MEDIO AMBIENTE

Cedeira promove catro xeorutas, roteiro polo casco vello e unha andaina a San Andrés para Semana Santa

CEDEIRA PROMOVE CATRO XEORUTAS, ROTEIRO POLO CASCO VELLO E UNHA ANDAINA A SAN ANDRÉS PARA SEMANA SANTA

Tres son as principais propostas de ocio que o goberno de Cedeira, a través da Concellería de Cultura e Turismo, está a programar cara aos días de Semana Santa.

Todas as actividades terán carácter gratuíto e darán comezo o mércores día 17 para alongarse ata o domingo 21. Durante este intervalo de tempo, as persoas que visiten Cedeira terán a posibilidade de descubrir a riqueza xeolóxica do municipio, percorrer o casco vello nunha iniciativa que os levará ata a ermida de San Antón ou facer a pé o camiño de San Andrés de Teixido para cumprir coa tradición de viaxar de vivos antes de facelo de mortos.

As coñecidas como Xeorutas, visitas guiadas de contido xeolóxico, volven cobrar protagonismo dentro dunha programación pensada para as familias e afeccionados á natureza e espazos ao aire libre. Haberá saídas o mércores, xoves, venres e sábado.

Día 17: Ruta do Litoral. Consiste nun paseo xeolóxico pola contorna do porto de Cedeira e da praia da Madalena e na que, ademais, se inclúe unha visita ao xacemento arqueolóxico da Punta Sarridal. De dificultade baixa e de tres horas de duración, a experiencia dará comezo ás 10.30 horas e finalizará ás 13.30 horas.

Día 18: Ruta Os Cantís. Con esta xeoruta existe a posibilidade de contemplar unhas impresionantes vistas panorámicas da Serra da Capelada, descubrindo así unha salientable estrutura xeolóxica de máis de 400 metros de altitude e rochas de hai millóns de anos. Ten unha dificultade baixa e a actividade levarase a cabo en horario de 16.00 a 19.00 horas.

Día 19: Ruta Praia de Areas Negras. Esta saída permite coñecer a que está considerada como a única praia de area negra non volcánica do planeta e tomar contacto cos cantís máis altos da Europa continental. Neste caso a dificultade é alta e a saída dará comezo ás 10.00 para finalizar ás 16.00 horas.

Día 20: Ruta do Cromo. Trátase dunha zona que xeoloxicamente destaca pola presenza de rochas moi pouco habituais na superficie do noso planeta. Asociadas a elas foron descubertas acumulacións de minerais de cromo e platino. É de dificultade baixa é prolongarase entre as 16.00 e as 20.00 horas.

O catedrático de Xeoloxía Francisco Canosa volverá a se poñer un ano máis- e xa van tres- á fronte destas saídas guiadas para acercar aos visitantes a riqueza xeolóxica que existe no termo municipal Cedeira e que fai do mesmo un dos promotores da creación do Xeoparque do Cabo Ortegal, xunto aos de Cerdido, Moeche, Ortigueira, Cariño, San Sadurniño e Valdoviño. As inscricións xa poden levar a cabo a través da oficina de Turismo (teléfono 981 482 187) e mesmo na páxina do Concello (www.cedeira.gal).

Esta programación inclúe dúas opcións máis. Así, para a xornada do xoves, día 18, haberá un roteiro guiado polo casco vello, no que os participantes coñecerán o centro urbano da vila, a ermida de San Antonio, o xacemento arqueolóxico do Sarridal, a castelo da Concepción e o porto pesqueiro, e para o do sábado, día 20, unha ruta a pé ata o satuario de San Andrés de Teixido. A primeira das citas sairá ás 11.00 horas, mentres e a segunda ás 10.00 horas. A asistencia segue a ser gratuíta e a oficina de turismo, situada na avenida de Castelao, será o punto de partida para ámbalas dúas actividades.

Este conxunto de iniciativas completarase así mesmo coas habituais visitas guiadas ao castelo da Concepción, que serán o mércores, xoves, venres, sábado e domingo en horario de mañá e tarde.

Por último anúnciase o cambio de horario da oficina de Turismo que xa está a funcionar desde o pasado 1 de abril, o que se traduce nun incremento de atención aos visitantes.

