Skip to content Skip to left sidebar Skip to footer

SERVICIOS SOCIAIS

O CONCELLO MERCA SETE NOVAS CAMAS XERIÁTRICAS PARA PERSOAS USUARIAS DO SERVIZO DE AXUDA A DOMICILIO

O Concello de Cedeira destina 10.220€ (IVE incluído) á compra de sete camas xeriátricas que se asignarán a familias da vila con persoas que permanecen acamadas e que son usuarias do Servizo de Axuda no Fogar. Anteriormente o Concello xa tiña mercado outras 17 camas deste tipo e tamen 12 guindastres, equipamentos que van dirixidos tanto a facilitar a mobilidade da persoa enferma por parte dos seus propios familiares como das traballadoras e traballadores do servizo de asistencia domiciliaria.

O alcalde, Pablo Diego Moreda Gil, subliñou que a suministración destas camas é unha actuación que redunda directamente nunha mellor calidade de vida para as persoas usuarias e que eleva tamén a calidade do Servizo de Axuda no Fogar.

A empresa Coloro encárgase de proporcionar as camas xeriátricas, todas elas dotadas cun elevador que permite mover á persoa enferma co mínimo esforzo.

GRUPOS POLÍTICOS E PERSOAL MUNICIPAL DE CEDEIRA FAN ACTIVISMO VIRTUAL CONTRA AS VIOLENCIAS NESTE 25N

Os tres grupos municipais no Concello de Cedeira participaron esta mañá na lectura do manifesto da iniciativa “En negro contra as violencias”, para expresar un ano máis o seu rexeitamento a toda clase de maltrato ás mulleres. Tal como recordou o alcalde, Pablo Diego Moreda Gil, Cedeira está adherida á dita acción colectiva, que funciona ao longo de todo o ano pero que nesta data do 25N intensifica o seu traballo a prol da sensibilización de todos e todas contra o machismo. Neste 2020, dadas as especiais limitacións que impuxo o coronavirus, as accións fanse de xeito virtual, compartindo a mensaxe e as imaxes na web e nas redes sociais do Concello.

O Concello repartiu entre o seu persoal, en establecementos comerciais e empresas, entidades, e en xeral, ao tecido social da vila, camisetas e suadoiros, máscaras e carteis coas verbas “25N Cedeira en negro” e outros lemas da campaña. Aínda que o material quedou escaso para atender toda a demanda, e o goberno local pediu escusas por elo, o interese da veciñanza por apoiar esta acción conseguiu darlle moita visibilidade no municipio.

Os traballadores e traballadoras de mantemento, da oficina de Turismo, de Servicios Sociais, da biblioteca municipal e doutras instalacións municipais fixéronse fotos vestindo prendas negras coa mensaxe “25N Cedeira en negro” que van ser compartidas na páxina do Concello en Facebook, tamén tinguida de loito neste día.

Nun vídeo, que tamén quedará colgado hoxe nas redes sociais do Concello de Cedeira recóllese a lectura do manifesto, no que se asume a “obriga de todas e todos nós de traballar todos os días pola igualdade en todos os ámbitos da nosa vida porque só así seremos capaces de transformar a nosa sociedade”. A mensaxe fai incidencia en que “este 25 de novembro en especial temos que facer máis visible aínda a loita contra a violencia machista, darlles a todas as mulleres maltratadas a visibilidade que lles nega a terrible crise sanitaria que estamos a padecer”.

Link ao vídeo:

NOVA CONVOCATORIA DO PROGRAMA INTEGRADO DE EMPREGO DA MANCOMUNIDADE DE CONCELLOS DA COMARCA DE FERROL

A Xunta de Galicia concedeu á A Mancomunidade de Concellos da Comarca de Ferrol unha nova edición do Programa Integrado de Emprego de Galicia. A administración autonómica e o Servicio Público de Empleo Estatal financian esta convocatoria, financian con 225.000€ sobre 250.000€ do custo total. Vai dirixida a mulleres en situación de desemprego empadroadas nos Concellos de: Cedeira, Valdoviño, Narón, Fene, Neda, Cabanas, Ares ou Mugardos e que cumpran algún dos seguintes requisitos:

