A web do concello de Cedeira supera as 350.000 visitas e o Cedeira Informa chega ás 1.000 persoas usuarias

A WEB DO CONCELLO DE CEDEIRA SUPERA AS 350.000 VISITAS E O CEDEIRA INFORMA CHEGA ÁS 1.000 PERSOAS USUARIAS

De éxito cualifica o equipo de goberno de Cedeira a renovación das canles de comunicación coa veciñanza levada a cabo desde o inicio deste mandato. Xa en 2016 supuxo a actualización integral da web municipal e a posta en marcha do Portal de Transparencia. En 2017 chegou do servizo de noticias Cedeira Informa. Neste 2018 estase a continuar por este camiño de optimización do fluxo de información entre Concello e cidadanía.

O firme convencemento deste goberno de apostar pola mellora da comunicación directa cos veciños e veciñas está a ser avalado polo número de visitas das webs e pola crecente cantidade de persoas subscritas ao Cedeira Informa.

A web municipal acumula máis de 350.000 visitas, cunha media de case 13.500 mensuais e grande aceptación por parte de usuarios e usuarias, que destacan a utilidade da páxina, a facilidade para navegar por ela e a relevancia dos seus contidos.

A valoración do alcalde, Pablo Moreda Gil, é positiva: “Cando decidimos renovar a web, fixémolo pensando nos veciños e veciñas. A súa característica fundamental é a practicidade. Está especificamente deseñada para dar servizo á cidadanía, que pode atopar nela toda a información que poida necesitar sobre trámites e xestións administrativas e sobre a actualidade do Concello. Ademais, quixemos que estivese aberta a recibir propostas para que toda a veciñanza poida participar na mellora do noso municipio. Dous anos despois, temos unha gran satisfacción cos resultados, pero queremos seguir avanzando”.

Durante este verán fixéronse melloras na web co obxectivo de dar unha maior visibilidade aos contidos turísticos e de actualidade, dentro da estratexia do goberno municipal de Cedeira de pór en valor as potencialidades culturais e recreativas do Concello.

Como é sabido, a web municipal (www.cedeira.gal) compleméntase, no tocante á información puramente institucional, co Portal de Transparencia (www.portaltransparenciacedeira.gal), do que tamén se fai unha valoración moi positiva logo destes dous anos de funcionamento.

“O Portal púxose en marcha para dar cumprimento á Lei de transparencia, que á nosa chegada ao goberno en 2015 estaba moi lonxe de cumprirse. Máis alá diso, o Portal é a demostración do compromiso que este goberno ten cos veciños e veciñas de mostrar abertamente todo o relativo á xestión do Concello, é dicir, de ser absolutamente transparente cos recursos públicos e coa información. Calquera pode acceder con facilidade á web do Portal e ver que é o que facemos día a día no Concello, con información clara e sinxela. Estamos convencidos de que para facer unha boa xestión non abonda con traballar moito e ben, tamén hai que facelo de xeito aberto, trasladando dando toda a información á cidadanía para que poida facer un seguimento da acción do goberno e valorala”.

No tocante ao servizo Cedeira Informa, sabíase que ía funcionar, pero sorprende a velocidade da súa implantación. O alcalde di que “Quixemos ir un paso máis aló na comunicación coa veciñanza, que todo o mundo tivese a oportunidade de coñecer o día a día da actividade municipal, os eventos, as incidencias, a programación cultural… todo aquilo que puidese ser do seu interese. Atopabamos ás veces xente que, por exemplo, lamentaba non poder asistir a algunha actividade deportiva porque lle pasara o prazo de inscrición ou que non sabía con exactitude cando comeza o período para a queima de restrollo. A verdade é que chegar dun modo tan directo ás máis de persoas 1.000 usuarias apenas un ano despois de iniciar o servizo é a confirmación de que a cidadanía apoia con forza esta iniciativa. Con todo, en coherencia co noso espírito de sempre progresar, estamos deseñando xa algunhas melloras para o Cedeira Informa que esperamos que sexan ben recibidas e coas que queremos avanzar máis aínda na relación da administración local cos veciños e veciñas do noso concello”.

