MEDIO AMBIENTE
AS AUGAS DE AREA LONGA E A MADALENA MANTEÑEN UN ANO MÁIS A CUALIFICACIÓN DE EXCELENTE
A calidade das augas nas praias de Area Longa e A Madalena de Cedeira manteñen un ano máis a nota de “excelente”, a máxima valoración que outorga o programa de Saúde Pública da Xunta de Galicia. O resultado dos novos informes sobre as zonas de baño confirma os bos resultados que chegaron por primera vez en 2020. Tal como recorda o alcalde, Pablo Diego Moreda Gil, os controis devolveron un “insuficiente” en 2011, 2012 e 2014, cun tímido “suficiente” en 2013. “O traballo feito polo goberno local comezou a dar os seus froitos, de maneira que o suficiente se mantivo de 2015 ata 2017, despois pasou a ben, e xa en 2020 as nosas praias acadaron o excelente”.
Desde o goberno local recordan que o coidado do medio ambiente é unha prioridade e que a tarefa concirne a todos e todas. A mellora da calidade das augas de baño está en relación coas obras de saneamento, que van ampliando a rede separativa no municipio; coa mellora da xestión de residuos, como por exemplo na recollida de aceites usados, e tamén coa sensibilización da cidadanía a través de diferentes campañas, como a que chamou a atención sobre os prexuízos de verter directamente aos sumidoiros.
O alcalde recordou a importancia do traballo da cidadanía neste eido e en particular de ARCE, a Asociación de Amigos dos Ríos de Cedeira, cuxas limpezas contribuíron a mellorar moito a situación do Condomiñas. Nomeou tamén Moreda Gil as xestións que o propio goberno local desenvolveu nos últimos anos diante doutras administración como Augas de Galicia ou Portos e que se traduciron en actuacións efectivas.
A FESTA DA PESCADA DE CEDEIRA RETÓMASE DESPOIS DE DOUS ANOS SEN PODER CELEBRALA COMO CONSECUENCIA DA PANDEMIA
Este ano o PROXECTO CEDEIXURA- PESCA DE COSTA, actuación conxunta na que participa a CONFRARÍA DE PESCADORES DE CEDEIRA e o CONCELLO DE CEDEIRA, promove a IV Festa da Pescada de Cedeira.
Unha das últimas actividades programadas nesta anualidade 2022, é a celebración da IV Festa da Pescada de Cedeira. Evento xa tradicional na vila e que non se poido celebrar durante dous anos pola pandemia. Nesta IV edición volve a destacar a pescada como un dos produtos máis representativos da pesca de baixura.
Durante tres anos o proxecto CEDEIXURA- PESCA DE COSTA promoveu e puxo en valor a pesca do día e as especies de grande calidade que se capturan no mar de Cedeira. Para conseguir este obxectivo se desenvolveron diferentes actividades implicando ao sector pesqueiro, a hostalería e a poboación en xeral coa promoción dos peixes e mariscos da súa costa.
Seguindo coa valorización do pescado e marisco capturados no día o domingo 19 de xuño e a partir das 12.00 horas celébrase na explanada da Confraría de Pescadores de Cedeira a IV Festa da Pescada, nunha carpa degustación habilitada para o evento. Nesta festa poderase degustar como prato estrela a pescada da costa cociñada de dúas formas diferentes, ademais de berberechos da ría de Cedeira e empanada de dúas clases, polbo e atún.
Este ano e como novidade farase un agasallo as 150 primeiras persoas que pidan pescada, cun prato de madeira deseñado para a ocasión con imaxes de pescados e mariscos típicos da gastronomía da vila.