  • certificado de discapacidade
  • risco de exclusión social e beneficiarias do tramo de inserción da renda de inclusión social de Galicia
  • vítimas de violencia de xénero
  • menores de 30 anos con baixa cualificación
  • menores de 30 anos cualificadas
  • maiores de 45
  • perceptoras de prestacións, subsidios por desemprego ou renda activa de inserción (RAI)
  • inmigrantes

O Programa Integrado de Emprego da Mancomunidade de Concellos da Comarca de Ferrol 2020/2021 ten unha duración de 12 meses e o seu obxectivo principal é achegar ferramentas ás participantes de xeito que melloren a súa empregabilidade e, por tanto, así como a inserción laboral. Os medios que se utilizan para a consecución do obxectivo son moi diversos e adaptados ao perfil de cada persoa. Deste xeito, conxugaranse accións individuais co persoal técnico do programa (orientación laboral, asesoramento, itinerarios personalizados de inserción) con accións formativas tanto cualificantes (atención sociosanitaria, administración, comercio e loxística, peixaría, carnizaría…) como de tipo transversal (preparación para as competencias clave, informática, idiomas, habelencias sociolaborais, talleres de busca de emprego, talleres de entrevista…). O persoal técnico tamén abordará a prospección laboral de xeito que en todo momento manterá contactos coas empresas da contorna de cara a coñecer as necesidades do mercado, as posibles ofertas de emprego e poñelas en contacto coas usuarias do programa. O obxectivo mínimo de inserción laboral do Programa Integrado de Emprego deste ano é do 35%.

É importante subliñar que todas estas accións se apoiarán con medidas que permitan a participación das usuarias, de xeito que aquelas que teñan menores ou persoas con discapacidade ao seu cargo (e non dispoñan de recursos de apoio) poderán beneficiarse dun servizo de conciliación. Así mesmo, terán dereito a percibir unha bolsa de 7€ por día de asistencia ás accións do programa.

Esta metodoloxía permite que as participantes amplíen non só a súa cualificación senón que, ao mellorar o coñecemento de si mesmas e do propio mercado laboral, poidan adquirir formación que lles sirva para que a súa busca de emprego sexa máis eficiente e efectiva.

As mulleres interesadas en ampliar información ou inscribirse no programa poderán solicitalo do seguinte xeito:

Persoal técnico do Programa Integrado de Emprego da Mancomunidade. Tlf 697 874 155 / 670 304 224 / 981944000 ext. 378. piemancomunidade@ferrol.es

Ares. Área de Formación e Emprego Tlf.: 689 242 598

Cabanas. emprego@cabanas.gal / 670 304 224 / 697 874 155 / 981 944 000 ext. 378

Cedeira. Área de Formación e Emprego. Tlf. 981 480 000 (extensión 4)

Fene. orientacion.laboral@fene.gal. Area de Formación e Emprego “Pancho Allegue”. Teléfono 981 492 767.

Mugardos. Área de Formación e Emprego.Tlf. 698 188 608

Narón. Centro de Formación Irmás Froilaz. Av. do Mar, 115, Polígono Industrial da Gándara. Tlf. 981 333 135 / 697 874 155 / 670 304 224

Neda. Departamento municipal de Servizos Sociais. 981380039 extensión 2

Valdoviño. Departamento municipal de Servizos Sociais. Teléfono 981 48 70 41 (extensión 5).

Así mesmo tamén poden consultar toda a información na páxina web da Mancomunidade www.comarcaferrolterra.es, na que haberá unha folla de solicitude. Esta deberá ser cuberta e enviada ao correo electrónico piemancomunidade@ferrol.es ou deixala presencialmente nos departamentos indicados dos respectivos Concellos así como no Centro Municipal de Formación Irmás Froilaz (Avenida do Mar, 115. A Gándara. Narón)

O prazo de solicitude é ata o 25 de novembro. Posteriormente as mulleres inscritas serán chamadas a unha entrevista de cara a facer a selección final de participantes no programa.