NOVAS

A compañía Talía Teatro visita hoxe Cedeira coa obra “Unha inimiga do pobo”, adaptación do texto escrito polo noruegués Henrik Ibsen en 1882 e convertido en todo un clásico da literatura dramática universal. Tito Asorey dirixe a obra, que é unha denuncia daquela política que antepón os beneficios económicos á saúde da poboación ao tempo que propón unha reflexión sobre o uso dos medios de comunicación por parte do poder. A representación, dirixida ao público adulto, será ás 20.00h no Auditorio Municipal. As entradas teñen un prezo de 3,5€ e estarán á venda na billeteira media hora antes.

Na adaptación de Talía Teatro, a “inimiga do pobo” é unha muller, en lugar do home da versión orixinal. A protagonista é unha doctora de gran prestixio que, embarazada de sete meses, decide voltar ao seu pobo natal para emprender unha nova etapa e adicarse a dirixir o balneario que ela mesma deseñou e no que a veciñanza ten postas moitas expectativas. Os problemas xurden cando aparece unha inesperada contaminación nas súas augas, que poden poñer en perigo a saúde da xente.

Talía Teato é unha compañía fundada hai 36 anos, cunha sólida traxectoria e demostrada capacidade de producir e distribuír diferentes propostas escénicas. Xunto ao director Tito Asorey, traballa tamén na dramaturxia deste peza Vanesa Sotelo. Marta Lado, Dani Trillo, María Ordóñez, Toño Casais, Rubén Prieto, Marta Ríos, Diego Rey, Xurxo Barcala e Artur Trillo son os intérpretes.

A Concellería de Igualdade do Concello de Cedeira está a promover unha serie de formacións e actividades orientadas a mellorar a saúde e a calidade de vida das veciñas. Vén de celebrarse, cunha moi boa acollida por parte das participantes, un obradoiro a cargo da matroa Paula Sánchez Flores, do Materno Infantil da Coruña, no que abordaron os cambios que chegan na etapa da menopausia, desde osteoporose ata sequedade vaxinal, e que afectan á vida das mulleres en moi diferentes órdenes. A concelleira Lucía Picos destaca a importancia de informar sobre estas cuestións, en xeral pouco coñecidas e escasamente coidadas desde o sistema sanitario pese a que afectan a máis do 50% da poboación.

Unhas 35 mulleres asistiron ao obradoiro de saúde que impartiu Paula Sánchez e cubriron unha enquisa ao finalizar na que confirmaron o interese que tiveron os seus contidos. A concelleira Lucía Picos recordou que xa en decembro se organizara, tamén con éxito, unha formación dirixida a profesionais do ámbito deportivo e deportistas, para concienciar sobre a importancia dunha práctica deportiva en condicións de seguridade, entre outras, da anatomía lumbo-pélvica, para evitar lesións comúns que afectan a mulleres de todas as idades. A intención da Concellería de Igualdade é organizar proximamente outro obradoiro no que se falará de novo do solo pélvico, para todas as veciñas interesadas, e se aprenderán exercicios que se poden facer facilmente na vida cotiá para fortalecelo.

Máis inmediata é, hoxe venres día 2 de febreiro, a charla sobre “Mitos do amor romántico” que Olalla Barro, técnica especializada en Igualdade e docente, impartirá no Auditorio Municipal, ás 19.30h. Nela percorrerá desde o punto de vista histórico o rol que a muller desempeñou en diferentes eidos, entre eles o económico e laboral, e sobre como o modelo de conduta amorosa que tradicionalmente imperou na sociedade ten unha relación directa coa subordinación das mulleres e a violencia de xénero.

Ao día seguinte, o sábado 3, desenvolverase no Pavillón Municipal un taller de Autodefensa que vai dirixido a mulleres de todas as idades. Nel daranse claves e técnicas para protexerse e defenderse de situacións violentas. O obradoiro correrá a cargo de especialistas da Federación Galega de Loita e profesionais das Forzas e Corpos de Seguridade do Estado. O horario será de 09.00 a 14.00 horas.

A Concellería de Normalización Lingüística do Concello de Cedeira vén de poñer en marcha coas Equipas de Normalización do CEIP Nicolás do Río e do IES Punta Candieira o proxecto “Literarrúa”. É unha iniciativa dirixida a inzar de versos e literatura en galego as rúas e espazos públicos do municipio, involucrando ao alumnado na procura dos textos que mellor concorden con cada lugar para plasmalos, no lugar e da maneira máis axeitada en cada caso, na parede, no chan ou ben cunha placa.

A idea é pescudar na literatura galega, ben sexa prosa ou poesía, aqueles textos que teñan relación co topónimo do lugar elixido. Así, o profesorado presentará ao alumnado o reto de escoller os versos ou frases que irían na praza Rosalía de Castro, a de Galicia, a rúa Estrela, a praza do Peixa, a rúa República ou a da Paz, por exemplo.

Apuntan desde o goberno local que “Literarrúa” non quere limitarse ao casco urbano, senón que nace co devezo de chegar a todas as parroquias de Cedeira, introducindo a literatura galega na vida cotiá da veciñanza. Tampouco teñen que ter os textos unha relación directa co nome do lugar, sinalan, podendo aludir a vida e historia do rural galego, por exemplo.

Na fase final do proxecto, os versos seleccionados plasmaranse nos lugares seleccionados de diversas formas, nunha parede, no chan, nunha placa…. tendo en conta as características do lugar e intentando facer partícipes aos nenos e nenas, así como ao profesorado, dun traballo realizado en equipo e que lucirá ao longo do tempo nos espazos públicos do concello.

Cómpre recordar os versos de Rosalía de Castro “Brilá, raio da aurora…”, da súa obra “Follas Novas”, que xa adornan a fachada lateral da biblioteca municipal López Cortón, xunto coa faciana da poeta, iniciativa que configurou un dos recunchos máis singulares do casco vello de Cedeira.