NOVAS

Cedeira superará os 200 composteiros coa entrega de trinta novas unidades

O Concello de Cedeira, en colaboración con SOGAMA, avanza no Programa de Compostaxe Doméstico coa entrega gratuíta doutros 30 composteiros.

Sumando estes novos cos adquiridos directamente polo Concello, o goberno municipal leva xa distribuídas máis 200 unidades entre a veciñanza. Só no último ano foron 60 as familias que se incorporaron a un proxecto que botou andar hai catro anos.

Os responsables municipais animan aos veciños e veciñas a participar nunha iniciativa para a que é necesario residir no municipio, dispor, alomenos, dun pequeno xardín ou horta e tramitar o modelo de solicitude xa dispoñible na web municipal www.cedeira.gal.

DESCARGA MODELO DE SOLICITUDE/ENTREGA DE COMPOSTEIRO DOMÉSTICO

Dada a situación actual da COVID-19 e coa intención de facilitar os trámites, a solicitude pódese presentar por rexistro (de 9.00 a 14.00 horas), enviala debidamente cuberta por sede electrónica sede.cedeira.gal ou facela efectiva a través de correo electrónico correo@cedeira.gal. O prazo de presentación xa está aberto e terán prioridade aquelas familias que non teñan participado en anos anteriores.

Desde a área municipal de Medio Ambiente recórdase que os composteiros son resistentes á intemperie, fáciles de montar e de sinxelo mantemento e que, ademais, permiten un maior control das condicións idóneas para facer compost e evitan algunhas das molestias do proceso como cheiros ou roedores, entre outras. Tamén se informa de que este ano, xunto aos recipientes, o persoal técnico de SOGAMA impartirá un curso de compostaxe na casa coa intención de mellorar os coñecementos do proceso e de aclarar posibles dúbidas.

Por outra banda, se fan constar as vantaxes ambientais, económicas do compost e se valora a recuperación dun método tradicional para aproveitar residuos xerados na casa. Neste sentido, infórmase de que preto do 40% do lixo dos fogares son restos orgánicos que poden ser aproveitados para obter un abono natural rico en nutrientes.

Cedeira compra 12 guindastres ortopédicos para mellorar o servizo de axuda no fogar

O Concello de Cedeira acaba de adquirir un total de 12 guindastres ortopédicos para “proporcionar comodidade a aquelas persoas enfermas con problemas de mobilidade e facilitar así mesmo o traballo ao persoal de axuda a domicilio”, segundo apuntou o rexedor municipal, Pablo Diego Moreda Gil.

Esta acción de goberno supuxo un desembolso de 9.900 euros (IVE incluído) e o subministro do material correrá a cargo da empresa Coloro SL, adxudicataria do contrato.

Trátase duns equipos moi útiles para o traslado de enfermos con dificultades de mobilidade, xa que permiten levantar e desprazar ás persoas dependentes practicamente sen esforzo e sen facerlles dano. O seu uso tamén contribúe a mellorar a saúde e prever lesións no lombo das súas coidadoras.

Este novo material súmase ás 17 camas xeriátricas que o Concello foi adquirindo nos últimos tres anos para ceder gratuitamente ás persoas e familias que as necesitan pero que non dispoñen de recursos para adquirilas.

Desde o Concello destácase o esforzo, tanto económico como de recursos, que se está a levar a cabo para dar unha prestación de calidade aos usuarios e usuarias do Servizo de Atención de Axuda no Fogar, atendendo as necesidades individuais de cada un dos enfermos.

O peche da Escola Infantil de Cedeira transformouse nunha paisaxe mariña da man de Adrián Taracido

O Concello de Cedeira acaba de ampliar de seis a sete os murais cos que o goberno municipal quere converter a vila nun museo ao aire libre. Así, aos xa executados no auditorio, biblioteca municipal, ponte novo, estación de bombeo e colexio Nicolás del Río súmanse agora o que xa está a adornar os muros exteriores da escola infantil A Galiña Azul, concretamente os que dan á rúa Ortigueira.

Adrián Taracido Fernández é o autor desta nova obra na que están debuxados un faro, unha balea, marraxos, garzas e un cormorán, entre outros animais, sobre un fondo cheo de ondas. A pintura, do mesmo autor dos murais da estación de bombeo e do peche do colexio local, ocupa o muro ao longo duns 90 metros.

O importe desta nova intervención ascendeu a 2.117,50 euros (IVE incluído).

Fronte a fealdade urbanística, o goberno municipal de Cedeira está a apostar por “facer dos espazos públicos museos de balde sen paredes nin teiros”. O executivo local reitera que “pretendemos que o pobo sexa un escaparate do “street art” e convertilo nun recurso turístico atractivo que permita coñecer a vila desde un novo punto de vista, como un lugar máis amable para o ollo da persoa que observa e ve arte onde antes había fealdade, fomentando un espazo de relación social moito máis habitable”.

O goberno xa baralla novas intervencións de arte urbano como a que prevé levar a cabo este mesmo anos nas pistas de pádel, tal e como confirmou o rexedor municipal, Pablo Diego Moreda Gil. Neste sentido, o rexedor adiantou que se tratará dun traballo colectivo, que correrá a cargo do alumnado do IES Punta Candieira e para o que o Concello porá desde o material ata o asesoramento artístico.