O Concello ofrece cursos preparatorios para a obtención dos CELGA 2 e 4

O CONCELLO OFRECE CURSOS PREPARATORIOS PARA A OBTENCIÓN DOS CELGA 2 E 4

A Secretaria Xeral de Política Lingüística vén de convocar as probas para a obtención dos CELGA 2 e 4. Cómpre lembrar que o prazo de inscrición remata o 4 de outubro.

Por mor deste anuncio, o Servizo de Normalización Lingüística do Concello de Cedeira vai ofrecer cursos preparatorios para a obtención destes certificados de competencia en lingua galega.

As persoas interesadas en recibir esta formación deben escribir ao seguinte enderezo electrónico: normalizacion@cedeira.es . O asunto da mensaxe debe ser “cursos CELGA”. É preciso tamén indicar nome, DNI, data e lugar de nacemento, idade e preferencia horaria (mañá ou tarde).

Aberto o prazo de matrícula na escola de música Pro-Cedeira

ABERTO O PRAZO DE MATRÍCULA NA ESCOLA DE MÚSICA PRO-CEDEIRA

A Asociación Cultural Pro-Cedeira vén de abrir o prazo para a matrícula na escola de música, do 7 ao 18 de setembro en horario de 17.00 h a 19.00 horas no Escolar de Piñeiro (matrícula gratuita)

Impartiranse entre outras, as seguintes especialidades: solfeo, percusión, guitarra clásica, guitarra eléctrica, canto, saxofón, laud, mandolina, bandurria, trompeta, bombardino, grupo de cuerda, grupo de rock, piano, e moito máis.

Desde a asociación chaman a todos os interesados e interesadas a divertirse aprendendo música e poder formar parte da banda de música, Big-Band, Rondalla e Coro da asocación.

Veciños, políticos e profesionais da sanidade pública volveron esixir máis persoal para o centro de saúde

VECIÑOS, POLÍTICOS E PROFESIONAIS DA SANIDADE PÚBLICA VOLVERON ESIXIR MÁIS PERSOAL PARA O CENTRO DE SAÚDE

Onte, como xa tiña pasado o día 11 de outubro do ano pasado, a veciñanza de Cedeira, máis os políticos e o persoal do centro de saúde volveron ocupar a rúa Zumalacárregui para denunciar as carencias que afectan ao centro médico e para esixir dos responsables do Sergas que lles dea unha solución. Tamén se atopaban presentes membros da plataforma “PACs en guerra” nunha concentración que arrincou pasadas as 11.30 horas.

O equipo de goberno recordou que o número de médicos pasou de cinco a tres no último mes e que este ano se está a repetir a situación de compartir con Valdoviño a consulta de pediatría, polo que no caso de Cedeira queda reducida a tres horas os martes e xoves.

Esta situación, que tamén está a xerar listas de espera de ata sete días, responde “á política de recortes que se está aplicar desde a Xunta”, e está a afectar tanto aos profesionais da medicina como aos propios usuarios da sanidade, di o goberno local. Ademais de esixir que a sanidade sexa pública, universal e gratuíta, os responsables municipais de Cedeira lembraron aos presentes a importancia de presentar reclamacións, “porque fan forza”, e apuntaron que as urxencias no PAC aumentaron un 40% nos últimos dez anos a pesares da perda de poboación duns 700 veciños no mesmo período de tempo.

Desde a plataforma “PACs en guerra” agradeceuse a resposta da veciñanza porque axuda a “forzar que muden as cousas” e a que os profesionais da saúde pública poidan ter unhas condicións dignas. Neste sentido, apuntouse que o 70% do tempo anual o PAC ten unha cobertura sanitaria de mínimos, un dato que, segundo aos membros da plataforma, foi o que deu lugar á situación vivida hai uns días no Punto de Atención Continuada da Estrada, onde morreu un home. O acto pechou con aplausos e algúns berros esixindo médicos.

