CULTURA

O gastrobar O Amanexo foi o gañador do III Concurso de Tapas de Outono, convocado polo Concello de Cedeira para contribuír a dinamizar a hostalería da vila nun mes, o de novembro, tradicionalmente frouxo para o sector. Desde o goberno local estímanse unhas 5.000 tapas vendidas nos oito establecementos participantes e destacan o bo ambiente co que se viviu o certame, con pandillas percorrendo os establecementos e gozando coa creatividade, a orixinalidade e a calidade da cociña local.

A concelleira de Turismo, Carmela Prieto, e o técnico de Cultura do Concello, Quique Vázquez, entregaron onte ao cociñeiro do Amanexo, Miguel López López, o diploma que o acredita como o gañador do certame. O seu establecemento, que xa resultada gañador da primeira edición, vendeu do venres ao domingo un total de 1.250 tapas. O seu petisco estaba elaborado con rabo de boi desosado, feito no seu zume, con cantharellus, tubaeformis, parmentier e confitura de cabaza, cristal de grelo e bolecha de castaña.

A segunda tapa máis votada polo público foi a do Mesón O Mesón e a terceira a do Bar O Mástil. Emitíronse 300 votos –cada un deles garante que a persoa probou cinco petiscos- e ademais dos xa nomeados participaron no certame a Taberna Praza do Peixe, o Restaurante Brisa, a Taberna A Xunqueira, a Cervexaría La Central e a Pizzería Sheriff.

Desde o Concello de Cedeira felicitan a todos os establecementos participantes, que amosaron un amplio abano de opcións, ao tempo que animan aos negocios de hostalería que non o fixeron este ano a inscribirse o ano que vén para que a oferta sexa aínda máis rica e variada.

Entre as persoas que emitiron o seu voto, e que exerceron polo tanto de xurado, sorteouse unha cea para dúas persoas no local gañador, O Amanexo.

O Concello de Cedeira organiza o festival “Traz outro amigo também”, un certame creado para coidar e cultivar a arraigada afección pola música portuguesa que existe na vila. Nesta quinta edición, a viaxe ao son e os ritmos propios das melodías lusas virá da man de do Alberto Mvundi Grupo, unha formación angoleña, e de Nacho-Faia-Lar, tres líderes da vangarda musical galega que se unen para ofrecer unha mirada transgresora e contemporánea do repertorio de Zeca Afonso, unha de cuxas cancións da nome, precisamente, ao festival cedeirés.

O Auditorio Municipal acollerá este venres, ás 21.00 horas e con entrada libre, o primeiro concerto. O Alberto Mvundi Grupo, unha formación integrada por músicos angoleños afincados en Galicia, estará acompaña por Xico de Carinho -Quico Peña Vilar (Cariño, 1940)-, un harmonicista que leva 50 anos facendo música galego-portuguesa e que mesmo tivo ocasión de compartir escenario con Zeca Afonso. O seu espectáculo “Música desde Angola” está composto de cancións con ritmos de raíz angoleña misturados con influencias portuguesas.

Ao día seguinte, o sábado, chegará ao Auditorio Municipal o trío Nacho-Faia-Lar. Ás oito da tarde, e neste caso cunha entrada ao prezo de 2,5€, tres referentes da vangarda musical galega darán voz ao repertorio de Zeca Afonso. Nacho Muñoz, da agrupación de postpunk viguesa Igmir, ao teclado e electrónica; Faia Díaz, do proxecto de música tradicional De Vacas, á voz; e Lar Legido, do grupo Sumrrá, á batería, son os artífices desta orixinal revisión do artista portugués.