CULTURA

MOVING COMPASS REPRESENTA ESTE SÁBADO EN CEDEIRA A MONTAXE DE TEATRO E MONICREQUES GAIA BABA

O Auditorio Municipal de Cedeira recibe este sábado a compañía Moving Compass, unha formación composta por xoves artistas procedentes do mundo do teatro físico, o circo, a danza, a música e as marionetas. Porá en escena a obra Gaia Baba, unha peza sen palabras e con música en vivo, que conta con monicreques a historia fantástica dun mundo devorado polos residuos. A función comezará ás 20.00 horas, con entrada gratuíta, e vai dirixida a todos os públicos.

Na obra, Moving Compass presenta un mundo frío, sen cor e cuberto de desperdicios. O lixo arrasou coa humanidade e seres sen piedade impóñense como os amos incontestables dunha terra erma. Pero queda alguén neste falmaguento mundo, unha meiga que varre sen descanso as ondas de lixo que sempre voltan. É Gaia Baba, que mantén a esperanza de que a natureza recupere os seus dereitos. A súa aventura comeza o día que, entre a sucidade, descobre aquilo que cría perdido para sempre.

O CONCELLO INVISTE MÁIS DE 19.000€ NA RECUPERACIÓN DA ANTIGA FONTE DA VILA DO RÍO, EN SAN ROMÁN

O Concello de Cedeira vai investir 19.069 euros na recuperación da antiga fonte da Vila do Río, na parroquia de San Román, contando con fondos propios e tamén con 10.000 euros procedentes dunha axuda xestionada diante do Instituto de Estudos do Territorio da Xunta de Galicia. Segundo explicou o alcalde, Pablo Diego Moreda Gil, a subvención autonómica corresponde a un programa para a corrección de impactos paisaxísticos, “polo que encaixa co plan de rehabilitación de fontes e lavadoiros que levamos adiante desde hai anos en Cedeira, coa convicción do valor arquitectónico e tamén social deste tipo de elementos tan singulares”.

A empresa Kaizen Management realizará as obras de albanelería e achega de materiais, mentres que Carpintería López y Villadóniga encargarase da estrutura de madeira da cuberta. O seu traballo, contratado por un presuposto de 10.306,49 e 8.762,83€ respectivamente, consistirá a roza da zona, a demolición da actual cuberta de pizarra e do entramado de cimbros de madeira que a sustentan, así como na limpeza da estrutura de formigón e o chapado dos paramentos e o solo con pezas irregulares de pizarra. Ademais, colocaranse novas vigas de madeira de abeto e un teito de pizarra, e repararanse o sumidoiro e as tubaxes correspondentes.

A fonte da Vila do Río súmase así ás da Barca, Fernando Lago, da Area e de Vilar, que xa rehabilitou o Concello. O goberno local de Cedeira pon de relevo a importancia patrimonial destes elementos, que foron tradicionalmente lugar de encontro e relación para a veciñanza, fundamentalmente para as mulleres, e que forman parte da intrahistoria da localidade.

O CONCELLO DE CEDEIRA ACTIVA UNHA CAMPAÑA DE SENSIBILIZACIÓN CONTRA A VIOLENCIA MACHISTA

O Concello de Cedeira convoca para este xoves, día 25, ás doce do mediodía, o acto de conmemoración do Día internacional contra a violencia machista. A corporación municipal fará lectura dun manifesto institucional, como en anos anteriores, para expresar o seu compromiso coa igualdade e o seu rotundo rexeitamento á violencia de xénero.

Con motivo da conmemoración do 25-N, o Concello de Cedeira ten activado unha campaña de sensibilización sobre os comportamentos de control e violencia emocional que a miudo se producen a través das redes sociais, e que nas idades da adolescencia se están asumindo con certa normalidade. As publicacións do Concello van dirixidas a poñer exemplos deste tipo de comportamentos advertindo que “isto tamén é violencia”.

A celebración do 25-N no Concello de Cedeira ten este ano como trasfondo a recente aprobación do Plan de Igualdade, no que hai un capítulo adicado á prevención e atención integral da violencia machista. Entre outras accións propostas, o goberno local ten previsto formar a un grupo de persoas voluntarias para a atención dun “Punto Violeta” ante posibles situacións de abuso no ocio nocturno, festas e eventos.