as súas Festas da Patroa cun programa cheo de actividades de lecer e moita música que animará todavía máis o sempre bulideiro verán na localidade e ofrecerá diversión para todos os públicos. No cartel destacan as verbenas, que estarán amenizadas por diferentes orquestras, e o concerto que compartirán Mercedes Peón e Mondra –Martín Mondragón- na noite do 16 de agosto, véspera da tradicional Xira a San Antón de Corveiro.

O pregón das festas, que correrá a cargo de responsables da asociación Apader, abrirá oficialmente o programa o día 11 de agosto, venres, ás 20.00h. O Concello cédelle un ano máis o protagonismo ao tecido asociativo da localidade, neste caso a unha entidade que leva 45 anos de traballo a prol das persoas con discapacidade intelectual. Nesa mesma xornada do 11 de agosto terá lugar, a partir das 17.00h, unha nova edición da carreira popular, un evento deportivo e fundamentalmente lúdico ao que adoitan acudir centos de persoas de todas as idades. Tras o pregón chegará o “Entroido de Verán” á praza Roxa, na que a partir das 22.30h haberá unha festa da escuma amenizada pola disco móvil EME Music.

O 12 de agosto terá lugar a primeira verbena, a cargo da Orquestra Furia Joven. Será a partir das 23.00h na praza Roxa.

A Banda de Gaitas de Ortigueira amenizará ao día seguinte, o 13 de agosto, un pasarrúas e unha sesión vermú na praza Roxa. Pola tarde, a partir das 16.00h, desenvolveranse xogos populares no paseo da Mariña e pola noite, ás 22.30h, comezará unha nova verbena na praza Roxa, desta volta a cargo da orquestra Os Satélites.

Para o 14 de agosto o programa de festas comezará co espectáculo de rúa itinerante “A Danza dos Paxaros”, da compañía Urdime. Os grupos musicais Atenas e Galia amenizarán a noite deste luns, a partir das 22.30h na praza Roxa.

O programa para o festivo do 15 de agosto comezará coa misa cantada pola coral Virxe do Mar e unha sesión vermú na praza Roxa, a partir das 13.00h, a cargo da Banda de Música Vila de Cedeira. Pola tarde, ás 20.00h na praza Floreal, ofrecerase ao público familiar o espectáculo “Glamping” de circo e danza. Desde ese mismo lugar partirá, sobre as 21.00h, un pasarrúas da fanfarria Taquicardia. De novo pola noite haberá verbena, a partir das 22.30h, e no escenario da praza Rosa actuarán a Orquesta Fania Blanco Show e o Grupo Claxxon. O concerto deterase á medianoite para o lanzamento dos tradicionais fogos de artificio.

A misa e a procesión marítima abrirán o programa do día 16 de agosto, a partir das 11.00 horas. Pola tarde, ás 20.00h a praza Floreal volverá a acoller un espectáculo de circo e danza para o público familiar. Trátase de “Kaldi”, producida por Maintomano. A atención volverá á praza Roxa

pola noite, a partir das 23.00 horas. Subirá ao escenario Mercedes Peón, que está de xira co seu espectáculo “Ingrávida”, celebración de dúas décadas de traxectoria musical e repaso dos temas que compuxo para os seus cinco discos. E tamén actuará Mondra –o nome artístico de Martín Mondragón-, un mozo de Teo que se perfila como a nova estrela do “trad”, un xénero musical que bebe da música tradicional galega para convertila nun son actual.

O programa de festas tocará ao seu fin o 17 de agosto coa tradicional Xira en San Antón de Corveiro, unha romería que adoita ten unha afluencia masica da xente de Cedeira, visitantes e veciñanza da contorna. Pola noite, xa de volta á vila, a orquestra Foliada D’ases amenizará a última verbena, ás 22.30h na praza Roxa.

O CONCELLO PON EN MARCHA O PROGRAMA DE VERÁN “DE RUTA”

O Concello de Cedeira pon en marcha durante o mes de agosto o programa ”De Ruta” con saídas guiadas a pé polos excepcionais paisaxes do municipio. As saídas que serán os días 2, 4, 9, 23, 25, 30 de agosto, todas de balde e cun límite máximo de 15 participantes.

O programa “De Ruta” comezará o mércores 2 de agosto cun percorrido ao faro de Robaleira. Será unha saída de 8km, de dificultade baixa/media e que se realizará nunhas catro horas, con saída desde a oficina de turismo ás 10.00 da mañá. O itinerario será circular, parte del polo sendeiro que vai desde as vellas fábricas de San Isidro ao faro. Unha vez alí o grupo poderá ver a antiga cetaria, a cala Mi Señora e gozar coas vistas da ría de Cedeira. A volta realizarase polo camiño que leva da praia das Cerdeiras ao Barral. Poderase facer esta ruta tamén o mércores 30 de agosto.

Para os venres 4 e 25 de agosto, a proposta é unha ruta polos Altos de Santo André. Serán tamén 8km dunha dificultade técnica baixa/media, pero con saída desde o mirador dos Carrís ás 10.00 da mañá, e o percorrido irá pola Serra da Capelada e permitirá gozar coas vistas dos cantís de Santo André de Teixido, a Vixía de Herbeira e as rías de Ortigueira e Cedeira.

Os mércores 9 e 23 de agosto, farase un percorrido circular no entorno de Punta Candieira, cubrindo unha distancia de 9km que, se estima, levará catro horas. Saída desde a oficina de turismo ás 9.30h. Facilitarase o traslado até o inicio da ruta a todas/os as/os participantes.

As persoas interesadas teñen que realizar a súa inscrición no Polideportivo Municipal, ou ben chamando ao número 981 482 633 ou enviando un mail a polideportivocedeira@gmail.com.