NOVAS

ÉXITOS DO DEPORTE CEDEIRÉS NA RECTA FINAL DA TEMPADA

Os deportistas de Cedeira despuntan en todas as disciplinas neste final de tempada. Se hai pouco falabamos dos éxitos acadados polo Natación Cedeira e o Club de Remo, cómpre subliñar tamén o traballo dos equipos locais de bádminton, pádel, fútbol ou baloncesto.

Así, as escolas de bádminton de Cedeira ten campións provinciais e clasificados para o campionato galego; o equipo feminino A de pádel é campión da terceira categoría e vai xogar a promoción de ascenso a segunda división nos vindeiros fines de semana e o equipo de veteráns de fútbol vén de proclamarse campión de liga en primeira e xogará a próxima tempada en división de honor, a máxima categoría.

Ademais, esta fin de semana celebraranse en Cedeira as semifinais e final da copa de baloncesto na categoría cadete, coa participación do equipo local, e tamén o club de fútbol feminino Discalzas vai xogar unha eliminatoria a doble partido, na localidade, para salvar a súa permanencia en segunda categoría.

Cómpre tamén felicitar á remeira Candela Martínez, que foi cuarta na final b do campionato europeo en categoría sub19 e recordar que para o vindeiro 10 de xuño Cedeira vai acoller o campionato galego de categorías inferiores de duatlón, con representación cedeiresa en todas elas.

A XUNTA COMUNICA AO CONCELLO DE CEDEIRA QUE AS AUGAS DAS SÚAS PRAIAS TEÑEN UNHA CALIDADE “EXCELENTE”

A calidade das augas nos areais da Madalena e Area Longa acadou un ano máis a consideración de “excelente” no programa de control que realiza o Servizo Galego de Saúde. As praias de Cedeira manteñen por tanto a máxima calidade para o baño, tal como sucede desde o ano 2020, cara a nova tempada estival, segundo vén de comunicar a Xunta de Galicia ao Concello de Cedeira.

O programa de control do Sergas outorgara un insuficiente ás augas destas praias nos anos 2011, 2012 e 2014 e un suficiente en 2013. Despois a situación foi mellorando paulatinamente, cun suficiente de 2015 a 2017 e un ben en 2028 e 2019.

Na notificación que fixo chegar a Dirección Xeral de Saúde Pública ao Concello de Cedeira o pasado venres indícase que a administración local está obrigada a informar e difundir a calificación das augas de baño.

A ASOCIACIÓN DE MAIORES DE CEDEIRA VOLVE CELEBRAR A SÚA TRADICIONAL FESTA DOS MAIOS

A Asociación de Maiores de Cedeira volve a celebrar este ano, despois de dous anos de ausencia pola pandemia e coa colaboración do Concello, a Festa dos Maios. Será mañá no Auditorio Municipal, a partir das 20.00 horas, e na mesma cantarán e tocarán diferentes músicos de Cedeira.

A Asociación de Maiores colocará un maio grande no centro do escenario, así como outros dous máis pequenos nos laterais. Un grupo de socias serán as primeiras en subir ao escenario para cantar, e despois virán outras actuacións de diferentes veciños e veciñas, afeccionados á música e que cantan ou tocan diferentes instrumentos. Ao rematar a festa, servirán uns pinchos no segundo piso do Auditorio.