MEDIO AMBIENTE

Cedeira inviste máis de 54.000 euros en mellorar catro camiños públicos da zona rural

CEDEIRA INVISTE MÁIS DE 54.000 EUROS EN MELLORAR CATRO CAMIÑOS PÚBLICOS DA ZONA RURAL

O Concello de Cedeira vén de investir 54.762,95 euros na reparación de catro camiños rurais de titularidade municipal. Trátase dos de Vilarcay, Meizoso, As Bieiteiras e Igrexa de Cervo.

As actuacións consistiron principalmente na limpeza de cunetas por ámbalas dúas marxes, en ampliar en 15 centímetros a altura da capa de rodaxe e no rego asfáltico semiprofundo e superficial no conxunto total das superficies intervidas. Estas abrangueron un total de 7.700 metros cadrados.

Desde o goberno municipal destácase a necesidade de seguir investindo en infraestruturas para mantelas nas mellores condicións posibles, tanto para garantir a seguridade de condutores e peóns como para facilitar a comunicación en todo o termo municipal.

As obras agora rematadas recibiron financiamento local e autonómico, este último a través dos fondos Agader do ano 2017.

VER GALERÍA das melloras de catro camiños públicos da zona rural

Cedeira instala soportes para aferrar os colectores de lixo en quince novos lugares da zona rural

CEDEIRA INSTALA SOPORTES PARA AFERRAR OS COLECTORES DE LIXO EN QUINCE NOVOS LUGARES DA ZONA RURAL

O Adro (Régoa), Igrexa de Santalla, Carreiro, Arrasa, Cancelo, Transmonte, Lamelas, Figueirido, Cardosa, Saíñas, Palacete, Barral, Sisalde, Vila do Río e Escolar de San Román. Son os nomes dos quince lugares rurais de Cedeira nos que o goberno municipal vén de instalar soportes metálicos para aferrar os contedores de lixo, un proxecto executado pola empresa Prieto Mouriz e cuxo investimento ascendeu a 7.211,60 euros (IVE incluído).

O grupo de goberno entende que é unha prioridade mellorar a suxeición dos colectores que se encontran na zona rural, na que existen un total de 300 unidades pero dos que só unha terceira parte dispoñen do elemento de contención.

Esta situación, segundo o executivo local, representa “un prexuízo para a veciñanza cando atopan os contedores tirados no chan ou retirados nun espazo distinto do habitual por inclemencias metereolóxicas”.

A construción dunha base de formigón e a instalación do mecanismo metálico correspondente garanten a estabilidade dos colectores, así como un bo funcionamento do servizo de recollida de lixo.

O Condomiñas, un señor río

O CONDOMIÑAS, UN SEÑOR RÍO

Continúa o desbroce da ribeira do río Condomiñas, así como a retirada do seu cauce tanto do arbolado morto que dificulta o seu decorrer e propicia os desbordes en certas épocas do ano como de grandes cantidades de plásticos e todo tipo de enseres que remataron alí polo incivismo dunha minoría con nula sensibilidade medioambiental e que pensa que o río é unha esterqueira.

Trátase do treito que comeza na ponte da Acea, augas arriba, e que permite o paseo ao longo de case dous kilómetros, aínda que con certas dificultades que se irán solucionando pouco a pouco. O polígono da Xunqueira segue a ser un obstáculo insalvable pola marxe esquerda (un par de naves impiden o paso), polo que se recomenda iniciar o percorrido pola marxe dereita e cruzalo por algunha das dúas pontelas existentes, que se irán mellorando co tempo e cuxo número se verá incrementado.

Convidamos a todo o mundo a que desfrute do paseo, dos paxaros, peixes e árbores de gran porte. O río parece outro, mesmo máis grande e espectacular agora no outono. Non podemos volver tolerar que a maleza nos prive deste noso pequeno paraíso.