MEDIO AMBIENTE

A Demarcación de Costas de Galicia saca a exposición pública o proxecto de acceso e acondicionamento da cetaria do Sarridal, unha intervención paralizada desde o ano 2010 por unha decisión técnica e agora recuperada polo goberno municipal “porque pon de manifesto as nosas raíces e porque se atopa nunha zona de gran valor patrimonial”, segundo apuntou o rexedor municipal, Pablo Moreda Gil.

Desde hoxe e dentro dun prazo de 20 días, a documentación pode ser consultada nas dependencias que a Demarcación de Costas ten na cidade da Coruña (c/ San Pedro de Mezonzo, n.º 2, bajo -Esquina avenida de Finisterre-), e mesmo no Concello de Cedeira. Este periodo de tempo tamén é válido para a presentación de alegacións.

O alcalde considera que é unha magnífica noticia para o conxunto da poboación local, ao tempo que reitera o compromiso da administración local en colaborar economicamente na execución dunhas obras, cuxo importe actualizado ascende a 312.589,89 euros.

O proxecto consistirá na recuperación das estruturas existentes, en darlle accesibilidade ao lugar e en intervir sen alterar unha construción que, ademais de formar parte del patrimonio local, se atopa nunha zona na que xa existen outras riquezas patrimoniais, como poden ser o castelo da Concepción e o xacemento arqueolóxico no que foi localizada a quinta pedra formosa de Galicia.

Esta actuación, xunto ao asunto da rexeneración da praia, levou recentemente ao alcalde a manter reunións de traballo, tanto en Madrid como na Coruña, co responsable da Subdirección General para la Protección de la Costa, Ángel Muñoz Cubillo e co Xefe da Demarcación de Costas en Galicia, Rafael Eimil Apenela.

Cedeira acolle o monumento con forno -pedra formosa- máis antigo de Galicia. A proba do Carbono 14, á que foron sometidos restos de carbón recollido durante a última escavación, sitúano no século III a.C., en torno ao ano 2.250, unha data cunha marxe de erro de máis menos 30 anos.

A cronoloxía agora corroborada pola empresa Beta Analytic, con sede en Londres pero cos laboratorios en Estados Unidos, vén demostrar a orixe castrexa do monumento, polo que tamén pecha definitivamente o debate sobre a posible influencia romana na realización destas construcións, das que en Galicia existen un total de cinco. A última precisamente foi a localizada pola empresa Axa Arqueoloxía, da que forma parte Emilio Ramil, durante a campaña levada a cabo en decembro do 2017.

Ramil apuntou que a proba do Carbono 14 non deixa lugar a dúbidas. “A sauna de vapor estaba en funcionamento antes da chegada dos romanos a Galicia, polo que a súa construción aínda será anterior”, explicou. Asegurou así mesmo que “Patrimonio e máis eu estamos moi entusiasmados co resultado da mostra dos restos de carbón que no seu día serviron de combustión para quentar as pedras do monumento”.

Pola súa banda, a concelleira de Cultura, María Xosé Rodríguez Pérez, explicou que nunca existiu ningún tipo de dúbidas con respecto á importancia do xacemento de Punta Sarridal, “un potencial que agora vese recompensado e confirmado por unha proba científica de moi alto nivel, polo que considero necesario seguir investindo para ampliar a investigación e os coñecementos que poida seguir arroxando este xacemento arqueolóxico”, asegurou.

No mes de xullo deste mesmo ano concluía a terceira intervención arqueolóxica levada a cabo nesa zona do termo municipal de Cedeira, a primeira financiada exclusivamente con achega local. O investimento ascendeu a 12.000 euros e os traballos realizados tiñan como obxectivo a consolidación dos elementos ata o de agora localizados. Anteriormente e con financiamento directo de Patrimonio, o lugar acolleu outras dúas campañas arqueolóxicas.