NOVAS

O CONCELLO AFONDARÁ NA VALORIZACIÓN DO TRABALLO MARISQUEIRO CO PROXECTO “CEDEIRA MAR”

O Concello vai desenvolver o proxecto “Cedeira Mar”, no marco de acción do GALP A Mariña-Ortegal, para poñer en valor o traballo de percebeiros e mariscadoras a través de actividades de sensibilización entre escolares e público en xeral. O programa está valorado en 81.000€ e levarase a cabo desde o presente ano ata o 2022. “Queremos reivindicar o traballo das xentes do mar como un patrimonio de Cedeira, conscientes de que ten atractivo para o turismo e de que é un ben cultural en si mesmo” explicou o alcalde, Pablo Diego Moreda Gil.

O proxecto segue na liña doutros xa rematados ou que están en marcha, no mesmo marco da estratexia europea para o desenvolvemento sostible das zonas de pesca, cos que o Concello de Cedeira quere impulsar unha maior calidade diferencial dos produtos de pesca de baixura e marisqueiros, a dignificación dos oficios de mar, o relevo xeracional e a desestacionalización do turismo. É o caso dos proxectos Pescaturacción; Cedeixura -liderado pola Confraría de Pescadores, ou Emprende Pesca -que o Concello de Cedeira coordina e no que participan tamén os concellos de Valdoviño e Cariño-, os últimos dunha lista máis longa de iniciativas.

O programa de “Cedeira Mar” desenvolverase coa colaboración da Confraría de Pescadores e as súas agrupacións sectoriais, así como do CEIP Nicolás do Río e o IES Punta Candieira. O proxecto abranguerá a realización de obradoiros de sensibilización dirixidos a escolares do municipio nos que se vai destacar o papel das xentes do mar no coidado do medio, utilizando métodos de extracción sustentables na pesca de baixura e no marisqueo artesanal.

O traballo dos percebeiros e percebeiras, e mariscadoras e mariscadores, porase tamén en valor a través da creación dunhas rutas polo litoral cedeirés, nas que a través de diferentes puntos clave para o sector se vai subliñar o seu peso na economía local. Tamén se van deseñar e realizar uns paneis didácticos, que serán móbiles para empregalos en diferentes ocasións, e se vai crear unha imaxe identificativa do proxecto.

O CONCELLO PROMOVE INVESTIMENTOS POR VALOR DE CASI 295.000€ PARA A MELLORA DAS INSTALACIÓNS DEPORTIVAS

O goberno local de Cedeira ten previsto realizar varios investimentos para a mellora das instalacións deportivas municipais por valor de case 295.000€. O máis importante é o cambio do pavimento e o marcador electrónico do Polideportivo, un proxecto valorado en máis de 189.000€ e no que o Concello vai solicitar a colaboración da Deputación Provincial da Coruña. Xunto con esta intervención, estes días saíron a concurso outras dúas para pechar as pistas de pádel e cambiar o sistema de deshumectación da piscina municipal, e acaba de adxudicarse un contrato menor para cambiar varios elementos da carpintería de aluminio do campo de fútbol.

A intervención máis importante das que proximamente van afectar ás instalacións deportivas de Cedeira é a do Polideportivo Municipal, para a que o Concello está a tramitar unha subvención da Deputación da Coruña tal e como se aprobou, por unanimidade, no último pleno da corporación. O investimento ascende a 189.793,23€, dos que a administración provincial cubriría o 80%, e os traballos consistirán na substitución do pavimento e o cambio do marcador electrónico. O proxecto contempla a retirada do parquet existente, que está colocado directamente sobre o formigón sen separación nin impermeabilización, por un pavimento en madeira maciza de fresno sobre rastrel, con membrana impermeabilizante contra o formigón e os muros exteriores. En canto ao marcador, faise convinte o cambio para que resposte ás normas dos diferentes deportes que alí se practican.

O alcalde, Pablo Diego Moreda Gil, comentou que o Polideportivo Municipal “ten una ocupación practicamente total de luns a domingo, algo que é unha alegría, porque fala do arraigo que ten o deporte na nosa vila”. Segundo explicou, “estas instalacións cumpriron xa trinta anos, e a intensidade de uso fai necesaria unha posta ao día máis aló dos traballos de mantemento e mellora que cada ano afronta o Concello, como foron os arranxos nos vestiarios, o cambio da iluminación, o elevador para persoas con mobilidade reducida, a baranda nas bancadas…”.

Xunto con este proxecto, o Concello acaba de sacar a concurso as obras de peche das pistas de pádel, por un presuposto de 59.887,49€ (IVE incluído), e o cambio do sistema de deshumectación da piscina municipal, por 39.061,42€ (IVE incluído). Ambas as dúas llicitacións están publicadas na Plataforma de Contratación do Sector Público e as empresas interesadas teñen de prazo ata o vindeiro día 26 de outubro para presentar as súas ofertas.

Nas pistas de pádel, o proxecto consiste en completar o peche das dúas canchas exteriores, que contan actualmente cunha cuberta de chapa autoportante e paredes de vidro templado e malla electrosoldadada insuficientes en caso de climatoloxía adversa. A obra que se vai acometer permitirá dar uso ás instalacións ao longo de todo o ano, independientemente da choiva e o vento. Pola súa banda, na piscina municipal o investimento vai dirixido a cambiar a actual sistema de deshumectación por outro novo, dado que o seu estado faría máis costosa a reparación. O alto grao de humidade da instalación, explican desde o goberno local, fai preciso este equipamento para evitar danos estruturais ou a proliferación de mofo ou fungos.

Por último, o Concello de Cedeira acaba de contratar á Carpintería López y Villadóniga o cambio de tres portas, dúas ventás e catro barandas de aluminio no campo de fútbol municipal, por un importe de 5.313€ (IVE incluído).

RECOLLIDA DE LIXO NA PRAIA DA MADALENA

O alumnado de 1º da ESO do IES Punta Candieira, igual que onte os de 4º de primaria do CEIP Nicolás del Río, colaboraron nunha acción de recollida de lixo na Praia da Madalena para sensibilizarnos fronte a importancia do coidado do medio mariño.
Sentímonos moi orgullosos de que a nosa mocidade, desde os centros educativos da nosa vila, participen en colaboración coas mariscadoras da Confraría de Cedeira na protección e recuperación da biodiversidade dos ecosistemas mariños a través destas actividades.