MOCIDADE

A festa do Samaín de Cedeira cumpre trinta anos e presentarase o día 23 en Ferrol nunha charla-coloquio na sede de Afundación

A FESTA DO SAMAÍN DE CEDEIRA CUMPRE TRINTA ANOS E PRESENTARASE O DÍA 23 EN FERROL NUNHA CHARLA-COLOQUIO NA SEDE DE AFUNDACIÓN

A festa do Samaín de Cedeira chega este ano á súa trixésima edición cunha morea de actividades que darán comezo o próximo mércores e rematarán na xornada do domingo, día 3 de novembro, despois de máis dunha semana de encontros e celebracións para todas as idades.

A organización dos actos corre a cargo do Concello cedeirense que conta coa colaboración da Asociación Amigos do Samaín, da ANPA Picapeixe, da Asociación Cultural Garola, do colectivo Aventureros en Galicia e mesmo da Deputación da Coruña para levar a cabo charlas, obradoiros, actuacións musicais e concursos, entre outras citas, para facer destas celebracións unha homenaxe pública e colectiva ás tradicións populares.

E co fin de abrir esta cita tan especial á participación da veciñanza da comarca en xeral, os convocantes organizan unha charla-coloquio que terá lugar o próximo mércores na sede Afundación, situada na praza da Constitución de Ferrol. Será ás 18.30 horas e correrá a cargo de responsables da entidade Amigos do Samaín.

O programa terá continuidade os días 28, 29 e 30 coa celebración dun obradoiro de manualidades e decoración que será na sala Áncora en horario de 16.30 a 18.30 horas. Ten como obxectivo a realización de adornos para os actos festivos que están por vir.

O xoves 31 a actividade principal será a actuación de “As Parábolas de Pakolas” no auditorio municipal (17.30 horas), mentres que ao día seguinte (1 de novembro) a festa traducirase nun obradoiro de zonchos e pintura (17.00 horas) e na actuación de monicreques de cachiporra “Dona Barriga Verde”, con Larraiz Urrutzola, no interior dos toldos situados no paseo da Mariña.

Estas mesmas instalacións acollerán o día 2 a celebración da tradicional xincana infantil, organizada por Aventureros en Galicia, e a esperada Casa do Terror, na que poderán tomar parte menores de 15 anos. Ámbalas dúas iniciativas se levarán a cabo en horario de 12.30 a 14.00 e de 16.00 a 16.30 horas para, a continuación, dar paso á presentación do concurso de cabazas (de 17.00 a 19.30 horas), á saída da xincana (17.00 horas), á celebración do tradicional obradoiro de maquillaxe (17.30 horas) e á merendola de outono, na que haberá degustacións de requeixo con mel e bola de azucre. A entrega dos premios será ás 20.00 horas e a celebración do Desfile das Pantasmas (20.30 horas) porá punto final a unha xornada que fará gozar a maiores e pequenos.

A festa do Samaín rematará o domingo 3 de novembro coa presentación do libro “Viaxe ao alén” de Obdulia Dopico, que durante o encontro estará acompañada da concelleira de Cultura, Ermitas García, e do historiador e docente Carlos Breixo. Tamén no acto se proxectará un traballo documental realizado por Álvaro Fernández Polo.

O colexio Nicolás del Río xa ten o seu propio desfibrilador, que no verán operará na praia

O COLEXIO NICOLÁS DEL RÍO XA TEN O SEU PROPIO DESFIBRILADOR, QUE NO VERÁN OPERARÁ NA PRAIA

O Concello de Cedeira acaba de facer entrega dun desfibrilador á comunidade escolar do Nicolás del Río. Trátase do terceiro equipo destas características que está a funcionar no municipio e chega despois dos instalados no campo de fútbol e pavillón municipal.

O acto tivo lugar hoxe nas instalacións do colexio e no mesmo déronse cita o alcalde, Pablo Moreda Gil; a directora do centro, Marta Cameselle; a concelleira de Turismo, Carmela Prieto Cal, e o secretario e profesor de Educación Física, Alejandro Martínez.

O alcalde, Pablo Moreda Gil, destacou a intención do executivo local de crear unha rede de desfribriladores que abarque a totalidade das instalacións municipais coa intención de poñer as ferramentas necesarias para poder actuar o máis axiña posible ante un accidente cardiorrespiratorio. Moreda tamén apuntou que, durante os meses de verán, este novo desfibrilador estará operativo para atender aquelas posibles urxencias que poidan ter lugar no areal da Madalena.

Pola súa banda, a directora do Nicolás del Río agradeceu o “agasallo” do Concello e explicou que, cando menos, desde a dirección do colexio existe a intención de facer partícipe ao alumnado da incorporación deste novo aparato á vida cotiá do centro así como informar dos seus usos.

O investimento, asumido na súa totalidade polo Concello, superou os 1.800 euros.

O Concello repartirá esta semana o boletín As7parroquias que volve á rúa despois do verán

O CONCELLO REPARTIRÁ ESTA SEMANA O BOLETÍN AS7PARROQUIAS QUE VOLVE Á RÚA DESPOIS DO VERÁN

O boletín As7parroquias, que edita o Concello de Cedeira para ter informada a veciñanza, volverá este xoves estar na rúa despois do verán. Por esta razón, na publicación recóllense balances moi exitosos tanto no campo deportivo como no relativo á campaña turística, así como outros moitos asuntos de actualidade.

Durante o tempo estival o municipio acolleu competicións de tríatlon, pádel, fútbol sala e fútbol praia, ao tempo que recibía unha morea de viaxeiros que se achegaron á vila para visitar o castelo da Concepción, o santuario de Santo André de Teixido ou mesmo para tomar parte nas xeorrutas e roteiros promovidos polo Concello dentro da súa oferta turística. Case 7.000 persoas pasaron este verán pola oficina de turismo e xa son máis de 2.000 as que nos últimos tres anos se acercaron á xeoloxía a través das saídas gratuítas, que fan desta riqueza natural un recurso turístico diferencial.

No boletín tamén houbo espazo para explicar os contidos dos orzamentos que se aprobaron no mes de agosto e estarán vixentes ata final de ano, a aposta do goberno municipal para incrementar o número de lámpadas de tecnoloxía LED tanto na zona rural como urbana, así como a licitación da obra que fará do castelo da Concepción o centro interpretativo do xacemento arqueolóxico de Punta Sarridal.