INICIO DAS CLASES DE ZUMBA
O Concello de Cedeira informa do inicio das clases de zumba que, xunto ás de manualidades, pintura, confección de tapices, memoria e ximnasia terapéutica, forman parte do programa de actividades organizado polas concellerías de Cultura e Servizos Sociais para a presente temporada.
As clases, que deron comezo o pasado luns día 4, impartiranse regularmente os luns, mércores e venres na Sala Áncora, a partir das once da mañá.
O CICLO TEATRO FAMILIAR TEN UNHA NOVA CITA ESTE SÁBADO, DÍA 9, CO ESPECTÁCULO “RETRETE CABARETE”
O auditorio municipal de Cedeira acollerá o próximo sábado, día 9, unha nova cita co ciclo Teatro Familiar, unha convocatoria especialmente dirixida aos máis pequenos da casa.
Trátase do espectáculo “Retrete cabarete”, que consiste nunha recopilación de números curtos creados pola compañía El retrete de Dorian Grey, condensado en 50 minutos e sen palabras. A formación parte do teatro de obxectos e da comedia para dar vida a pequenos grandes formatos cheos de inventiva e poesía visual.
A representación dará comezo ás 18.00 horas e nela tomarán parte os actores Ezra Moreno e Marcos Carballido.
CEDEIRA ENCHE O INVERNO DE OBRADOIROS DE PINTURA, MEMORIA, XIMNASIA E TAPICES
O Concello de Cedeira enche o inverno de actividades gratuítas promovidas polas concellerías de Cultura e Servizos Sociais que, ademais de impartirse na vila, se trasladarán ás parroquias de Esteiro, Montoxo, Santalla e este ano, por primeira vez, tamén á de San Román. O programa inclúe pintura, manualidades, obradoiro de tapices, memoria e ximnasia terapéutica. O taller de tapices, polo de agora, só se fará na vila, e será os luns, en horario de catro a sete da tarde, no Palacete Municipal.
Desde o equipo de goberno se destaca a ampliación do programa coa incorporación da parroquia de San Román así como o incremento das propostas de ocio coa primeira edición do obradoiro de tapices. Esta última iniciativa vén de ter unha gran acollida por parte da veciñanza, e xa ten lista de espera. Tamén é intención do goberno completar estas convocatorias con clases de baile activo-zumba, que darán comezo un pouco máis adiante.
Os horarios son os seguintes:
–Pintura, en Cedeira (nas Sindicais) os luns e martes de 10.00 a 13.00 horas, os mércores de 18.30 a 21.00 horas e os xoves de 19.00 a 21.30 horas . No Colexio Nicolás del Río serán os venres, entre as 16.00 e as 18.00 horas.
En Santalla, as clases de pintura serán os mércores de 16.00 a 18.00 horas; en Montoxo, os venres de 18.30 a 21.30 horas, e en San Román os venres pola mañá, de 10.30 a 12.30 horas.
–Manualidades, en Cedeira (praza da Reitoral) os martes e venres en horario de 19.00 a 21.00 horas.
–Memoria, en Cedeira (na biblioteca da cafetería do auditorio) os luns e venres ás 16.00 horas e ás 17.30 horas; en Esteiro-Saa, os mércores e xoves ás 16.00 horas; en Esteiro-Sisalde, martes ás 16.00 horas e mércores ás 17.15 horas; en Montoxo os martes e xoves ás 17.15 horas; en Santalla os martes e xoves ás 18.30 horas, e en San Román os luns e venres ás 17.30 horas.
–Ximnasia terapéutica, en Cedeira (biblioteca da cafetería do auditorio) os martes ás 11.00 horas e tamén os martes, ás 9.45 horas, en Esteiro, mentres que os xoves serán en Montoxo, San Román e Santalla, ás 9.30, 10.45 e 12.00 horas, respectivamente.