NOVAS

O pleno da corporación cedeiresa aprobou na súa última sesión, cos votos a favor do PSOE e o BNG e o voto en contra do PP, unha moción na que se insta á Xunta de Galicia a crear un fondo extraordinario nos seus orzamentos para dotar aos concellos galegos de maiores recursos na loita contra o covid. A proposta, presentada polo Grupo Sociailista, establece que como mínimo dito fondo deberá contar con 100 millóns de euros para o presente 2021 e aposta polo seu reparto con criterios obxectivos entre as administracións locais.

A moción recorda que a loita contra a covid-19 levou aos concellos a asumir con fondos propios múltiples gastos de competencias impropias, como as desinfeccións dos colexios e centros de saúde ou a tramitación de expedientes sancionadores polo incumprimento das medidas de prevención. Apunta tamén que a Xunta ten aprobado varias normas que incrementan as obrigas e competencias das administracións locais “sen que en ningún caso lle teñan achegado o financiamento necesario” e subliña que, ao contrario, nos orzamentos presentados en novembro pasado polo goberno de Núñez Feijóo, redúcense os fondos para os concellos. “Todo elo a pesar de ter recibido uns fondos extraordinarios que para 2021 ascenden a 1.100 millóns de euros do Estado e da UE para combater a covid-19”.

O Grupo Parlamentario Socialista ten presentado xa unha emenda aos orzamentos galegos que pide o mesmo que a moción: que a Xunta poña en valor o traballo realizado polos concellos na loita contra a pandemia e cree un fondo extraordinario con 100 millóns de euros, como mínimo, para repartilo entre as administracións locais con criterios obxectivos.

O pleno da corporación cedeiresa aprobou unha moción na que insta á Xunta de Galicia a acordar coas deputacións e os concellos, “dende o diálogo e o respecto á autonomía local”, un plan de rescate para a hostalería e o turismo. A proposta, que foi aprobada cos votos a favor do PSOE e o BNG e coa abstención do PP, contempla que a Xunta, as deputacións e os concellos de máis de 20.000 habitantes acheguen o 1% dos seus presupostos e que o resto dos concellos aporten de xeito proporcional ao peso que teñan en cada un estes sectores.

A moción recorda que desde a Deputación da Coruña, Valentín González Formoso xa propuxo hai nove meses a creación dunha mesa de coordinación das diferentes administracións para facer frente á pandemia. Evitar duplicidades e ser máis eficientes é o obxectivo da proposta, na que se alude ao modelo alemán, onde cada medida de prevención dos contaxios leva aparellada a disposición de recursos para facer efectivas as axudas aos sectores afectados.

“As dificultades son de especial importancia entre aquelas empresas e autónomos que ven limitada a súa actividade polas restricións derivadas da pandemia”, apunta o texto da moción, que recorda que o Goberno central inxectou 224,10 millóns de euros no ano 2020 á Xunta e que acaba de anunciar o reparto doutros 441 millóns a través dos fondos europeos para a reactivación.

A situación epidemiolóxica actual “require a acción dun goberno responsable, con anticipación e prudencia o que necesariamente debe traducirse nunha revisión dos orzamentos que o 26 de xaneiro aprobou o Parlamento de Galicia, reorientando as partidas de gastos para rescatar aqueles sectores máis prexudicados”. O texto aprobado polo pleno cedeirés tacha de insuficiente o fondo de 50 millóns de euros anunciado pola Xunta para rescatar a un sector que, segundo recorda, achega o 10% do PIB da Comunidade Autónoma de Galicia.