MOCIDADE

250 DEPORTISTAS DE TODA A PROVINCIA PARTICIPAN MAÑÁ NO 3º DUATLÓN MENORES “CONCELLO DE CEDEIRA”

O Club Natación Cedeira organiza a terceira edición do Duatlón Menores “Concello de Cedeira”, que por primeira vez este ano desenvólvese dentro do programa Xogade da Xunta de Galicia e que volve contar co apoio da administración local. Un total de 250 deportistas, nenos e nenas de clubes de toda a provincia, participarán na proba, que se vai desenvolver mañá pola tarde pola nova variante de Régoa. Desde o Concello, o alcalde de Cedeira, Pablo Diego Moreda Gil, destacou que “no goberno local sempre estamos dispostos a apoiar a organización deste tipo de eventos, porque apostamos polo deporte de base, e porque son unha ocasión para que moita xente se achegue á nosa vila”, comentou, sumando ademais neste caso “a oportunidade que representa para coñecer mellor un deporte como o duatlón”.

O presidente do Club Natación, Xan Xosé Suárez Vilela, explicou que a proba, que combina a carreira e a bicicleta, comenzará a partir das 16.00 horas, pero que xa unha hora antes os clubes terán que presentarse e que o tráfico estará por iso cortado –os coches poderán circular cara a San Andrés pola estrada vella-. Haberá tres categorías: benxamín (nados nos anos 2012-2013), alevín (2010-2011) e infantil (2008-2009).

O Concello de Cedeira colabora económicamente, con máis de 2.000 euros para sufragar unha ambulancia, o avituallamento e a cronometraxe para a celebración do campionato, así como achegando o apoio de Protección Civil, Policía Local e persoal municipal para o correcto desenvolvemento da proba.

A ESCOLA INFANTIL DE CEDEIRA LOCE XA UN EXTERIOR ARRANXADO E UNIFORME TRAS AS ÚLTIMAS OBRAS

A escola infantil de Cedeira loce xa co seu exterior arranxado e uniforme despois das obras que realizou o Concello no edificio da ampliación. A administración municipal investiu máis de 61.000€ nos traballos de reparación e pintado das fachadas, no cambio dos ventanais e o arranxo do beirado do tellado. O goberno local amósase satisfeito co resultado da intervención neste edificio, que acollía antigamente o colexio de Santa María do Mar e ao que se ten especial cariño na vila, e destacan que o centro presenta un aspecto moi alegre, pola estética do propio inmoble e tamén polo mural que adorna o peche, obra do artista local Adrián Taracido e parte do programa de arte urbano que puxo en marcha nos últimos anos o Concello.

Cómpre recordar que a ampliación da escola da rede A Galiña Azul en Cedeira levouse a cabo hai dous anos e permitiu pasar de 58 a 78 prazas para nenos e nenas de cero a tres anos. O centro ocupaba antes un dos dous inmobles xemelgos que formaban o colexio de Santa María do Mar e o Concello cedeu o segundo para levar adiante o proxecto. Daquela acometeuse a adecuación interior do inmoble cun investimento de máis de 141.000€ que asumiu o Consorcio Galego de Servizos de Igualdade e Benestar coa colaboración municipal, que custeou unha terceira parte da actuación. Estaba pendente a adecuación do exterior do inmoble, para resolver as deficiencias que presentaba e tamén para facer uniforme, co edificio anexo, o aspecto do centro.

Os traballos consistiron no cambio de seis ventanais, a limpeza, reparación, pintado e impermeabilización das fachadas e no arranxo do tellado. Concretamente, esta última parte da obra consistiu na desmontaxe de parte das tellas e o formigonado das cornixas, nas que tamén se instalaron novos caleiros.

O GRUPO SOCIALISTA NO PARLAMENTO INSTA Á XUNTA A ASUMIR A CUBERTA DO PATIO DO CEIP NICOLÁS DO RÍO

O grupo do PSdeG-PSOE no Parlamento galego instou hoxe á Xunta, a través dunha pregunta formulada na Comisión de Educación, a asumir a contrución dunha cuberta no patio do CEIP Nicolás do Río que empregan os nenos e nenas de quinto e sexto de Primaria. O alcalde de Cedeira, Pablo Diego Moreda Gil, desprazouse hoxe ata o Pazo do Hórreo para seguir a sesión, na que a parlamentaria socialista Noa Díaz recordou que o Concello ten reclamado esta obra hai máis dun ano e lle afeou ao goberno galego a súa negativa a manter un encontro cos responsables locais para abordar as necesidades do colexio.

A representante do PSdeG-PSOE explicou que o pleno do Concello de Cedeira aprobou por unanimidade xa a comezos do pasado ano 2021 unha moción instando á Xunta de Galicia a asumir a construción da cuberta para o patio, “facéndose eco de toda a comunidade educativa”. Destacou tamén na súa intervención que o Concello está disposto a colaborar asumindo a reparación do pavimento deste patio, e mesmo coa instalación de novos xogos no patio do Areal.

Aludiu tamén a socialista a que a petición que formulou o Concello de Cedeira vai dirixida a cubrir este patio, que empregan os nenos e nenas de quinto e sexto de Primaria, facendo del un espazo para a educación inclusiva e en igualdade, fuxindo do tradicional modelo de xogo monopolizado polas canchas de fútbol ou baloncesto. O espazo, subliñou Noa Díaz, “está sendo na actualidade infrautilizado, pois non está cuberto, o que complica o seu uso na maioría do tempo dada a climatoloxía” .

Cómpre recordar que o Concello de Cedeira ten acometido diferentes actuacións nos últimos anos que non son unicamente de mantemento senón que foron máis alá en moitos casos. Así, o pasado verán a administración local asumiu o 50% da obra de renovación do pavimento de caucho do chan da zona de xogos de Infantil (uns 10.000 euros dos 20.000€ que custou a intervención), e no ano anterior xa se intervira para adecuar outra zona de xogos e facilitar a separación de grupos durante a pandemia. Igualmente, o Concello contratou a instalación dun teito de abrigo no corredor de acceso ao colecio, instalou novos xogos no parque de Infantil, transformou un vello patio nun horto urbano e mellorou a iluminación do polideportivo do colexio, ademáis de colaborar noutras cuestións como foi o reparto de máscaras e xel hidroalcohólico á comunidade educativa, a realización dun mural no peche do centro e a organización de diferentes actividades.