Cedeira demanda da Xunta un centro de día cunha campaña de recollida de firmas

CEDEIRA DEMANDA DA XUNTA UN CENTRO DE DÍA CUNHA CAMPAÑA DE RECOLLIDA DE FIRMAS

O Concello de Cedeira vén de poñer en marcha unha campaña de recollida de sinaturas demandando á Xunta a creación dun centro de día no municipio, “por carecer a día de hoxe dun centro público que dea apoio nin aos 125 veciños declarados dependentes nin ás persoas que teñen que exercer o papel de coidadoras”.

O goberno municipal conta co apoio e a colaboración do movemento asociativo para levar a cabo o devandito propósito. De feito, a veciñanza que desexe secundar esta iniciativa pode facelo nas sedes sociais de Eixil, Sobre rodas, Rondalla de Cedeira, Virxe do Mar, Veciñanza de Piñeiro, Discalz@s polo Festival, Amas de Casa, Vila de Cedeira, Robaleira, Museo Mares de Cedeira, Patchwork de Cedeira, Asociación de Maiores, Cultural Garola, Acordeóns de Cedeira, Tarroiba, Coral Herbeira e Aturuxeiras, así como no propio Concello, no Palacete, na oficina dos Servizos Sociais e máis no polideportivo.

A través do escrito que xa se está a repartir, o executivo local tamén pon de manifesto o seu compromiso de colaborar coa Xunta na realización do proxecto poñendo á súa disposición os terreos necesarios para a realización dunha obra que “axudaría a solucionar os problemas de atención e coidado que requiren as persoas dependentes e as consecuencias que acaban sufrindo as coidadoras”.

Cedeira construirá novos vestiarios no campo de fútbol para favorecer a igualdade de xénero

CEDEIRA CONSTRUIRÁ NOVOS VESTIARIOS NO CAMPO DE FÚTBOL PARA FAVORECER A IGUALDADE DE XÉNERO

O Concello de Cedeira leva o tema da igualdade de xénero ás instalacións deportivas. O goberno municipal vén de contratar por 59.502,33 euros á empresa Mecano, Obras y Reparaciones SL para a construción de novos vestiarios no campo de fútbol municipal do Beco. A obra virá completar a edificación existente fronte aos terreos de xogo, respectando a tipoloxía, alturas e mesmo as súas características estéticas.

O prazo de execución da obra é de dous meses e a realización da mesma obedece a necesidade de adecuar as instalacións á incorporación da muller á práctica regular do fútbol. A realidade, segundo apuntou o alcalde, Pablo Moreda Gil, “é que a presenza feminina é cada vez maior en todas as categorías”. A vila conta ademais cun equipo, Discalzas Cedeira SD, que está a competir na liga Feminina de Fútbol 8.

A idea é permitir o uso diario dos dous campos de fútbol oito e suplir as carencias que había con respecto á ultilización dos vestiarios por parte das xogadoras.

O proxecto consiste na construción de dous vestiarios, cunha superficie útil de 82 metros cadrados cada un deles e con capacidade para un mínimo de 15 usuarios á vez. Haberá zona de entrada, espazos para as duchas -unha para cada tres persoas-, cabinas accesibles, bancos, aseos, lavabos e taquillas con chave.

A realización deste proxecto forma parte das actuacións levadas a cabo desde o goberno municipal para mellorar as instalacións deportivas, por considerar que tamén así se está a promocionar o deporte. Esta política deu lugar hai pouco á compra de bicicletas verticais e de spinning para o ximansio, a obras de mantenimiento e mellora do sistema de auga quente no pavillón polideportivo, á erradicación de humidades e á substitución dos bancos soterrados utilizados por adestradores e xogadores suplentes no campo de fútbol de O Beco. O investimento rondou os 40.000 euros.

Cedeira conmemorará este domingo o 25-N cunha concentración diante do Concello

CEDEIRA CONMEMORARÁ ESTE DOMINGO O 25-N CUNHA CONCENTRACIÓN DIANTE DO CONCELLO

O goberno de Cedeira conmemora o 25 de novembro ese mesmo día -o domingo- cunha concentración na praza do Concello, coa lectura dun manifesto e con actuacións musicais a cargo de Iría e Dopazo.

Ademais xa foron colgadas pancartas dos edificios municipais -Concello, Palacete, Polideportivo e Servizos Sociais- e distribuironse carteis cos lemas “Cedeira en Negro”, “Non abuses”, “Non Violes” en negocios, comercios e locais de hostalería. As persoas que o desexen tamén poderán vestir de loito en sinal de dor por todas as mulleres mortas e polas que están a sofrer violencia.