O goberno de Cedeira convoca unha concentración pola situación que se está a vivir no centro de saúde

O GOBERNO DE CEDEIRA CONVOCA UNHA CONCENTRACIÓN POLA SITUACIÓN QUE SE ESTÁ A VIVIR NO CENTRO DE SAÚDE

O goberno de Cedeira convoca para ás 11.30 do próximo martes, día 14 de agosto, unha concentración diante do centro de saúde. As razóns son as mesmas que motivaron una mobilización en outubro pasado: a falta de persoal suficiente para atender o incremento de poboación que se produce durante os meses de verán. A anterior mobilización foi secundada masivamente pola veciñanza, políticos e facultativos.

O executivo local entende que o “Sergas lonxe de actuar en consecuencia, non é quen de prevelo nin de remedialo” e considera totalmente insuficiente que “tanto na segunda quincena de xullo como na primeira de agosto, o centro de saúde de Cedeira ten tres médicos para cubrir as cinco prazas e un pediatra a media xornada dous días á semana compartido con Valdoviño, así como unha media de sete días para unha cita de atención primaria”. Os responsables municipais reivindican que se cubra a falta de persoal, un servizo de pediatría continuado e que desaparezan as listas de espera.

O goberno municipal, ademais de recordar o acontecido recentemente no PAC da Estrada, invitan tanto aos veciños como aos visitantes a tomar parte na concentración “porque non estamos polo labor de aturar máis esta situación que afecta tanto aos profesionais que traballan no centro como aos seus usuarios”, recordando que estes son a poboación permanente e tamén a esporádica.

O Concello agradece o pulo de entidades e veciñanza para o éxito do deporte local

O CONCELLO AGRADECE O PULO DE ENTIDADES E VECIÑANZA PARA O ÉXITO DO DEPORTE LOCAL

O goberno de Cedeira agradece ás entidades deportivas e aos veciños en xeral a súa contribución para os éxitos que o deporte local está a conseguir, tal e como así quedou demostrado nos últimos días coa celebración dun torneo de fútbol praia e da III Bandeira Concello de Cedeira de Traiñeiras. Nesta última, o Club de Remo Cabo da Cruz quedou gañador e os remeiros cedeirenses foron segundos empuxados polo numeroso público que desde as primeiras horas do pasado domingo seguiu a competición desde a zona portuaria.

Tamén foron milleiros de persoas, segundo dixeron os convocantes do torneo de fútbol praia -Manuel Martínez e Alfonso Picos- as que presenciaron os partidos que ao longo da semana pasada reuniron a un total de 31 equipos das categorías Sub-15, Sub-12 e Sub- 9 e outros 26 de xogadores séniors no areal urbano da Madalena. Só en participantes, aproximáronse aos cincocentos.

Os equipos gañadores foron “Todo corazón”, na categoría Sub-15; “Aldebarán”, Sub-12, e “Neones”, Sub-9. Os xogadores da formación local Jos-Car proclamáronse campións da categoría sénior.

O executivo local considera que tanto a resposta da xente á hora de presenciar competicións deportivas como os recoñecementos que o deporte local está a reunir en distintas disciplinas e niveis confirman o seu bo estado de saúde. Neste sentido, o alcalde, Pablo Moreda Gil, que reiterou o compromiso do seu equipo en apoiar calquera modalidade deportiva, apuntou que “o deporte cedeirense é un deporte vivo”.

“AS7PARROQUIAS” Informa no seu último número das contas municipais e os baixos índices de delincuencia

“AS7PARROQUIAS” INFORMA NO SEU ÚLTIMO NÚMERO DAS CONTAS MUNICIPAIS E OS BAIXOS ÍNDICES DE DELINCUENCIA

Un novo número do boletín “As7parroquias”, editado polo Concello de Cedeira para ter informada á veciñanza, xa está na rúa. Trátase nesta ocasión dunha publicación chea de boas noticias, como son as que se refiren á economía municipal, ao éxito do segundo festival de música galego-portuguesa e á recuperación da afectividade que sempre existiu entre a vila de Cedeira e Cuba, grazas á viaxe que un grupo de veciños fixo a primeiros de ano á illa caribeña.

