Skip to content Skip to left sidebar Skip to footer

MEDIO AMBIENTE

A Deputación da Coruña avanza no deseño dos parques do Plan de Patrimonio

A DEPUTACIÓN DA CORUÑA AVANZA NO DESEÑO DOS PARQUES DO PLAN DE PATRIMONIO

A área de Turismo e Patrimonio da Deputación da Coruña inicia o novo ano con importantes pasos dados no deseño dos parques que compoñen o Plan de Patrimonio. O proxecto do Xeoparque de Ortegal en Ferrolterra, o Parque do Megalitismo na Costa da Morte, Compostela Rupestre nas Terras de Santiago e o Parque da Idade do Ferro nas rías de Arousa Norte e Muros Noia camiñan xa cara a consolidación como recursos turísticos de especial interese despois dun ano en que se sentaron as bases para a súa creación.

Os catro parques que forman parte do Plan de Patrimonio deron neste ano que agora remata importantes pasos de cara a súa consolidación, coa constitución de órganos de dirección que decidirán os pasos a dar de cara ao futuro e tamén do investimento de orzamentos, de maneira especial, a achega da propia Deputación da Coruña que destina 500.000 € a cada un dos proxectos deseñados arredor do patrimonio xeolóxico e arqueolóxico a través da cooperación intermunicipal.

Os concellos de Cariño, Cedeira, Cerdido, Moeche, Ortigueira, San Sadurniño e Valdoviño están adheridos á comunidade intermunicipal que suma forzas para avanzar na consolidación do proxecto de Xeoparque de Ortegal, impulsado desde a Deputación da Coruña. Co horizonte no recoñecemento da UNESCO como xeoparque, neste ano constituíuse o consello de dirección que designou como primeiro presidente ao alcalde do Concello de Cerdido, Benigno Galego Castro, que asume un cargo con carácter rotatorio que comeza polo municipio de menos habitantes. O plan director, a contratación de asistencia técnica e o deseño da imaxe corporativa son os primeiros eixos de traballo do proxecto de xeoparque que afondou nesta primeira etapa nos contactos exteriores con distintas entidades de especial interese como o GeoParc de Catalunya Central ou o xeoparque da Costa Vasca. “Déronse interesantes pasos na consolidación dun proxecto que conta cunha especial unión dos concellos que camiñan na mesma dirección, algo de especial interese á hora de chegar ao obxectivo de obter a consideración de xeoparque.

Por outra parte, foi un ano intenso en contactos institucionais que consideramos que poden abrir camiños para o proxecto de Ortegal”, sinala o deputado de Plans, Patrimonio e Turismo, Xosé Regueira. Un parque con máis de 300 mámoas Cunha xuntanza celebrada no primeiro trimestre do ano na que participou o propio Xosé Regueira xunto cos alcaldes dos once concellos implicados anunciábase a creación dunha mancomunidade de da área patrimonial do Parque do Megalitismo na que a Deputación da Coruña investirá medio millón de euros para a execución dunha parte do Plan director. Os concellos da Laracha, Cabana de Bergantiños, Carballo, Dumbría, Laxe, Malpica de Bergantiños, Mazaricos, Ponteceso, Vimianzo e Zas participan do proxecto creador arredor da cultura neolítica que conta con máis de 300 mámoas, dolmens e outras construcións funerarias, que compoñen unha das mostras mellor conservadas e máis representativas da nova idade da pedra no territorio galego.O Parque do Megalitismo pecha o ano co Comité de Dirección constituído e presidido polo alcalde de de Dumbría, José Manuel Pequeño Castro, segundo se decidiu na xuntanza celebrada no Dolmen de Dombate, monumento de referencia da riqueza patrimonial do parque (…).

