Skip to content Skip to left sidebar Skip to footer

SERVICIOS SOCIAIS

CAMPAMENTO URBANO DE NADAL 2023 DO CONCELLO DE CEDEIRA

Este campamento de Nadal ten a finalidade de facilitar unha alternativa de ocio para as nenas e nenos promovendo así a conciliación familiar durante as vacacións de Nadal. As actividades que se desenvolverán terán carácter lúdico: xogos, obradoiros de refugallo, actividades deportivas, etc.

Dispón de 60 prazas e resérvanse 5 prazas para nenos e nenas con discapacidade igual ou superior ao 33%. Se desenvolverá os días 22, 26, 27, 28 e 29 de decembro e 2, 3, 4 e 5 de xaneiro.

O campamento urbano de Nadal está destinado a nenos e nenas nados entre os anos 2011 e 2018, ambos incluídos e desenvolverase no CEIP Nicolás del Río. O horario será de 09:00 a 14:00 horas, de luns a venres.

O prazo de presentación de solicitudes será de 7 días hábiles a contar a partires do día seguinte ao da publicación das presentes bases no taboleiro de anuncios dixital.”

Pódese descargar as bases campamento urbano de Nadal 2023 na seguinte ligazón:

Descarga PDF Bases campamento nadal 2023

CEDEIRA COMPLETA A INTEGRACIÓN DA POLICÍA LOCAL NO SISTEMA VIOGÉN DE PREVENCIÓN DA VIOLENCIA DE XÉNERO

A Xunta de Goberno do Concello de Cedeira acaba de aprobar o convenio que completa a integración da Policía Local no sistema Viogén de protección ás mulleres vítimas de violencia de xénero. No pasado mes de marzo o alcalde Pablo Diego Moreda Gil asinara xa coa Delegación do Goberno o protocolo de adhesión ao sistema, paso previo necesario para establecer agora o convenio que fará efectiva a súa implantación.

O sistema Viogén creado polo Ministerio de Interior permite, a través dunha aplicación informática, integrar toda a información policial, xudicial ou penitenciaria de interese, aportada por todas as institucións e forzas de seguridade que teñen competencias en materia de violencia de xénero. A integración dos corpos policiais municipais permite que estes axentes fagan o seguemento de situacións consideradas de risco baixo, mentres que a Garda Civil se encarga dos casos activos clasificados como de maior perigo. O cruce de información, a través da aplicación á que agora vai ter acceso a Policía Local de Cedeira, considérase esencial para garantir unha actuación máis eficaz na prevención de novos casos de violencia de xénero.

É de especial interese a colaboración da Policía Local na rede de prevención de novos casos de violencia de Xénero porque é o corpo de seguridad máis próximo á cidadanía e que mellor coñece á veciñanza. O convenio que vai establecer o Concello de Cedeira co Ministerio do Interior establece o marco para a habilitación dos axentes municipais como usuarios da aplicación Viogén, a formación dos mesmos no uso desta ferramenta e a adecuación dos sistemas informáticos.

O CONCELLO DE CEDEIRA REXEITARÁ NESTE 25N A VIOLENCIA CONTRA AS MULLERES CUN MINUTO DE RUÍDO

O Concello de Cedeira conmemorará este sábado o Día Internacional da Eliminación da Violencia contra as Mulleres cun acto institucional no que se lerá un manifesto e se fará un “minuto de ruído” polas vítimas. Trátase de non silenciar o problema, tal como explicou Lucía Picos, a concelleira de Igualdade, e de expresar a rabia e a carraxe ante esta lacra. Neste acto, que terá lugar ás 19.00 horas no Auditorio Municipal, as voluntarias do Punto Lila lerán fragmentos do libro “Comezar desde cero”, no que a educadora social Tania Merelas recolle as voces de mulleres no proceso de recuperar as súas vidas despois da violencia machista.

Tamén o mesmo sábado 25 están programados actos de sensibilización contra a violencia contra as mulleres no Centro de Ocio Xuvenil. Alí, rapaces e rapazas de 12 a 18 anos están invitadas a asistir, ás 17.30 horas, á proxección da curta “Violencia invisible”, de María Giséle Royo. A cinta, premiada no Festival de Cine de Mulleres de Berlín, aborda situacións de violencia psicolóxica de xénero, unha parte que moitas veces queda oculta ou esquecida baixo o global do problema. Tras o pase comezará unha merenda-coloquio na que participará o equipo Faro da Igualdade do IES Punta Candieira.

No marco da conmemoración do 25N o Concello de Cedeira tamén impulsou a instalación, na entrada e no vestíbulo do Auditorio Municipal, dunha exposición creada polo alumnado do ciclo de Edición de Publicacións do IES de Leixa. Nela aparecen siluetas de mulleres colgadas polos pés, con frases de cancións coñecidas que teñen unha dramática lectura baixo o foco da violencia machista.

Ata o Auditorio Municipal achegáronse esta mañá os alumnos e alumnas de 4º e 5º de ESO do IES Punta Candieira, para asistir á representación da obra “Vestido de voda”, unha peza de teatro social especialmente dirixida a promover a reflexión sobre a igualdade, os estetetipos de xénero, os mecanismos polos que se exerce o poder… todo a través do diálogo e a participación do público.