Skip to content Skip to left sidebar Skip to footer

PARTICIPACION

As Amas de Casa promocionan a cociña local cun curso que arranca o día 6 de febreiro

AS AMAS DE CASA PROMOCIONAN A COCIÑA LOCAL CUN CURSO QUE ARRANCA O DÍA 6 DE FEBREIRO

Por segundo ano consecutivo, a Asociación de Amas de Casa de Cedeira organiza un curso de cociña para promocionar a gastronomía local.

A iniciativa dará comezo o día 6 de febreiro e será impartida polo cociñeiro do restaurante Brisas, Lois Iglesias Gómez. As prazas, un total de 22, esgotáronse moi rapidamente.

As instalacións sociais da entidade, situadas na rúa Ortigueira, acollerán un programa que se impartirá os mércores, en horario de 18.00 a 20.00 horas, e que se prolongará ata os últimos días do próximo mes de marzo.

A presidenta da entidade, Ángeles Villar Fraguela, agradece tanto o interese dos participantes como a boa disposición que a asociación vén de atopar entre os profesionais do sector que, coas súas ensinanzas, contribúen a difundir e conservar o bo facer da cociña local.

O número 12 do boletín “As7parroquias” xa está na rúa con temas de actualidade e interese social

O NÚMERO 12 DO BOLETÍN “AS7PARROQUIAS” XA ESTÁ NA RÚA CON TEMAS DE ACTUALIDADE E DE INTERESE SOCIAL

O Concello de Cedeira xa está a repartir entre a veciñanza o número 12 do boletín “As7parroquias”, unha publicación editada polo goberno municipal para acercar a actividade municipal aos veciños e veciñas da localidade.

Neste último exemplar do boletín, que está na rúa desde o ano 2016, os lectores poden atopar temas de moita actualidade como a campaña de recollida de firmas en demanda da construción dun centro de día ou a datación do monumento con forno que sitúa ao xacemento de Campo do Castro no século III a.C. Noutras páxinas, a publicación aborda novidades de interese social, entre os que cabe destacar a compra de camas xeriátricas para cedelas gratuitamente ás persoas que as poidan necesitar e o plan que o goberno local está a levar a cabo coa intención de recuperar elementos da arquitectura popular como poden ser os lavadoiros e as fontes públicas.

A través do boletín a veciñanza tamén pode estar ao día dos proxectos que aínda están por vir dentro do presente mandato. A realización do estudio de impacto ambiental para evitar a deterioración que está a sufrir a praia da Madalena e o proxecto de rehabilitación da antiga cetaria do Sarridal están entre os máis importantes. Aínda que o lugar máis destacado deste número está reservado á concesión do título de fillo predilecto a Álvaro Porto Dapena, un recoñecemento que ocupa o principal oco da portada e mesmo da páxina 5.

Pode descargar o boletín na seguinte ligazón:

IR Á LIGAZÓN Boletín “As7parroquias” nº 12

Cedeira comeza a transformar os espazos públicos en escaparates do “street art”

CEDEIRA COMEZA A TRANSFORMAR OS ESPAZOS PÚBLICOS EN ESCAPARATES DO “STREET ART”

O Concello de Cedeira quere transformar os espazos públicos en arte urbano, unha idea que xa é unha realidade no caso da estación de bombeo situada nas inmediacións do parque do Romeiro. Desde hai uns días a devandita construción xa loce un aspecto totalmente renovado grazas a Adrián Taracido Fernández, o artista que recreou nas seis fachadas da estación as paisaxes e as construcións máis representativas do termo cedeirense.

A garita de Herbeira, o castelo da Concepción, a praza de acceso ao Concello, o monumento dedicado á peixeira, a capela de San Antón e o porto son algúns dos lugares que os veciños e visitantes xa poden recoñecer nas paredes exteriores do edificio.

O importe desta primeira intervención ascendeu a 5.687 euros (IVE incluído) e a intención do equipo de goberno é “loitar contra o feísmo nos espazos públicos e crear distintos museos de balde sen paredes nin teitos”.

O alcalde, Pablo Moreda Gil, destacou a grande aceptación da veciñanza con respecto a esta primeira intervención no parque do Romeiro e apuntou que “queremos facer do pobo un escaparate do street art, ademais de que sexa un recurso turístico atractivo que permita coñecer a nosa vila dende outro punto de vista, dende outro lugar máis amable para o ollo do que mira e ve arte onde antes vía feísmo e ve un espazo de relación social mais habitable”.

Adrián Taracido Fernández está vinculado á empresa que creou para a Asociación “Rampla” uns libriños infantís para colorear, baseado no patrimonio de Cedeira, unha idea que contou tanto coa aprobación da entidade como do público ao que ía dirixida.