MOCIDADE

Tras a publicación no Boletín Oficial da Provincia das bases do concurso de pintura mural, o Concello de Cedeira ten aberto o prazo para a presentación de propostas. Así, as asociacións de veciños e outras entidades, así como particulares, poden achegar ata o vindeiro10 de agosto os seus proxectos para espazos da súa titularidade e optar as dúas axudas de 2.500€ que o Concello de Cedeira vai conceder para impulsar a presenza destas obras de arte ao aire libre na vila.

A selección das ubicacións correrá a cargo dunha comisión técnica que terá en conta as condicións de seguridade estrutural do muro, a viabilidade dos traballos, o interese espacial e urbano, a existencia de elementos descontextualizados como cables, caixas de servizos… e outras cuestións que poidan afectar á efectividade dos murais.

A temática será libre, pero terán prioridade os murais identitarios que relaten a historia de Cedeira, as súas actividades, fontes de riqueza e aqueles aspectos que identifiquen á vila. Estarán prohibidas as representacións que constitúan apoloxía da violencia, obras de contido racista, sexista, xenófobo, obsceno ou calquera outro que atente contra a dignidade das persoas. Consulta as bases: https://bop.dicoruna.es/bopportal/publicado/2021/07/26/2021_0000005837.pdf

O Concello de Cedeira abre desde hoxe xoves ata o vindeiro domingo, día 1 de agosto, dous tobogáns xigantes acuáticos na praza da Constitución (A Revolta). Os inchables estarán abertos de 11.00 a 14.00 e de 16.30 a 20.00 horas e as persoas que queiran lanzarse por eles poderán inscribirse na mesma instalación, onde se velará polo cumprimento dos protocolos covid en todo momento.

Haberá un tobogán máis grande, o “Gravity”, de 35 metros de lonxitude e cunha altura mínima de 1,5 metros, e outro máis pequeno, o “Selva”, que está formado por dous esvaradoiros de 18 metros.

Por outra banda, o Concello de Cedeira promove unha homenaxe a Fusa Guillén este venres, cun acto no que o grupo de teatro afeccionado Valverde porá en escea dúas obras de Chejov, “A Corista” e “Petición de man”, que comezara no seu momento a ensaiar con ela. No mesmo acto estarán tamén Helga Méndez, Carlos Labraña, Paz Guillén e J. Carlos Dopazo, lembrando á querida “Fusa” a través de interpretacións e música. A cita é no Auditorio Municipal ás 20.00 horas, e as persoas interesadas en asistir poden reservar entradas a través do whatsapp no número 649 876 614 ou ben enviando un mail a enrique.vazquez@cedeira.gal.

E para o domingo, día 1 de agosto, o Concello propón a celebración do “Día da Bici” cun paseo dunha hora polas rúas da vila. As persoas interesadas poderán apuntarse no lugar da saída, a Praza Roxa, desde as 10.30 horas. Ás 11.00 horas comezará o paseo por Cedeira, e tamén un percorrido alternativo en bici de montaña, tamén dunha hora de duración. para aqueles ciclistas que estean equipados e preparados.

Cedeira é, xunto con Sobrado, Cariño e Ponteceso, un dos municipios da provincia coruñesa seleccionados a través da Deputación para participar no proxecto europeo Youth Calls EU. Trátase de promover entre a mocidade o debate e a reflexión arredor das políticas europeas para recoller ideas e propostas que poidan influír ou incorporarse á Estratexia da UE para a Xuventude.

A xornada que vai acoller Cedeira estará adicada ao tema “Educación 4.0” e enfocada, por tanto, a artellar propostas nesta materia. Desde o Concello invitan a mozos e mozas de entre 14 e 26 anos a participar na reunión, que se vai desenvolver de 10.00 a 14.00 horas na Praza da Rectoral, e se converter en axentes activos na definición de políticas de mellora no eido educativo. Na reunión desenvolveranse dinámicas de traballo en equipo para contribuír á xeración de ideas de xeito construtivo.

As persoas interesadas teñen que inscribirse previamente enviando unha mensaxe a manuel.martinez@cedeira.gal ou ben chamando ao número 673 223 414.