NOVAS

CEDEIRA ACOLLE ESTE DOMINGO O CERTAME DE PINTURA RÁPIDA E A ESTREA DA SEGUNDA ÓPERA STUDIO

Os cabalos ceibes da Capelada que o pasado ano retratou Andrés Gabarrés ilustran neste 2023 o cartel da novena edición do Certame de Pintura Rápida Vila de Cedeira que se vai celebrar o vindeiro domingo, 27 de agosto. Como é habitual, artistas profesionais e afeccionados de dentro e fóra da comunidade galega achegaranse ata a localidade para plasmar nas súas obras, feitas como máximo en sete horas, a beleza da localidade.
Despois da edición do pasado ano, que estivo adicada á serra da Capelada coa intención de apoiar a candidatura do Xeoparque Cabo Ortegal, o certame volve neste 2023 ás ubicacións habituais. Así, pintores e pintoras buscarán os lugares para pintar polo paseo marítimo, a praia da Madalena, o paseo da Mariña, a zona do río Condomiñas, praia de Area Longa, casco vello ou o porto. As inscricións e o selado dos soportes realizarase de 09.30 a 11.00 horas no posto de turismo ubicado na rúa Ezequiel López.
Antes das 17.30 horas, as persoas participantes deberán de entregar as obras na Sala Áncora, onde o xurado terá que facer tamén unha deliberación e un fallo rápido para dalo a coñecer unha hora despois. Os premios están dotados con 800, 600 e 400€, máis o correspondente diploma cada un. É habitual que os artistas poñen á venda alí mesmo, tras a entrega dos galardóns, as obras que non resultaron premiadas.

Pódese descargar as bases na seguinte ligazón:

Descarga PDF Bases do certame de pintura rápida Vila de Cedeira 2023

O mesmo domingo terá lugar tamén a estrea da ópera “Los Elementos” de Antonio Literes, como colofón da segunda edición da Ópera Studio que se organizou este verán na vila de Cedeira. Magna Ferreira na dirección musical e Marcos Viéitez na escénica, xunto con María García Bouso como concertina, Marta López no acompañamento e Xurxo Varela, baixo continuo, encabezan un reparto formado por trinta persoas, entre cantantes –solistas e coro- e instrumentistas.
O Concello de Cedeira apoia un ano máis a Ópera Studio, unha fórmula que é pouco frecuente en Galicia pero coñecida no mundo da lírica porque combina a formación coa producción dunha ópera e que, por elo, é un camino que frecuentemente toman os novos talentos para dar o salgo desde o académico ao profesional. Como o pasado ano, elixiuse unha peza barroca, “Los Elementos”, que se representará o domingo no Auditorio Municipal. Haberá dous pases, ás seis e as nove da tarde, con entrada gratuíta que se pode reservar a través do mail cedeirart@gmail.com ou ben no mesmo Auditorio desde unha hora antes de cada función.
Rutas guiadas
Cómpre recordar que o Concello de Cedeira segue a desenvolver dous programas con saídas guiadas polas zonas urbanas e rurais do municipio. Un deles é “DeRuta”, que propón tres percorridos diferentes: un por Punta Candieira e Sarridal, outro polos Altos de Santo André e un terceiro circular que pasa polo faro de Robaleira. Hoxe día 23, o venres día 25 e o vindeiro 30 de agosto desenvolveranse as tres últimas saídas, nas que as persoas interesadas poden inscribirse de balde chamando ao número 981 48 26 33 ou ben escribindo un mail a polideportivocedeira@gmail.com.

O outro programa de percorridos a pé é “Descobre Cedeira”, no que se proponen catro itinerarios diferentes, tamén guiados. Para este xoves, día 24, está convocada unha destas saídas a Santo André de Teixido. É unha excursión de dificultade media, que se prolonga desde as 10.00 ata as 17.00h, con saída desde a igrexa de Régoa, na que as persoas participantes teñen que levar a comida. A inscrición é tamén gratuíta e pode realizarse a través da Oficina de Turismo, chamando ao 981 482 187. Neste caso, o programa “Descobre Cedeira” prolongarase durante o mes de setembro con outras sete rutas.

