CULTURA

O PROXECTO DE CABO ORTEGAL CONVÉRTESE EN CANDIDATA DA UNESCO PARA AMPLIAR A REDE MUNDIAL DE XEOPARQUES

O goberno local de Cedeira quere expresar a súa satisfacción pola decisión da Unesco de incluír o proxecto de Xeoparque Cabo Ortegal entre as candidaturas para ampliar a rede mundial a partir de maio de 2023. O alcalde de Cedeira, Pablo Diego Moreda Gil, destacou que a proposta pasou o corte e da o paso definitivo para se converter nunha realidade.

A Unesco publicou o resultado da deliveración do Consello de Xeoparques Mundiais que se desenvolveu durante os pasados días 7 ao 9 de decembro, e que foi seguida atentamente, na parte que concerniu ao proxecto de Cabo Ortegal, polo alcalde de Cedeira e otros representantes dos sete concellos implicados. Pasaron o corte once das quince propostas que se examinaban: unha da República de Corea, unha de Xapón, dúas de Indonesia, unha de Irán, unha de Noruega, dúas de Brasil, unha de Reino Unido e unha de Grecia, xunto coa do Xeoparque Cabo Ortegal.

“A nosa proposta obtivo o voto unánime e claro do Consello, algo que nos enche de satisfacción porque refrenda a importancia xeolóxica da zona e tamén corrobora o esforzo realizado pola entidade de xestión do proxecto”, explicou Moreda Gil. O alcalde destacou que o proxecto de Xeoparque Cabo Ortegal cumpre todos os requisitos para facerse realidade o próximo ano, e subliñou que “obter o recoñecemento non remata coa tarefa, ao contrario, ser xeoparque significa adquirir un compromiso co territorio e co seu desenvolvemento sostible, é unha folla de ruta para crecer de forma equilibrada, para poñer en valor o noso, para valorarnos máis como unha zona cun patrimonio material e inmaterial extraordinario”, dixo Moreda.

“Entrar na rede mundial de xeoparques da Unesco vai marcar un antes e un despois para o sector turístico non só de Cedeira senón de todo o territorio”, resaltou o alcalde, apuntando que “xurdirán empresas e actividades que poderán ter a través do xeoparque un selo de calidade”.

Comunicado da Unesco: https://www.unesco.org/en/articles/unesco-global-geoparks-council-proposes-further-11-additions-network

Comunicado do proxecto de Xeoparque: https://proxecto.xeoparquecaboortegal.gal/o-proxecto-de-cabo-ortegal-proposto-oficialmente-para-ser-xeoparque-mundial-da-unesco-en-2023/

O POLIDEPORTIVO DE CEDEIRA CONVERTERASE NO CENTRO DE OCIO E DE XOGOS DURANTE ESTE NADAL EN CEDEIRA

A Audición de Nadal da Escola de Música, unha cita clásica no calendario cultural de Cedeira, abrirá o vindeiro xoves, día 22 de decembro, o programa festivo promovido polo Concello para animar as datas máis familiares e entrañables do ano. No cartel destaca o papel do Polideportivo Municipal, que vai acoller a pista de xeo que tanto éxito tivo o pasado ano e atraccións inchables e outros xogos, garantindo un amplio espazo a cuberto para o lecer das familias. Desde o goberno local deséxanlle a toda a veciñanza unhas festas felices na compaña dos seus e animan á xente de Cedeira e de municipios próximos a vir e gozar das actividades, así como a consumir no comercio local, onde –recordan- están a repartir xa rifas para o sorteo de 3.300 euros en premios.

O Auditorio será o escenario o xoves 22, a partir das 19.30 horas, da Audición de Nadal da Escola de Música, unha cita na que o alumnado amosa a súa evolución e que adoita ter moita concorrencia. Ao día seguinte, o venres 23, Cedeira recibirá a visita de Papá Noel. A agrupación local de Protección Civil ocuparase de organizar o seu percorrido en trineo polas rúas da vila, a partir das 18.00 horas. O paseo rematará na Praza Roxa, onde recibirá ás crianzas e se desenvolverá, para rematar, unha sesión DJ.

Desde o sábado 24, o primeiro día de vacacións escolares de Nadal, estará aberta a pista de xeo e o resto das atraccións no Polideportivo Municipal. A instalación permanecerá alí ata o 8 de xaneiro e será similar á que xa funcionou o pasado Nadal na Praza Roxa. Trátase dunha pista de xeo sintético, de 200 metros cadrados, sobre a que se poderán utilizar os patíns con coitelas que estarán a disposición do público de balde. A ubicación no polideportivo, este ano, permitirá ter a superficie de patinaxe a cuberto sen a carpa, favorecendo o xogo nunha zona protexida pero máis aberta. Xunto coa superficie para patinar, no polideportivo instalaranse xogos inchables, unha zona de obradoiros para nenos e nenas e un tobogán, atraccións que estarán atendidas por monitores e que conformarán un amplo espazo a cuberto e seguro para o lecer das familias.

Tamén no polideportivo, os días 26 e 27 de decembro, funcionará unha área de batallas “Nerf”. Trátase dun xogo moi popular no que nenos e nenas disparan dardos de espuma inofensivos. Para nenos e nenas máis pequenos, os días 28 e 29 de decembro haberá no mesmo lugar un tren eléctrico co que poderán pasar un rato moi divertido.

