CULTURA

O PROXECTO DE XEOPARQUE CABO ORTEGAL PRESENTOUSE EN FITUR CO VÍDEO UNHA VIAXE AO INTERIOR DA TERRA

O proxecto do Xeoparque Cabo Ortegal foi presentado onte en Fitur nun acto no que se salientaron como principais valores da iniciativa a preservación dos valores naturais e paisaxísticos e o desenvolvemento económico sostible. O alcalde de Cedeira, Pablo Diego Moreda Gil, e a concelleira de Turismo, Carmela Prieto, participaron xunto aos representantes dos outros seis municipios implicados no proxecto, neste evento que foi conducido pola ferrolá Paula Vázquez e que contou tamén coa intervención do vicepresidente da Deputación, Xosé Regueira, e do vicepresidente da Xunta, Alfonso Rueda.

O evento acolleu a presentación do vídeo promocional do proxecto de Xeoparque Cabo Ortegal –que pode verse no link https://youtu.be/s_PQZEcXdyY, no que baixo o título Unha viaxe ao interior da terra se percorren oa espazos paisaxísticos e xeolóxicos máis destacados dos sete concellos. Proxectáronse tamén outros catro vídeos cos testemuños de persoas que viven e traballan no territorio, entre eles o de Isabel Loureiro, gandeira de Cedeira.

Xosé Regueira destacou que a zona é “un territorio único no mundo” e puxo como exemplos, precisamente, a praia cedeiresa de Teixedelo, con area negra non volcánica, e Santo André de Teixido, mentres que o alcalde de Cariño, José Miguel Alonso, actual presidente da Asociación Xeoparque Cabo Ortegal, salientou que a selección da candidatura, que chegou o pasado novembro, está a dar xa “unha proxección internacional moi potente”.

Moreda Gil destacou a importancia de participar en Fitur para a promoción turística e tamén desde o punto de vista técnico para o impulso do proxecto, xa que na feira participaron o Foro dos Xeoparques Españois e a Rede Mundial de Xeoparques da Unesco e este feito favoreceu reunións e consultas cada a preparación da documentación que é preciso rexistrar nesta fase de defensa da iniciativa, unha vez que xa é unha das candidaturas españolas ante o organismo internacional para acadar o recoñecemento.

OS SANANDRESIÑOS DE TEIXIDO SE FAN ESTES DÍAS EN VIVO E EN DIRECTO NA FEIRA FITUR

O artesán cedeirés Jorge Bellón leva estes días a Fitur a tradición dos sanandresiños. As coloridas figuriñas feitas con miga de pan de Santo André de Teixido ocupan, da súa man, un espazo no stand de Turgalicia na feira internacional de turismo que estes días se desenvolve no recinto de Ifema, en Madrid. Dous deses sanandresiños foron entregados onte como agasallo aos Reis de España, Don Felipe e Dona Letizia, no seu percorrido inaugural.

Foi a Xunta, a través de Turgalicia, quen quixo contar este ano por primeira vez coa artesanía de Santo André de Teixido no marco de Fitur. Desde o Concello, o alcalde Pablo Diego Moreda Gil celebrou este feito e agradeceu o interese que pon a directora xeral de Turismo, Nava Castro, na promoción do camiño a Teixido. O alcalde, que estes días está en Fitur para promocionar todos os atractivos da vila e para participar na presentación do proxecto de Xeoparque Cabo Ortegal –que terá lugar mañá venres- foi testemuña do moito que están a chamar a atención do público os amuletos típicos desta terra mística, ateigada de lendas, na que están os acantilados máis altos de Europa.

Jorge Bellón está a facer en vivo e en directo, no stand de Fitur, os sanandresiños. “Están a ter unha grande acollida, chaman moito a atención do público”, explicou o artesán, que onte entregou para agasallar aos Reis unha flor, símbolo do amor, e o peixe, o elemento máis característico, representativo do propio camiño ao santuario de Santo André. Segundo dixo, nos vindeiros días vai impartir uns obradoiros para grupos de entre oito e dez persoas que poderán facer tamén, coa súa axuda, as súas propias figuriñas.

SERVIZOS SOCIAIS PON DE NOVO EN MARCHA AS ACTIVIDADES GRATUÍTAS DE INFORMÁTICA E ZUMBA

A Concellería de Servizos Sociais do Concello de Cedeira inaugura o vindeiro día 7 as clases de Informática e Zumba Gold, ambas as dúas no marco do programa de actividades gratuítas que este departamento municipal dirixe ás persoas maiores para favorecer a socialización e mellorar a súa saúde física e mental. A concelleira responsable da área, Malena Pérez, subliña que son todas propostas que teñen unha grande acollida e destaca o feito de que se desenvolven na zona urbana e tamén nas diferentes parroquias, co devezo de achegarse a todas as persoas que son potenciais usuarias.

Así, as clases de Informática desenvolveranse en Cedeira en dúas quendas. Os luns e os venres haberá un grupo de mañá, de 11.00 a 13.00 horas, e os venres un de tarde, de 17.30 a 19.30 horas. En Esteiro e en San Román as clases serán os mércores, de 16.00 a 18.00 e de 19.00 a 21.00 horas, respectivamente. En Santalla a actividade programouse para os sábados, de 18.30 a 20.30, e en Montoxo será os domingos, de 16.30 a 18.30 horas.

En canto á actividade de Zumba Gold, a cita será no patio do CEIP Nicolás do Río cada luns e mércores ás 19.30, e os venres ás 19.00 horas.

Tamén chegan á zona rural as actividades de Ximnasia Terapéutica e o Taller de Memoria, que comezaron o pasado día 17 en Cedeira. No primeiro caso, as clases que imparte a fisioterapeuta Marta González celébranse os martes en Esteiro, ás 09.45h; e os xoves en Montoxo (09.30h), San Román (10.45h) e Santalla (12.00h). O Taller de Memoria, que ten lugar en Cedeira os luns e venres ás 16.00 e 17.30 horas, desenvólvese en Santalla (martes e xoves, 18.30h); Saa (mércores e xoves, 16.00h); Sisalde (martes ás 16.00 e mércores ás 17.15h); Montoxo (martes e xoves, 17.15h) e San Román (luns e venres, ás 19.00h).

Por outra banda, o 20 de xaneiro retomaranse os talleres de “Música sen enrugas”, de musicoterapia para maiores, que xa se estiveron impartindo en novembro e decembro. A cafetería do Auditorio acolle estas sesións, en dous grupos, os xoves ás 16.30 e ás 18.00 horas. A psicóloga Sara Abuín imparte tanto esta actividade como a que leva por título “Inspira”, que abrangue musicoterapia, mindfulness e xestión emocional, e que se vai desenvolver os mércores ás 18.30h.

As persoas interesadas poden inscribirse nestas actividades acudindo a Servizos Sociais –de 10.00 a 13.00 horas-. A concelleira Malena Pérez recorda que tamén hai prazas dispoñibles nos talleres de estimulación cognitiva que o Concello de Cedeira desenvolve a través dun acordo coa asociación AFAL e que se realizan todos os días, de cinco a sete da tarde, no segundo andar do Auditorio Municipal.