O CONCELLO DE CEDEIRA TEN ABERTO ATA O 20 DE SETEMBRO O PRAZO DO II CERTAME DE TEATRO AMADOR “FUSA GUILLÉN”

O Concello de Cedeira convocou recentemente a segunda edición do Certame de Teatro Afeccionado “Fusa Guillén” e as compañías poden presentar as súas solicitudes ata o día 20 de setembro. Un xurado seleccionará as tres pezas de teatro amador que se representarán no Auditorio Municipal os días 14 e 21 de outubro e o 4 de novembro, nun ciclo que un ano máis serve para homenaxear a unha muller que deixou unha fonda pegada na vida cultural da localidade e, particularmente, no impulso ao teatro.

Segundo establecen as bases, o certame está aberto exclusivamente ás compañías de teatro amador e só se admitirá unha obra por grupo. As pezas deberán ter unha duración de 50 minutos como mínimo e ser en galego. Para a selección do xurado, as compañías deberán enviar coa súa solicitude diferente material, entre o que estará un vídeo da representación completa ou dunha parte suficientemente representativa. O Concello pagará 600 euros a cada un dos tres grupos elixidos en concepto de gastos pola actuación.

Todas as representacións serán ás 20.00h e serán de entrada gratuíta.

Pódese descargar as bases na seguinte ligazón:

Descarga PDF Bases do II certame de Teatro Afeccionado “Fusa Guillén”

AS FESTAS DA PATROA EN CEDEIRA CONTINÚAN ADIANTE CON ESPECTÁCULOS PARA O PÚBLICO FAMILIAR E MOITA MÚSICA

O Concello de Cedeira segue coas súas festas da patroa despois dunha primeira fin de semana cunha elevada participación en todas as actividades, entre elas a Carreira Popular do sábado, que contou con cincocentas persoas inscritas. Na xornada de hoxe está programado un espectáculo de rúa para o público familiar, “A Danza dos Paxaros”, e unha nova verbena nocturna na que tocarán os grupos Atenas e Galia.

“A Danza dos Paxaros” é unha proposta da compañía teatral Can Cun Quinqué. Nela, un grupo de bailaríns interpretan a grandes e vistosos paxaros cabezudos, dirixidos por un ornitólogo. O espectáculo percorrerá as rúas da vila de Cedeira a partir das oito da tarde. Ás 22.30h, na praza Roxa, comezará a verbena nocturna, desta volta coa actuación de dúas orquestras. O Grupo Atenas e o Grupo Galia porán o ritmo á noite cedeiresa.
O festivo de mañá, día 15, será un día grande nas celebracións da Virxe do Mar de Cedeira. O programa principia coa misa das doce do mediodía, que será cantada pola coral Virxe do Mar. Ás 13.00h comezará a sesión vermú na praza Roxa, que estará amenizada pola Banda de Música Vila de Cedeira. Haberá tamén unha función para o público familiar na praza de Floreal, a partir das 20.00h. Sue Moreno, María Move e Mark Torrecillas protagonizan “Giamping”, un espectáculo de danza e circo no que tres amigos van compartir unas vacacións facendo campismo.

A partir das 21.00h a Fanfarria Taquicardia fará un pasarrúas que comezará na praza de Floreal e que levará a xente ata a praza Roxa, onde de novo pola noite celebrarase unha verbena. Será a partir das 22.30h, coa orquestra Fania Blanco Show e co Grupo Claxxon. O baile fará unha parada ás 00.00 horas para que o público poida gozar dos fogos de artificio que se van lanzar a esa hora. Despois retomarase a actuación.

O mércores terá lugar a procesión marítima, outra cita moi tradicional e de grande afluencia nas festas de Cedeira. Será despois da misa que está programada para as 11.00h. A praza de Floreal acollerá outro espectáculo para o público familiar, “Kaldi”, a partir das 20.00h, e pola noite, ás 23.00h, comezarán os concertos no escenario da praza Roxa. Tocarán Mercedes Peón, no marco da súa xira Ingrávidas, na que fai repaso do máis destacado da súa carreira, e Mondra, a nova estrela da “música trad”.

O xoves, día 17, Cedeira ten a súa ineludible cita coa Xira de San Antón de Corveiro. Será o gran fin de festas, co remate da verbena nocturna que amenizará, a partir das 22.30h, a orquestra Foliada D’Ases.