MEDIO AMBIENTE

A cronoloxía da sauna castrexa de Cedeira remóntase ao século III antes de Cristo

Cedeira acolle o monumento con forno -pedra formosa- máis antigo de Galicia. A proba do Carbono 14, á que foron sometidos restos de carbón recollido durante a última escavación, sitúano no século III a.C., en torno ao ano 2.250, unha data cunha marxe de erro de máis menos 30 anos.

A cronoloxía agora corroborada pola empresa Beta Analytic, con sede en Londres pero cos laboratorios en Estados Unidos, vén demostrar a orixe castrexa do monumento, polo que tamén pecha definitivamente o debate sobre a posible influencia romana na realización destas construcións, das que en Galicia existen un total de cinco. A última precisamente foi a localizada pola empresa Axa Arqueoloxía, da que forma parte Emilio Ramil, durante a campaña levada a cabo en decembro do 2017.

Ramil apuntou que a proba do Carbono 14 non deixa lugar a dúbidas. “A sauna de vapor estaba en funcionamento antes da chegada dos romanos a Galicia, polo que a súa construción aínda será anterior”, explicou. Asegurou así mesmo que “Patrimonio e máis eu estamos moi entusiasmados co resultado da mostra dos restos de carbón que no seu día serviron de combustión para quentar as pedras do monumento”.

Pola súa banda, a concelleira de Cultura, María Xosé Rodríguez Pérez, explicou que nunca existiu ningún tipo de dúbidas con respecto á importancia do xacemento de Punta Sarridal, “un potencial que agora vese recompensado e confirmado por unha proba científica de moi alto nivel, polo que considero necesario seguir investindo para ampliar a investigación e os coñecementos que poida seguir arroxando este xacemento arqueolóxico”, asegurou.

No mes de xullo deste mesmo ano concluía a terceira intervención arqueolóxica levada a cabo nesa zona do termo municipal de Cedeira, a primeira financiada exclusivamente con achega local. O investimento ascendeu a 12.000 euros e os traballos realizados tiñan como obxectivo a consolidación dos elementos ata o de agora localizados. Anteriormente e con financiamento directo de Patrimonio, o lugar acolleu outras dúas campañas arqueolóxicas.

A política de aforro enerxético chega á iluminación da Praza de Galicia e avenidas Area e Zumalacárregui

O Concello de Cedeira vén de substituír as lámpadas de vapor de sodio na iluminación pública da praza de Galicia, avenida Area, rúa Cuartel e avenida Zumalacárregui por outras de tecnoloxía led, seguindo así coa política municipal de apostar polo aforro enerxético, a diminución das emisións de dióxido de carbono e a redución da contaminación lumínica.

O importe desta última intervención ascendeu a 36.166,90 euros (IVE incluído) e foi executada pola empresa Hallmann Energy. Son obras que dan continuidade ás acometidas máis recientemente nos xardíns da praza Roxa e na praza de López Cortón, así como ás tamén realizadas desde hai tempo tanto no centro urbano -rúa Ezequiel López, Mariñeiro e Real- como noutros puntos da zona rural.

Os traballos de iluminación da praza de Galicia, as avenidas Area e Zumalacárregui e rúa Cuartel completáronse ademais coa instalación de puntos de luz nos pasos de peóns existentes ao longo das devanditas estradas. Forman parte dun plan municipal para dar maior visibilidade aos peóns co fin de que os automobilistas poidan percibir a presenza de persoas sobre a calzada. Este sistema xa está a funcionar en case todo o centro urbano da vila de Cedeira.

O Ministerio anuncia para este ano a contratación do estudio de avaliación ambiental da praia

O alcalde de Cedeira, Pablo Moreda Gil, mantivo senllas reunións de traballo co responsable da Subdirección General para la Protección de la Costa, Ángel Muñoz Cubillo, en Madrid e co Xefe da Demarcación de Costas en Galicia, Rafael Eimil Apenela, para avanzar na realización do Estudio de lmpacto Ambiental do areal da Madalena, así como para a realización do proxecto de recuperación da antiga cetaria do Sarridal, paralizado desde o ano 2010 por unha decisión técnica.

En ámbolos dous casos, a resposta dos representantes do Ministerio para la Transición Ecológica foi claramente positiva e de especial relevancia para os intereses da veciñanza local, segundo Pablo Moreda.

Tanto Ángel Muñoz como Rafael Eimil confirmaron ao alcalde que a contratación do estudio no que se basará a rexeneración da praia producirase antes de que finalice este ano e que o proxecto de recuperación da cetaria segue a ser de interese para o Ministerio. Así, os servizos técnicos veñen de autorizar a intervención, na que o Concello está disposto a asumir o 20 % do seu custo.

No seu momento, o Ministerio barallou ao redor dos 300.000 euros para a realización dunha obra que o goberno valora de maneira moi especial “porque pon de manifesto as nosas raíces e porque se atopa nunha zona de gran valor patrimonial”, segundo o rexedor municipal. Moreda Gil tamén apuntou que “a conservación do patrimonio local está a ser unha das prioridades do equipo de goberno”. O proxecto para a recuperación da cetaria require, por parte de Costas, unha addenda para actualizar o prezo e para corrixir o que indicaba o informe técnico.

En canto á rexeneración ambiental da praia da Madalena, o alcalde cualificou de “moi boa noticia” o anuncio feito por parte dos responsables do Ministerio con respecto á contratación da redacción do documento de avaliación de impacto ambiental, un paso moi importante cara aos obxectivos que se seguen a defender desde o goberno, a veciñanza a Plataforma en Defensa da Ría de Cedeira e mesmo por parte do PSOE, BNG, Anova e Cedeira pola Esquerda.

O alcalde sinalou a alarma e preocupación que o estado da praia chegou a xerar entre a cidadanía e recordou que a postura unánime de todos os sectores foi coñecer a orixe do problema antes de actuar sobre o mesmo. O impacto ambiental aclarará todas estas cuestións para garantir “unha praia para toda a vida, que é o que realmente queremos”, apuntou o rexedor municipal.