O executivo local invita á veciñanza a secundar unha iniciativa que dará comezo ás doce do mediodía e na que tamén tomarán parte representantes da corporación.

O Concello tamén colabora co Club de Remo da localidade na celebración dun “adestramento contra a violencia de xénero” que terá lugar mañá sábado e que incluirá un minutos de silencio con remos en alto en homenaxe ás vítimas e un percorrido marítimo polo conxunto das embarcacións participantes. A actividade dará comezo ás 16.30 horas e terá o seu punto de partida fronte O Ramón.

O Concello de Cedeira participa, xunto a outras 101 administracións locais e as Deputacións da Coruña, Lugo e Pontevedra, na campaña “En Negro contra as Violencias” co obxectivo de sensibilizar á poboación respecto da situación de violencia na que viven moitas mulleres e para poñer nas axendas a agresividade machista como un problema público e que afecta a toda a cidadanía.

Desde o ano 2008, as cifras oficiais rexistran 619 asasinatos machistas no conxunto do Estado e 43 en Galicia e, no que vai de ano, a violencia contra as mulleres acabou coa vida de 10 menores.

O Concello compra camas xeriátricas para ceder gratuitamente aos usuarios dos servizos sociais

O CONCELLO COMPRA CAMAS XERIÁTRICAS PARA CEDER GRATUITAMENTE AOS USUARIOS DOS SERVIZOS SOCIAIS

O Concello de Cedeira vén de adquirir un total de dez camas xeriátricas con carro elevador para usuarios dos Servizos Sociais co fin de complementar a prestación domiciliaria a persoas con escasos recursos. O importe do contrato, adxudicado á empresa Coloro SL, ascendeu a 13.550 euros (IVE incluído).

A concelleira de Servizos Sociais, Manuela López Rodríguez, sinalou que as catro primeiras camas xa foron entregadas e adiantou que é intención do goberno municipal ampliar o subministro coa adquisición de dez unidades máis con cargo aos orzamentos do próximo ano. López Rodríguez avaliou esta decisión na demanda existente e na necesidade de substituír as actuais polo mal estado no que se atopan. Neste sentido, a concelleira explicou que as que agora están en uso foron cedidas no seu día polo Sergas con motivo da reforma do complexo sanitario Arquitecto Marcide.

Os usuarios de Servizos Sociais que por enfermidade ou convalecencia necesiten unha cama xeriátrica só terán que cumprimentar a correspondente solicitude para ter acceso a unha delas. O Concello de Cedeira cederá o equipamento de maneira gratuíta durante o tempo que sexa necesario.

Información sobre as bonificacións e exencións no canon de auga e coeficiente de vertedura

INFORMACIÓN SOBRE AS BONIFICACIÓNS E EXENCIÓNS NO CANON DE AUGA E COEFICIENTE DE VERTEDURA

O Concello de Cediera quere facer chegar aos veciños e veciñas toda a información sobre as bonificacións e exencións existentes no pago do canon de auga e coeficiente de vertedura recollidas na normativa e aplicables ao Concello de Cedeira.

As situacións polas que se poden solicitar ás bonificacións e exencións son:

  • Número de habitantes por vivenda.
  • Situación de exclusión social.
  • Familia numerosa.

A continuación, pode consultarse información sobre estos tres supostos:

  • Número de habitantes por vivenda.

O cálculo do canon de auga e coeficiente de vertedura faise por defecto presupoñendo que a vivienda está habitada por 3 persoas. De non ser ese o caso, os interesados deberán acreditalo.

Nas seguintes ligazóns pode acceder á información necesaria para a realización dos trámites para acreditar un número diferente de habitantes na vivienda, esto é, os artigos aplicables do regulamento, o modelo de solicitude que debe cubrirse para acreditar o número de persoas que habitan a vivienda, e a ligazón para a presentación telemática da solicitude.

IR Á LIGAZÓN Decreto 136/2012, do 31 de maio, Regulamento do canon da auga e do coeficiente de vertedura. Artigos 21 e 22.

DESCARGAR PDF Solicitude de acreditación do número de persoas na vivenda para aplicación do canon da auga e coeficiente de vertedura

IR Á LIGAZÓN presentación telemática da solicitude de acreditación do número de persoas na vivenda para aplicación do canon da auga e coeficiente de vertedura (REQUIRE FIRMA ELECTRÓNICA)

  • Exención por situación de exclusión social.

