Skip to content Skip to left sidebar Skip to footer

MEDIO AMBIENTE

O colexio de Cedeira converte un vello patio nun horto que pode usarse para dar clase

O CEIP Nicolás del Río transformou un vello patio, abandonado, nun horto e un espazo que pode usarse tanto con fins educativos -non só pola propia plantación senón porque incluíron unha lousa para poder impartir clase- como lúdicos, como lugar para os recreos. «Co tema do covid-19 pensamos que había que aproveitar todos os patios interiores, ao ter que dividir os grupos. Había un interior que non se usaba e co orzamento do colexio e, sobre todo, coa axuda do Concello de Cedeira e de Mobles García, cambiámolo todo», explica a directora, Marta Cameselle. Os traballos comezaron antes do verán e culminaron en agosto, da man de persoal municipal e dos propios docentes. Entre todos lograron acondicionar unha superficie duns 200 metros cadrados.

O resultado foi «ounha horta e unha serie de actividades de dinamización, cun bancal para cada curso, onde os alumnos van plantar algo que dea froita, flor e tamén verdura, segundo a temporada e vendo a súa evolución», sinala Cameselle. Tamén hai mesas circulares que, de momento, polas restricións da pandemia, só poderán utilizar os grupos de convivencia, para traballar ao aire libre. Con esta iniciativa, o colexio gaña unha actividade, o horto, e un espazo «para que todos os grupos poidan estar separados nos recreos cando fai bo tempo», apunta a directora. Hai outros tres patios, xa habilitados, entre os que se reparten os alumnos do centro.

Polo patio da horta pasarán todos os colexiais, de xeito periódico, primeiro para limpar as herbas malas e abonar, e despois para plantar e realizar un seguimento das distintas especies cultivadas. A maiores, o Concello instalou un compostero, onde os escolares depositan os restos de froita que van tirando nun cubo en clase.

Fonte da noticia e fotografía: La Voz de Galicia

IR Á LIGAZÓN O colexio de Cedeira converte un vello patio nun horto que pode usarse para dar clase

Cedeira superará os 200 composteiros coa entrega de trinta novas unidades

O Concello de Cedeira, en colaboración con SOGAMA, avanza no Programa de Compostaxe Doméstico coa entrega gratuíta doutros 30 composteiros.

Sumando estes novos cos adquiridos directamente polo Concello, o goberno municipal leva xa distribuídas máis 200 unidades entre a veciñanza. Só no último ano foron 60 as familias que se incorporaron a un proxecto que botou andar hai catro anos.

Os responsables municipais animan aos veciños e veciñas a participar nunha iniciativa para a que é necesario residir no municipio, dispor, alomenos, dun pequeno xardín ou horta e tramitar o modelo de solicitude xa dispoñible na web municipal www.cedeira.gal.

DESCARGA MODELO DE SOLICITUDE/ENTREGA DE COMPOSTEIRO DOMÉSTICO

Dada a situación actual da COVID-19 e coa intención de facilitar os trámites, a solicitude pódese presentar por rexistro (de 9.00 a 14.00 horas), enviala debidamente cuberta por sede electrónica sede.cedeira.gal ou facela efectiva a través de correo electrónico correo@cedeira.gal. O prazo de presentación xa está aberto e terán prioridade aquelas familias que non teñan participado en anos anteriores.

Desde a área municipal de Medio Ambiente recórdase que os composteiros son resistentes á intemperie, fáciles de montar e de sinxelo mantemento e que, ademais, permiten un maior control das condicións idóneas para facer compost e evitan algunhas das molestias do proceso como cheiros ou roedores, entre outras. Tamén se informa de que este ano, xunto aos recipientes, o persoal técnico de SOGAMA impartirá un curso de compostaxe na casa coa intención de mellorar os coñecementos do proceso e de aclarar posibles dúbidas.

Por outra banda, se fan constar as vantaxes ambientais, económicas do compost e se valora a recuperación dun método tradicional para aproveitar residuos xerados na casa. Neste sentido, infórmase de que preto do 40% do lixo dos fogares son restos orgánicos que poden ser aproveitados para obter un abono natural rico en nutrientes.

Cedeira mantivo o tirón turístico nun verán “atípico”

A pesar da pandemia, Cedeira mantivo o tirón no que a turismo se refire. Así o poñen de manifesto o balance de visitas guiadas ao castelo da Concepción, as persoas atendidas na oficina de Turismo e este ano, e por primeira vez, as que fixeron uso do punto de información situado ao pé do santuario de Santo André.

Durante a súa apertura pasaron por ese lugar cargado de tradición e lendas un total de 460 persoas, das que un 30% tiñan a Comunidade de Madrid como lugar de procedencia. A presenza de estranxeiros foi case testemuñal, situación que tamén se deu tanto na oficina de turismo como no castelo da Concepción.

Este monumento defensivo foi de interese para un total de 2.100 persoas que forman parte dos datos contabilizados entre a segunda semana de xullo e o 31 de agosto e que aínda están sen pechar ata que finalice o presente mes. Neste caso, o número de estranxeiros foi de 18, mentres que o resto dos viaxeiros estivo dividido entre galegos e veciños/as doutras comunidades autónomas.

No que se refire á oficina de turismo, na campaña de verán pasaron por este punto de información un total de 3.300 persoas a segunda quincena de xuño ata agora, sendo agosto o mes más produtivo en canto a demanda de información. Irlandeses, suízos e franceses foron os poucos estranxeiros que este verán se deixaron ver por Cedeira, localidade á que en moitos casos accederon por mar ou autocaravana. Madrid, País Vasco, Cataluña e Andalucía son as comunidades que supuxeron un saldo máis favorable en canto ao número de turistas que se achegaron ata a vila.

A concelleira de Turismo, Carmela Prieto Cal, valorou unha campaña que calificou de “atípica” e destacou o interese dos visitantes en coñecer desde o santuario de Santo André ata os traballos arqueolóxicos que se realizan no castro Sarridal. Carmela Prieto considerou que, en xeral, as persoas que visitan Cedeira consumen e valoran os servizos turísticos que o Concello lles ofrece e, neste sentido, destacou a ocupación ao 100% das Xeorrutas e a boa acollida que están a ter os roteiros que descorren polos os lugares máis emblemáticos do municipio.