Xa o 30 de decembro, ás 20.00 horas, o Auditorio Municipal acollerá o Concerto de Fin de Ano da Banda de Música Vila de Cedeira, outra cita tradicional e que nunca defrauda ao público.

Para o 1 de xaneiro programou o Concello unha Festa de Ano Novo. A unha da madrugada, unha hora despois de tomar as uvas, comenzará na Praza Roxa unha verbena amenizada pola orquestra Olympus.

Para rematar, Cedeira recibirá aos Reis Magos o 5 de xaneiro. A súa Cabalgata percorrerá a partir das 18.00 horas as rúas da vila e irá a deterse no Auditorio Municipal, onde Melchor, Gaspar e Baltasar recollerán as cartas de nenos e nenas que queiran darllas en persoa. Durante esa tarde haberá tamén unha “Merenda de Reis” e xogos inchables no CEIP Nicolás do Río.

O CENTRO DE OCIO XUVENIL DE CEDEIRA RECIBE UNHA MEDIA DIARIA DE ENTRE 25 E 30 MOZOS E MOZAS

O Centro de Ocio Xuvenil tense consolidado desde a súa reapertura tras a pandemia, o pasado mes de abril, como un punto de referencia en Cedeira para rapaces e rapazas de entre 12 e 18 anos. Unha media de entre 25 e 30 mozos e mozas achéganse nas tardes dos venres, sábados e domingos a este lugar de encontro no que se asentou xa unha dinámica participativa e de convivencia da que van xurdindo interesantes propostas.

Unha educadora social e dinamizadora xuvenil, Nerea P. Carballeira, é a encargada de coordinar as actividades do Centro de Ocio Xuvenil e programalas atendendo ás inquitudes da rapazada. Tal como ela explica, o Centro de Ocio Xuvenil é un espazo de ocio libre, no que hai espazo aberto con sofás e mesas e tamén outra sala polivalente na que poden realizar tarefas en grupos máis reducidos. Os mozos e mozas teñen á súa disposición diferentes xogos de mesa, un billar, un futbolín e mesmo unha pequena “sala de música” equipada cun micro, teclado, un ordenador e un pad para facer gravacións cantando ou tocando algún instrumento.

O Centro abre de venres a domingos, entre as cinco e as oito da tarde, e o ocio discorre a ao seu propio criterio e tamén con actividades abertas a todo o conxunto de usuarios e usuarias e que parten das inquedanzas que eles mesmos expresan. Cada dous ou tres meses, a técnica convoca unha mesa de participación á que os rapaces e rapazas que queren van para facer as súas aportacións e expor cales son os temas que máis lles atraen. O grao de participación é moi bo, según conta Nerea P. Carballeira, que apunta que en xeral lles gustan moito os deportes e tamén senten interese pola igualdade, a música e, o que máis, o medio ambiente.

Atendendo ás suxestións da mocidade, o Centro de Ocio Xuvenil ten organizado campionatos de futbolín, de parchí ou de Jenga, por exemplo, actividades ás que se apuntan mozos e mozas de todas as idades, desde os 12 aos 18 e que son unha excelente oportunidade de interacción. O cine e a fotografía son tamén afeccións que a xuventude cedeiresa quere cultivar, polo que se promoveu unha saída para facer fotografías polo río Condomiñas coa colaboración da asociación ARCE, que aproveitou para explicar o seu traballo de recuperación do cauce fluvial.

Desa dinámica participativa xurdiu un obradoiro de graffiti que tivo unha alta participación e tamén o obradoiro de reciclaxe textil que se celebrou a pasada fin de semana, no que se esgotaron as oito prazas dispoñibles con catro rapaces e catro rapazas. As dúas mulleres emprendedoras de Longa Vida explicaron a contaminación que produce a industria da moda e os efectos que ten a fast fashion sobre o medio ambiente, para a continuación guialos na realización dun portamóbiles reutilizando teas xa usadas.

Nerea P. Carballeira explica que se organiza unha actividade ao mes, máis ou menos, e que para este novembro teñen prevista unha merenda-coloquio con motivo do 25N, para falar da violencia na adolescencia. Contarán coa presencia do equipo de igualdade do IES Punta Candieira. Un pouco máis adiante, o 10 de decembro, desenvolverán un torneo de ping-pong coa mesa que antes estaba no polideportivo municipal e que o Concello lles achegou.

A música é parte importante da vida no Centro de Ocio Xuvenil, como non podía ser doutra maneira en Cedeira. A coordinadora explica que cada día pon un fío musical no local, procurando fuxir dos estilos máis de moda entre a rapazada para que coñezan outros grupos e artistas, outros ritmos. Con esta proposta, bautizada como “Hoxe soa…”, os mozos e mozas van descubrindo e gostando de músicas que non forman parte habitual do circuíto das súas idades.

Para o vindeiro 17 de decembro teñen programada a última mesa de participación do ano, na que haberá ocasión para facer balance das últimas actividades e, sobre todo, para debullar novas ideas que darán vida ao Centro de Ocio Xuvenil nos seguintes meses.

O goberno local está moi satisfeito co funcionamento do Centro de Ocio Xuvenil e co traballo que está a desenvolver Nerea P. Carballeira, en palabras do alcalde, Pablo Diego Moreda Gil, “unha persoa moi responsable e comprometida coa mocidade, que está a impulsar unha dinámica moi boa e abrindo novas alternativas para o tempo de lecer da nosa xuventude”.