MEDIO AMBIENTE

A Xunta de Goberno resolveu a adxudicación á empresa Instalaciones y Mantenimientos Mager do contrato de subministración de 539 lámpadas de tipo led para a sustitución das actuais en diferentes viais da zona rural de Cedeira. A actuación acométese con cargo ao programa da Deputación Provincial POS+2019 e marca un novo avance no plan do goberno local para dotar á vila dun sistema de iluminación pública máis eficiente e menos contaminante. “É un investimento -recordou o alcalde, Pablo Diego Moreda- que vai servir para aforrar a longo prazo, tanto no gasto municipal en enerxía eléctrica como tamén para reducir a contaminación ao medio ambiente”.

A oferta da empresa adxudicataria, a mellor valorada entre as cinco que recibiu o Concello, ten un presuposto de 29.578,45€. Instalaciones y Mantenimientos Mager vai ocuparse de subministrar as 539 lámpadas, coa súa correspondente garantía, pero será persoal municipal quen se ocupe da súa instalación.

As novas lámpadas led van substituír as vellas de vapor de sodio en cinco parroquias cedeiresas: nos lugares da Bouza e As Pontigas, na Regoa; nos lugares de Purrei, A Carballa, Campo do Hospital, As Vieiteiras, Cimadevila, Erbellas, Fraguela, Os Candales, Serantes e A Pasada na parroquia de Montoxo; en Ardeón, Sisalde Maior, Sisalde Cativo e Barral, na zona de Esteiro; nas Saíñas, Figaredo e Espasante, na parroquia de Cedeira, e na Trabe e Diamantel, na de Piñeiro.

A tecnoloxía led tradúcese no consumo de menos da metade de enerxía para producir a mesma cantide de luz que coas antigas lámpadas. Así, a renovación da rede de alumamento público fai que caiga sensiblemente a potencia necesaria, mellorando o rendemento e reducindo os costes de mantemento. Os novos puntos de luz non teñen mercurio, como os de vapor de sodio, e contaminan menos.

O Concello de Cedeira, que esta adherido ao Pacto dos Alcaldes polo Clima e a Enerxía, ten pendende de resolver outro importante proxecto para a renovación de 1.452 lámpadas da rede pública de iluminación da zona rural.

O Concello de Cedeira acaba de adxudicar dúas obras de mellora na rede de saneamento por valor de 215.929,16€, ambas as dúas con cargo ao programa provincial POS+2019. Trátase do proxecto para dotar de rede separativa a rúa Estrada e outras, por un lado, e da construción da rede de augas residuais na zona de Vilacacín, por outra. O alcalde, Pablo Diego Moreda Gil, explicou que é “un novo e importante esforzo no programa de investimentos financeiramente sostibles cos que o goberno local vai ampliando e mellorando o saneamento, para dar un mellor servizo á poboación e garantir tamén o coidado do medio ambiente”.

Nove ofertas presentáronse á primeira destas licitacións, entre as que resultou gañadora a da empresa Excavaciones y Canalizaciones Conde, cun orzamento de 155.939,16€ (IVE incluído). As obras, que teñen un prazo de execución de tres meses, van consistir en dotar de rede de saneamento separativa á rúa Estrada e as vías Valdoviño, San Sadurniño e Travesía da Praia, que cruzan á primeira perpendicularmente. O proxecto abrangue a demolición do colector existente e a construción dunha nova rede con separación de fecais e pluviais.

A segunda actuación recibiu unha decena de propostas. Trátase da extensión da rede pola zona de Vilacacín para dar servizo a 25 vivendas que actualmente carecen de saneamento municipal. Excavaciones Saavedra y López resultou adxudicataria desta licitación, á que concurriron dez empresas, cun presuposto de 59.990€ (IVE incluído). As obras, cun prazo de execución de dous meses, van consistir na colocación dunha tubaxe ao longo duns 640 metros, por viais de titularidade municipal, e a construción de 21 pozos de rexistro.