Skip to content Skip to left sidebar Skip to footer

CULTURA

A BIBLIOTECA MUNICIPAL DE CEDEIRA TEN 5.307 SOCIOS, UN NÚMERO QUE EQUIVALE A MÁIS DO 80% DA POBOACIÓN

A biblioteca municipal de Cedeira pechou o pasado año 2022 cun total de 5.307 socios, un número moi destacable en relación ao padrón de habitantes, 6.626 segundo a última e recente actualización. O servizo, que leva o nome do ilustre cedeirés López Cortón, rexistrou o pasado ano 111 novas altas e, como é habitual, unha intensa actividade . Desde o goberno local, o alcalde Pablo Diego Moreda Gil celebrou a vida que ten a biblioteca e a súa raizame na sociedade local, e destacou que nos últimos anos se ampliaron as instalacións para mellorar entre outras cousas a súa a accesibilidade, e que se foron facendo outros investimentos, como o máis recente destinado a novo mobiliario para a sala de lectura de prensa e o espazo infantil.

Durante o pasado ano a Biblioteca López Cortón contou 10.256 lectores (persoas que acudiron para estudar ou ler nas súas salas, facer consultas ou solicitar préstamos, ben sexan veciños e veciñas da vila ou veraneantes). O servizo ten un horario amplio, de luns a venres de mañá e tarde –de 08.00 a 14.00 e de 17.00 a 20.00 horas- e sábados pola mañá -de 10.00 a 13.00 horas- e conta cunha ampla colección de fondos, composta por 31.807 libros, xunto coa sección de revistas e películas tanto de adultos como infantiles. A biblioteca realizou, durante o último exercicio, 5.252 préstamos de libros (2.876 de adultos e 2.376 infantís).

A bibliotecaria, Ángeles Fernández, subliñou que o servizo está moi arraigado en Cedeira e que mantén unha liña de colaboración permanente cos centros educativos da vila. Ao longo do ano desenvolven o programa “Ler conta moito”, de dinamización da lectura e participan noutras actividades e propostas como foi a recente visita da “Maleta Viaxeira” do Ministerio de Igualdade. Pero ademáis a López Cortón conta desde o pasado 8M co seu propio “Punto Lila” adicado a lecturas de temática feminista acaídas para público de diferentes grupos de idade.

O goberno local destinou o pasado ano máis de 7.000 euros á compra de novo mobiliario para a sala de lectura infantil, así como á de adultos. Cómpre recordar que anteriormente investíranse uns 8.000€ no cambio do chan de madeira e mobiliario da sala máis antiga da biblioteca. A actuación máis importante levouse a cabo no anterior mandato, cando se destinaron máis de 200.000€ á ampliación das instalacións. Daquela anexionouse un inmoble contiguo ao antigo, de maneira que a biblioteca puido mellorar a súa accesibilidade e incorporar un ascensor, así como incrementar e poñer ao día outros equipamentos. Aquela ambiciosa intervención culminou coa pintura dun mural adicado a Rosalía de Castro nun lateral do edificio, unha obra que se ten convertido nunha icona do casco antigo cedeirés.

A ORQUESTRA OLYMPUS AMENIZARÁ UNHA VERBENA DE FIN DE FESTAS DE NADAL ESTE VENRES EN CEDEIRA

O goberno municipal de Cedeira reprogramou para este venres, día 6 de xaneiro, a verbena coa orquestra Olympus que tivo que ser suspendida na madrugada de Ano Novo pola adversa meteoroloxía. O evento transfórmase nunha festa de despedida das festas de Nadal, coa que o Concello quere brindar á veciñanza e ás numerosas personas que visitan a vila nestas festas, para reencontrarse con amigos e familia, unha oportunidade para gozar e divertirse xuntos.

Desta volta a verbena comezará ás 23.15 horas, nunha carpa disposta ao efecto na praza Roxa. A orquestra Olympus, unha das máis prestixiosas de Galicia, levará o seu espectáculo de música de diferentes estilos e baile á vila, xusto no arranque da súa nova xira 2023.

Cómpre recordar que hoxe a Cabalgata dos Reis Magos en Cedeira sairá do CEIP Nicolás do Río ás 18.00 horas, coas súas tres carrozas para Gaspar, Melchor e Baltasar. Realizará un percorrido polo casco urbano e irá ao Auditorio Municipal, onde recibirán aos nenos e nenas que queiran entregarlles as súas cartas. A continuación, sobre as oito, haberá unha merenda nas instalacións do colexio, na que se repartirá chocolate quente con roscón de Reis ou bola. Instalaranse xogos inclables para a cativada.

Para o sábado, día 7, está prevista a Carreira Popular de Nadal que tivo que ser adiada o pasado día 31. A cita lúdico-deportiva comezará na praza Roxa ás 16.00 horas, cun itinerario circular que pasará pola praza 18 de Decembro, o Camiño Real da Madalena, a rúa Salinas, a avenida de España e remate na praza Roxa. As persoas adultas realizarán dúas voltas ao trazado, mentres que as persoas que opten por facer unha andaina lúdica farán unha. É unha carreira na que moitas persoas participantes adoitan acudir con disfraces, subliñando o ambiente festivo da mesma. Ao remate da carreira sorteranse unha serie de cestas de Nadal entre as persoas participantes.

O POLIDEPORTIVO DE CEDEIRA SUMA HOXE E MAÑÁ A TODAS AS ATRACCIÓNS XA ABERTAS UNHA PISTA DE BATALLAS NERF

O Polideportivo Municipal de Cedeira bule de actividade nestas festas de Nadal. Alí está a pista de xeo, un tobogán xigante xunto a outras atraccións inchables e unha zona de obradoiros para as crianzas, actividades que funcionan todos os días, agás os festivos, de 12.00 a 14.00 e de 17.00 a 21.00 horas, totalmente de balde. A esta programación súmase hoxe e mañá unha proposta máis para a mocidade: as batallas Nerf.

No interior do pavillón montouse desde hoxe unha grande estrutura inchable en cuxo interior os xogadores e xogadoras poderán vivir as súas batallas con pistolas Nerf, que disparan pelotas de espuma. É unha actividade totalmente segura e lúdica, na que rapaces e rapazas xogan en equipo e desenvolven as súas estratexias, equipados con máscaras, chalecos e as devanditas armas de xoguete. Esta proposta, como todas as que se desenvolven no Polideportivo, é de balde.

Así, o campo de xogo para as batallas Nerf estará no Polideportivo hoxe e mañá, e o mércores e xoves chegará o tren infantil. Os máis pequenos poderán subirse aos seus vagóns e dar unha volta polo circuíto montado para a ocasión.

Ao longo de toda a semana, as actividades promovidas polo Concello no Polideportivo Municipal funcionarán de 12.00 a 14.00 e de 17.00 a 21.00h. Monitores e monitoras especializados encárganse de propoñer xogos na xona de obradoiros e tamén de organizar o acceso a todas as atraccións. Repártense patíns para deslizarse pola pista de xeo. Hai dispoñibles 150 pares con números que van do 25 ao 47. Cómpre recordar que a pista é de xeo sintético, un material que ofrece boas condicións para a práctica da patinaxe e que é máis sostible e respectuoso co medio ambiente.