NOVAS

O alcalde de Cedeira, Pablo Diego Moreda Gil, estará ata o venres en Fitur, a feira internacional de turismo que se inaugura en Madrid, para participar en diferentes actos programados pola Mancomunidade, a Deputación da Coruña e a rede de Xeoparques Españois da Unesco, promocionando tanto o municipio como o conxunto do territorio de Cabo Ortegal que vén de entrar na rede mundial.

Onte mércores, xornada inaugural de Fitur, Moreda participou ás 13.30h no acto organizado pola Mancomunidade de Municipios da Comarca de Ferrol para promocionar os espazos “petfriendly”. No stand da Xunta de Galicia.
Mañá xoves, o alcalde de Cedeira intervirá, en calidade de presidente de quenda do Xeoparque Cabo Ortegal, no acto de presentación que vai ter lugar no stand que este ano ten na feira a rede nacional de xeoparques, no que tamén están os de América Latina. No acto estará tamén Cristina García Rey, concelleira de Moeche e deputada provincial. Ademais do acto, que se vai celebrar ás 13.30h, a feira Fitur será unha ocasión para manter reunións de traballo con representantes doutros xeoparques e coñecer experiencias de interese no desenvolvemento do de Cabo Ortegal, que vén de obter o recoñecemento da Unesco hai poucos meses.

Por último, o stand da Xunta de Galicia acollerá o venres, ás 13.00h, a presentación “Cabo Ortegal. Territorio xeolóxico”, no marco da promoción dos plans de sustentabilidade turística en destino da Deputación Provincial da Coruña.

O Concello de Cedeira acaba de sacar a licitación a obra para a implantación da rede separativa e a colocación dun novo firma na rúa María Mediadora, coa que o goberno local vai seguir avanzando na mellora do sistema de saneamento do casco urbano. É unha actuación que sae a concurso polo procedemento aberto simplificado por 67.845,65€ (IVE incluído) e que conta con financiación do Plan Complementario da Deputación da Coruña.

A rúa María Mediadora conta con rede unitaria de saneamento, de maneira que actualmente recóllense as augas residuais das casas e os pluviais a través de sumidoiros que non están conectados aos caleiros dos edificios. As obras abranguerán a instalación dunha nova rede de recollida da auga da choiva, conectando as baixantes. Demolerase o colector unitario existente e sustituirase por unha nova rede de recollida de augas residuais, e finalmente reporase todo o firme da calzada.

As empresas interesadas poden presentar as súas ofertas ata o día 5 de febreiro. O prazo de execución é de dous meses.

A biblioteca municipal López Cortón rexistrou no pasado ano 2023 152 novas altas, co que o número de persoas socias ascende a 5.458 e se mantén a positiva evolución que está a experiementar nos últimos anos. Cómpre destacar tamén o incremento do número de préstamos de libros realizados no pasado exercicio: foron un total de 6.843, unha cantidade que supera nun 30% os que se prestaron o anterior 2022 e nun 78% aos de 2019. Desde o goberno local celebran a popularidade deste servizo e os seus altos datos de actividade en relación coa poboación.

Dos 6.843 libros que a biblioteca López Cortón prestou ao longo do ano 2023, un total de 3.252 foron para lectores e lectoras adultas, mentres que o resto, 3.591 corresponderon ao público infantil. Ademais, deles un total de 5.233 estaban en castelán e os restantes 1.610, en galego.

Na evolución de novas altas de socios, cómpre destacar o bo ritmo que se rexistra nos últimos anos despois da pandemia. Así, durante o 2019 fixéranse 103 novos carnés, un número que decaeu ata os 47 no 2020. A recuperación comezou en 2021, con 79 altas, e en 2022 seguiu con 112.

En canto ao número de préstamos, os datos actuais superan en moito aos do ano 2019 -exercicio no que se realizaron obras, durante as que o servizo se trasladou ao Palacete-. Daquela foron 3.836; pasaron a 2.509 en 2020; 3.228 en 2021; 5.252 en 2022 e os 6.843 do pasado 6.843.

Destaca tamén o número de lectores, é dicir, a conta das persoas que visitan as salas ben sexa para consultar alí calquera texto, estudar ou pedir un libro. No pasado 2023 foron 11.686, fronte aos 10.256 do anterior 2022.

O servizo funciona de luns a venres de mañá e tarde -de 08.00 a 14.00 e de 17.00 a 20.00 horase sábados pola mañá -de 10.00 a 13.00 horas- e os seus fondos están formados por preto de 32.000 libros, aos que se suma a sección de revistas e películas tanto para o público adulto como infantil.

O goberno local realizou no ano 2019 unhas obras de ampliación e instalación dun ascensor, mellorando a accesibilidade do inmoble. Desde aquela realizáronse tamén outras actuacións para mellorar e actualizar os equipamentos da biblioteca López Cortón.