CULTURA

OS ORZAMENTOS PARTICIPATIVOS DESTINARANSE ESTE ANO Á REALIZACIÓN DE MELLORAS NA PISTA DO FLOREAL

A proposta de mellorar a iluminación e a pintura da cancha de xogo do Floreal foi a máis votada entre as cinco que este mércores se presentaron na asamblea dos orzamentos participativos, no salón de actos do IES Punta Candieira. Un total de 61 rapaces e rapazas dos catro grupos de terceiro de ESO protagonizan este ano a segunda experiencia deste tipo no municipio, que de novo vai traducirse no investimento de 20.000€ do presuposto municipal. Na mesma sesión o alumnado decidiu a representación de doce compañeiros e compañeiras que se encargarán de presentar o proxecto ao pleno da corporación municipal o vindeiro día 22.

A praza do Floreal é un espazo público moi frecuentado pola mocidade de Cedeira. Ten unha cancha de xogos cuxa pintura actual é moi esvaradiza e tampouco dispón de boa iluminación, o que fai que o tempo de xogo, especialmente nos meses de inverno, se acurte moito. A proposta está valorada en preto de 20.000€, polo que desta volta será só esta iniciativa a que se financie a través do programa, e consistirá na instalación dun novo alumado e a renovación da pintura do chan.

A seguinte proposta máis votada, entre as cinco que chegaron á asemblea, foi a titulada “Por unha praia divertida”, que propoñía o desenvolvemento de actividades como obradoiros de area, ioga, volei, petanca… na praia da Madalena durante o verán.

Porén, o proceso de orzamentos participativos serve para moito máis que para decidir estritamente o destino deses 20.000€. As sesións de traballo que se desenvolveron desde o pasado mes de febreiro serviron para que o alumnado aprendese como funciona a administración municipal e os seus órganos de decisión, para que vivisen un proceso de debate e para implicarse de maneira directa na elaboración dos proxectos e na súa presentación e defensa diante dos compañeiros e compañeiras.

Tal e como explicou Carmela Prieto, a concelleira de Participación e Mocidade, este ano quedou claro que o interese do alumnado estaba dirixido á procura de máis equipamentos e programas relacionados co lecer e o deporte ao aire libre. De feito, algunhas das ideas xurdidas dese diálogo entre o Concello e o alumnado van poder incorporarse á programación do Centro de Ocio Xuvenil, cuxa animadora sociocultural organiza o programa de actividades en función das suxestións que presenta a rapazada en mesas participativas.

Na mesma asemblea deste mércores, ademáis da proposta elixida, votouse a representación de doce mozos e mozas que irá o vindeiro día 22 a presentar o resultado do seu proceso participativo diante do pleno da corporación.

O AUDITORIO ACOLLE ESTE SÁBADO A REPRESENTACIÓN DA OBRA DE MANUEL MARÍA A LÚA VAI ENCUBERTA

O Auditorio de Cedeira acolle este sábado a representación da obra A lúa vai encuberta, un texto de Manuel María que por primeira vez é posto en escea polas compañías Incendiaria e A Quinta do Cuadrante. A peza xira arredor da historia de Galicia e a súa loita por conformar unha identidade propia, partindo do Estatuto de Autonomía do 36, truncado polo golpe de estado, e chegando ata a transición democrática. A función, que estivo programada en marzo pero foi adiada por enfermidade, comezará ás 20.00 horas.

“A lúa vai encuberta” é un texto que o autor chairego escribiu nos anos setenta e que non chegou a representarse. Incendiaria, unha compañía que se define como plataforma artística para a investigación arredor da creación escénica contemporánea, e A Quinta do Cuadrante, un grupo que sitúa como prioridade a procura de espectáculos nos que dialoguen diferentes disciplinas, uniron sus forzas para representala. A obra estreouse en Ourense en setembro de 2021, despois de gañar o II Certame Manuel María de Proxectos Teatrais.

A montaxe ten a Tito Asorey na dirección e a Vanesa Sotelo encargada da dramaturxia. Ambos os dous actúan xunto con Davide González e Melania Cruz.

Festa da Pescada

Por outra banda, desde o Concello recordan que este domingo, día 19, se celebrará na zona portuaria, nas inmediacións da Confraría de Pescadores, a IV Festa da Pescada. A celebración, organizada no marco do proxecto Cedeixura, exaltará este peixe preparado de dúas maneiras. O público poderá tamen degustar berberechos e empanada de polbo ou de atún. A festa comezará ás 12.00h e as 150 primeiras persoas que acudan recibirán un prato conmemorativo de madeira como agasallo.

“CEDEIRA MARIÑEIRA” ARRANCA O TRABALLO DE CAMPO PARA O DESEÑO DE NOVAS RUTAS QUE RECOLLAN O SABER MARIÑEIRO E VALORICEN O PATRIMONIO LITORAL

O Concello de Cedeira foi beneficiario da convocatoria do GALP da Consellería do Mar, na que se financiou ao 100% o proxecto “DEFINICIÓN, DESEÑO E IMPLEMENTACIÓN DE RUTAS TEMATIZADAS PARA A PROMOCIÓN DO PATRIMONIO MARIÑEIRO DO CONCELLO DE CEDEIRA –CEDEIRA MARIÑEIRA”.

CEDEIRA MARIÑEIRA persegue promover a oferta de experiencias e actividades que poñan en valor o medio ambiente e o patrimonio ligado ao mar (patrimonio material, arquitectónico, natural e patrimonio inmaterial), recoñecendo ao mesmo tempo os oficios do mar e a calidade diferencial dos produtos pesqueiros e marisqueiros desta zona.

O proxecto identificará unha serie de rutas tematizadas co propósito de concienciar sobre a necesidade da preservación da contorna natural e patrimonial, así como o recoñecemento dos oficios do mar (armadores, redeiras, mariscadoras, percebeiros, comercializadoras etc.), ademais dos produtos da lonxa e a súas características de frescura, sabor e identidade. Para elo arranca esta fase de traballo de campo en forma de xuntanzas cos membros da corporación técnica do concello e os informadores turísticos da OIT de Cedeira.

Por outra banda o “Club Candieira”, unha entidade local moi proactiva na execución de rutas de valorización do patrimonio nesta zona, colaborará co seu saber sobre o estado actual do territorio en canto a rutas que xa existen e outras que poderían ser de grande interese e de momento non están postas en valor.

A veciñanza e os grupos sectoriais da pesca da vila serán parte fundamental para a recompilación de datos para procesar e dar sentido e contido ao obxectivo deste proxecto: concienciar sobre a necesidade da preservación da contorna natural e patrimonial, así como o recoñecemento dos oficios do mar (armadores, redeiras, mariscadoras, percebeiros, comercializadoras etc.) e a calidade diferencial dos produtos pesqueiros e marisqueiros do territorio.

Estes meses de verán, coa identificación das rutas tematizadas para sendeirismo e BTT, e a elaboración de contidos, gravacións en audio e videotestemuñas, deseñarase material divulgativo cun total de 3.000 folletos, co ánimo de que chegue a información do proxecto a diversos públicos non tan asiduos ás ferramentas tecnolóxicas.

O material divulgativo distribuirase entre equipamentos municipais clave e establecementos da hostalería e restauración –moi implicados na vila de Cedeira con outros proxectos GALP como Cedeixura (Pesca de Costa), PescaturAcción e Emprende Pesca-.