O horario é o seguinte:

de luns a venres, de 9.00 a 14.00 horas; de martes a venres tamén abre polas tardes (de 17.00 a 19.00 horas) e os sábados, de 11.00 a 14.00 horas.
Xoves Santo: de 9.00 a 14.00 horas e de 17.00 a 19.00 horas
Venres Santo: 9.00 a 14.00 horas
Sábado Santo: de 11.00 a 14.00 horas

O Ministerio de Transición Ecolóxica segue a dar novos pasos cara á recuperación da cetaria do Sarridal

O MINISTERIO DE TRANSICIÓN ECOLÓXICA SEGUE A DAR NOVOS PASOS CARA Á RECUPERACIÓN DA CETARIA DO SARRIDAL

A Subdirección General para la Protección de la Costa, dependente do Ministerio de Transición Ecológica, xa está a traballar nos trámites previos que darán lugar á recuperación da antiga cetaria do Sarridal. Así o confirmou o responsable do devandito organismo estatal, Ángel Muñoz Cubido, ao alcalde de Cedeira, Pablo Moreda Gil, nun encontro que tivo lugar onte en Madrid e que o rexedor valorou de xeito especial por tratarse “dunha actuación que contribuirá á posta en valor do patrimonio local e que ten moito interese cara ao sector turístico”.

O compromiso do responsable da Protección de la Costa pasa por axilizar ao máximo os informes e trámites pendentes coa fin de garantir o inicio dos traballos inmediatamente despois de que exista a consignación orzamentaria correspondente. Pola súa banda, o alcalde reiterou a oferta que se fixo desde a administración local no sentido de colaborar economicamente na execución dunhas obras cuxo importe actualizado podería superar os 300.000 euros. A achega municipal sería fixa, tal e como se ten acordado, pero aínda está sin determinar a súa cantidade.

O Concello ademais xa realizou o procedemento de impacto ambiental e, por parte da Demarcación de Costas, sometouse a exposición pública un proxecto que se atopaba paralizado desde o ano 2010 por unha decisión técnica e que consistirá na recuperación das estruturas existentes e en darlle accesibilidade ao lugar, moi próximo ao castelo da Concepción e mesmo tamén ao xacemento arqueolóxico no que foi localizada a quinta pedra formosa de Galicia.

O goberno municipal de Cedeira valora e aprecia o compromiso que o Ministerio de Transición Ecológica está a demostrar coa administración de Cedeira, tanto por parte do máximo responsable Subdirección General para la Protección de la Costa, Ángel Muñoz, como pola de Rafael Eimil e Carlos Gil no caso da Demarcación de Costas de Galicia. Esta colaboración xa deu lugar, o pasado mes de febreiro, á licitación da redacción do proxecto e o estudio de impacto ambiental da praia da Madalena, estimado en 110.000 euros e cun prazo de execución de 12 meses.

Cedeira licita por 98.508 euros a instalación do saneamento nos lugares de Casal de María e Vila do Río

CEDEIRA LICITA POR 98.508 EUROS A INSTALACIÓN DO SANEAMENTO NOS LUGARES DE CASAL DE MARÍA E VILA DO RÍO

O goberno de Cedeira vén de sacar a licitación a obra que dotará de saneamento aos núcleos de Casal de María e Vila do Río, dous lugares dos 24 que existen na parroquia de San Román de Montoxo.

O proxecto, licitado por 98.508,14 (IVE incluído), consistirá na canalización das augas residuais domésticas ata os colectores da EDAR ubicada na mesma parroquia. Así, no caso do lugar Casal de María, a intervención dará lugar á instalación de 807 metros de tubaxes e á creación dun total de 20 pozos prefabricados.

En Vilar do Río, pola súa banda, a obra para a posta en funcionamento do servizo require instalar 193,5 metros de canalizacións e a construción de 6 pozos.

O prazo de execución dos traballos é de oito semanas e o relativo á presentación de ofertas concluirá o día 4 do próximo mes de abril. As empresas interesadas poden consultar os contidos da oferta na páxina web do Concello (www.cedeira.gal), así como os relativos á contratación na Plataforma de Contratación do Sector Público.

O goberno municipal agradece a colaboración das entidades veciñais na demanda e realización deste tipo de iniciativas, que seguen ser das prioritarias para o executivo local.