As unidades de convivencia que acrediten estar en situación de exclusión social poden solicitar a exención do canon da auga e coeficiente de vertedura (os ingresos totais non deben superar o IPREM).

Nas seguintes ligazóns pode acceder á información necesaria para a realización dos trámites para solicitar a exención do canon por situación de exclusión social, esto é, os artigos aplicables do regulamento, o modelo de solicitude que debe cubrirse, e a ligazón para a presentación telemática da solicitude.

IR Á LIGAZÓN DECRETO 136/2012, do 31 de maio, Regulamento do canon da auga e do coeficiente de vertedura. Artigos 25 e 26.

DESCARGAR PDF Solicitude de exención do canon e coeficiente por situación de exclusión social

IR Á LIGAZÓN presentación telemática da solicitude de exención do canon por situación de exclusicón social (REQUIRE FIRMA ELECTRÓNICA)

  • Deducción das cuotas ás familias numerosas.

As familias numerosas teñen dereito a unha dedución do 50% sobre a cota íntegra do canon na vivenda principal, para o que os interesados deberán acreditar a condición de familia numerosa.

Nas seguintes ligazóns pode acceder á información necesaria para a realización dos trámites para solicitar a deducción por familia numerosa, esto é, os artigos aplicables do regulamento, o modelo de solicitude que debe cubrirse para a deducción por familia numerosa, e a ligazón para a presentación telemática da solicitude:

IR Á LIGAZÓN DECRETO 136/2012, do 31 de maio, Regulamento do canon da auga e do coeficiente de vertedura. Artigos 23 e 24.

DESCARGAR PDF Solicitude de dedución no canon da auga e no coeficiente de vertedura para familias numerosas

IR Á LIGAZÓN presentación telemática da solicitude de dedución no canon da auga e no coeficiente de vertedura para familias numerosas (REQUIRE FIRMA ELECTRÓNICA)

Os formularios deben dirixirse a Augas de Galicia. Aqueles interesados en facer o rexistro das solicitudes presencialmente (non vía rexistro electrónico) poden facelo en calquera oficina da Xunta de Galicia. En Cedeira, pode facelo nas oficinas do rexistro municipal do Concello (a través do SIR), ou na Oficina Agraria Comarcal de Cedeira (Calle Pontenova, s/n. Horario de luns a venres de 9.00 h a 14.00 horas).

Charla sobre educación viaria, o martes no auditorio municipal

CHARLA SOBRE EDUCACIÓN VIARIA, O MARTES NO AUDITORIO MUNICIPAL

O martes, ás 12.00 horas, ofrecerase unha charla sobre seguridade viaria na biblioteca do auditorio municipal. A Dirección Xeral de Tráfico, a Policía Local e o Concello colaboran nesta iniciativa. A coordinadora de educación viaria da JPT Coruña impartirá a sesión informativa e todos os asistentes recibirán un chaleco reflector ao finalizar. Gratuíta.

Fonte: La Voz de Galicia

Pode consultar a nova na seguinte ligazón:

IR Á LIGAZÓN Charla sobre educación viaria, o martes no auditorio municipal

Xantar bingo solidario

XANTAR BINGO SOLIDARIO

A beneficio da AECC co motivo do “Día Mundial do Cancro de Mama”, a Asociación Española contra o Cancro de Cedeira en colaboración co Concello, organiza un “Xantar – Bingo” solidario o domingo 28 de outubro, ás 14.30 horas na cafetería do Auditorio Municipal.
O prezo do xantar será de 20€, e require inscrición previa, que debe realizarse na Cafetería do Auditorio antes do 26 de outubro.

Cedeira convoca un curso gratuíto de informática para persoas maiores

CEDEIRA CONVOCA UN CURSO GRATUÍTO DE INFORMÁTICA PARA PERSOAS MAIORES

O Concello de Cedeira vén de abrir o prazo de inscrición para que as persoas maiores poidan poñerse ao día no que ao mundo da informática se refire.

Trátase dunha actividade pensada para que a xente maior aprenda a manexar un ordenador, teña a posibilidade de crear un documento ou simplemente poida navegar por internet, entre outros contidos. É un curso de coñecementos básicos, tal e como se destaca desde o goberno municipal, ten carácter gratuíto e unha duración de trinta horas. As clases son de dúas horas.