Fonte: Deputación da Coruña

Pode consultarse a nova completa na seguinte ligazón:

IR Á LIGAZÓN A Deputación da Coruña avanza no deseño dos parques do Plan de Patrimonio

O Pleno aprobou os plans provinciais e a compra do edificio das sindicais para ofrecerllo á Xunta a fin de aumentar o centro de saúde

O PLENO APROBOU OS PLANS PROVINCIAIS E A COMPRA DO EDIFICIO DAS SINDICAIS PARA OFRECERLLO Á XUNTA A FIN DE AUMENTAR O CENTRO DE SAÚDE

O pleno de Cedeira aprobou os proxectos incluídos no POS+2019 e no Plan Complementario da Deputación da Coruña, que suman un total de 369.840,64 euros. Entre as actuacións previstas está a instalación dunha nova rede de saneamento nas rúas Estrada, Valdoviño, San Sadurniño e Travesía da Praia, a mellora da eficiencia enerxética da iluminación pública na avenida Castelao e a extensión da rede de saneamento a Vilacacín.

O proxecto da rede de saneamento, orzamentado en máis de 191.000 euros e cunha aportación municipal de 94.700 euros, dará lugar a la demolición da rede existente -a base de tubaxes de fibrocemento- e á colocación dunha separativa para evitar os continuos atascos que agora se producen polo mal estado e a escasa pendente das canalizacións. A intervención rematará co asfaltado da rúa.

A obra de mellora enerxética que se pretende levar a cabo na avenida Castelao require dun investimento de 55.421,99 euros e basicamente consistirá na substitución das luminarias existentes por outras de tecnoloxía led. A antigüidade e o consumo das actuais, así como a contaminación lumínica que produce están entre as razóns que xustifican o investimento, segundo o goberno municipal.

A extensión da rede de saneamento en Villacacín chega aos 77.000 euros de investimento e dará lugar á instalación de tubaxe ao longo de 640 metros e a construción de 21 pozos de rexistro para poñer en funcionamento un servizo do que actualmente carece este núcleo rural da parroquia de Cedeira.

Na sesión plenaria tamén se adoptou a decisión de adquirir á Consellería de Medio Rural a planta baixa, a terceira e o baixo cuberta do edificio das sindicais, por importe de 60.913,93 euros, para garantir a ampliación do actual centro de saúde.

Trátase dun proxecto que no seu día deu lugar ao pronunciamento do Parlamento Galego, no sentido de instar á Xunta a dialogar con Concello para chegar ao acordo, así como a reiteradas xestións, a todos os niveis, por parte do goberno co fin de incrementar ata un 40% o espazo construtivo do actual centro de saúde, unha necesidade que mesmo foi recoñecida polo propio Sergas.

Foi no seu momento a propia Dirección Xeral de Recursos Económicos a que falou da necesidade de ampliar as actuais instalacións “mediante a cesión dun terreo o ben mediante a cesión de espazos anexos xa construídos que puideran utilizarse para asistencia sanitaria”, unha petición que tivo como resposta por parte da corporación, o inicio do expediente para a adquisición das tres plantas que son propiedade da Xunta para, coas que xa son do Concello, ceder todo o inmoble á Consellería de Sanidade para aumentar unhas instalacións moi deficientes en moitos aspectos.

Desde o equipo de goberno destácanse as deficiencias estruturais no servizo de urxencias, así como a falla de espazos para dispoñer de salas de reunións, almacén, sala acondicionada para cirurxía menor, reubicación da área de pediatría e mesmo mellorar a accesibilidade á zona de consultas.

Uns 160 fogares de Cedeira, a maioría da zona rural, xa reciclan en orixe

Un total de 160 fogares de Cedeira, na súa maioría na zona rural, xa reciclan en orixe, segundo informa o goberno municipal, tras a adquisición das últimas vinte unidades de composteiros de 350 litros de capacidade, fabricados en materiais reciclados e con manuais didácticos de apoio. A devandita cantidade súmase aos 60 que xa estaban en funcionamento e aos 80 que, por iniciativa municipal, se levan adquiridos nos últimos tres anos.

Desde o executivo cedeirense vénse apostando por unha política respectuosa co medio ambiente, xa sexa coa substitución das lámpadas de vapor de sodio por outras de tecnoloxía led como polo tratamento en orixe do 42% da materia orgánica que vai das bolsas ao contedor.

Desta maneira tanto se están a evitar as emisións de CO2 á atmósfera como se reduce a frecuencia do servizo de recollida e o de transporte ata a planta de tratamento e diminúe a factura que o Concello ten que pagar a Sogama polo tratamento dos residuos. Ademais tamén se está a xerar compost e mesmo alimento para o gando.