As persoas interesadas deben apuntarse na Oficina de Turismo (Palacete municipal), mentres que a actividade se impartirá na aula de usos múltiples situada no pavillón municipal. Non haberá máis de 15 persoas por grupo e a posibilidade de trasladar a actividade ás parroquias só depende do número de participantes, que nunca poderá ser inferior a dez.

O Concello de Cedeira abre o prazo para as actividades dirixidas ao colectivo da terceira idade

O CONCELLO DE CEDEIRA ABRE O PRAZO PARA AS ACTIVIDADES DIRIXIDAS AO COLECTIVO DA TERCEIRA IDADE

O Concello de Cedeira abre o prazo de inscrición para as persoas que desexen incorporarse ás actividades organizadas pola Concellería de Servizos Sociais para o colectivo da Terceira Idade cara á presente tempada. Son ximnasia terapeútica, baile activo e obradoiro de memoria.

Tal e como ocorrera nas pasadas edicións, os programas impartiranse tanto na vila como na zona rural, agás a actividade de baile activo, que só se levará a cabo na sala Áncora. Esta dará comezo o día 17 e será os luns, martes e xoves en horario de once a doce da mañá.

Ese mesmo día tamén botarán a andar os obradoiros de memoria. Neste caso, a vila acollerá a actividade os luns e venres en dúas quendas, pola gran demanda. Así, a primeira será ás 16.00 horas e a segunda, a partir das 17.30. Por súa parte, en Sisalde estes obradoiros serán os martes (16.00 horas) e mércores (17.15); en Montoxo, martes e xoves (17.15 horas), en Santalla, martes e xoves (18.30 horas), e en Esteiro (Saa), mércores e xoves, a partir das catro da tarde.

O programa de ximnasia terapéutica arrincará o próximo mércores, día 12, con clases ás 9.30 horas en Montoxo, ás 10.45 horas en Santalla e ás 12.00 en Cedeira. Esta actividade sempre será os mércores.

A concelleira de Servizos Sociais, Manuela López Rodríguez, invita á poboación maior a participar nun programa co que se quere evitar o illamento das persoas maiores, así como mellorar a súa condición física e mental. López Rodríguez apuntou que só terán que anotarse as persoas que se incorporan este ano ao programa e o terán que facer nas oficinas dos Servizos Sociais.

Veciños, políticos e profesionais da sanidade pública volveron esixir máis persoal para o centro de saúde

VECIÑOS, POLÍTICOS E PROFESIONAIS DA SANIDADE PÚBLICA VOLVERON ESIXIR MÁIS PERSOAL PARA O CENTRO DE SAÚDE

Onte, como xa tiña pasado o día 11 de outubro do ano pasado, a veciñanza de Cedeira, máis os políticos e o persoal do centro de saúde volveron ocupar a rúa Zumalacárregui para denunciar as carencias que afectan ao centro médico e para esixir dos responsables do Sergas que lles dea unha solución. Tamén se atopaban presentes membros da plataforma “PACs en guerra” nunha concentración que arrincou pasadas as 11.30 horas.

O equipo de goberno recordou que o número de médicos pasou de cinco a tres no último mes e que este ano se está a repetir a situación de compartir con Valdoviño a consulta de pediatría, polo que no caso de Cedeira queda reducida a tres horas os martes e xoves.

Esta situación, que tamén está a xerar listas de espera de ata sete días, responde “á política de recortes que se está aplicar desde a Xunta”, e está a afectar tanto aos profesionais da medicina como aos propios usuarios da sanidade, di o goberno local. Ademais de esixir que a sanidade sexa pública, universal e gratuíta, os responsables municipais de Cedeira lembraron aos presentes a importancia de presentar reclamacións, “porque fan forza”, e apuntaron que as urxencias no PAC aumentaron un 40% nos últimos dez anos a pesares da perda de poboación duns 700 veciños no mesmo período de tempo.

Desde a plataforma “PACs en guerra” agradeceuse a resposta da veciñanza porque axuda a “forzar que muden as cousas” e a que os profesionais da saúde pública poidan ter unhas condicións dignas. Neste sentido, apuntouse que o 70% do tempo anual o PAC ten unha cobertura sanitaria de mínimos, un dato que, segundo aos membros da plataforma, foi o que deu lugar á situación vivida hai uns días no Punto de Atención Continuada da Estrada, onde morreu un home. O acto pechou con aplausos e algúns berros esixindo médicos.