Este boletín tamén recolle a iniciativa do equipo de goberno de transformar o castelo da Concepción nun centro de intepretación do achado na excavación arqueolóxica do Sarridal, da posta en funcionamento do Servizo de Normalización Lingüística e os baixos índices de delincuencia que sairon á luz con motivo da celebración da Xunta Local de Seguridade, unha xuntanza que non tiña lugar desde o ano 2007.

A recuperación da festa da rapa das bestas, as obrigas que se derivan da nova Lei de montes e a política do goberno municipal ao respecto da praia da Madalena son outras das noticias que tamén figuran nunha publicación que se reparte de maneira gratuíta entre toda a veciñanza.

VER TODOS OS BOLETÍNS “As 7 parroquias”

O Concello organiza a segunda mesa pola igualdade

O CONCELLO ORGANIZA A SEGUNDA MESA POLA IGUALDADE

O goberno municipal de Cedeira promove a celebración dunha mesa pola igualdade que terá lugar o día 7 de xuño. Con ela quérese dar continuidade á celebrada en marzo e que tivo éxito de asistencia e participación.
Neste caso, como no anterior, trátase dunha actividade aberta e participativa, na que se abordarán os problemas que afectan ás mulleres e na que se prevé trazar as primeiras liñas de actuacións para reducir as diferencias que aínda hoxe se están a dar entre homes e mulleres, segundo se fai constar desde o Concello. Representantes municipais explican que a realización deste acto tamén responde ao interese do colectivo feminino pola realización deste tipo de iniciativas e por darlle visibilidade á actual situación de desigualdade.Tamén apuntan que a temática xirará arredor
do 28 de xuño, día do orgullo gai.

A Sala Áncora acollerá a celebración dunha cita que arrincará pasadas as oito da tarde.

Bases reguladoras das axudas destinadas a fomentar o asociacionismo e a participación das mulleres

BASES REGULADORAS DAS AXUDAS DESTINADAS A FOMENTAR O ASOCIACIONISMO E A PARTICIPACIÓN DAS MULLERES

A Xunta de Galicia ven de publicar a resolución da Secretaría Xeral da Igualdade, pola que se establecen as bases reguladoras das axudas destinadas a fomentar o asociacionismo e a participación das mulleres, e se procede á súa convocatoria para o ano 2018 (código de procedemento SI437A).

As asociacións que estean interesadas teñen de prazo para a presentación das solicitudes ata o 9 de febreiro, un mes contado a partir do día seguinte á publicación no DOG da antedita resolución. Pode consultar a publicación do DOG na seguinte ligazón:

IR Á LIGAZÓN Bases reguladoras das axudas destinadas a fomentar o asociacionismo e a participación das mulleres

As solicitudes presentaranse obrigatoriamente por medios electrónicos a través do formulario normalizado dispoñible na sede electrónica da Xunta de Galicia. Pode acceder a sede electrónica da Xunta na seguinte ligazón:

IR Á LIGAZÓN Sede electrónica da Xunta de Galicia

Se algunha das persoas interesadas presenta a súa solicitude presencialmente, requiriráselle para que a emende a través da súa presentación electrónica. Para estes efectos, considerarase como data de presentación da solicitude aquela en que fose realizada a emenda.

Para a presentación das solicitudes poderá empregarse calquera dos mecanismos de identificación e sinatura admitidos pola sede electrónica da Xunta de Galicia, incluído o sistema de usuario e clave Chave365.

As solicitudes de axuda dirixiranse, xunto coa documentación necesaria, á xefatura territorial da Vicepresidencia e Consellería de Presidencia, Administracións Públicas e Xustiza competente en función da provincia na cal a asociación teña establecida a súa sede social.

O boletín “As7parroquias” xa está na rúa con informacións de moi diferente contido neste primeiro número do outono

O BOLETÍN “AS7PARROQUIAS” XA ESTÁ NA RÚA CON INFORMACIÓNS DE MOI DIFERENTE CONTIDO NESTE PRIMEIRO NÚMERO DO OUTONO

O Concello de Cedeira xa está a repartir o boletín “As 7 Parroquias”, unha publicación institucional para informar aos/ás veciños/as dos asuntos que poden ser do seu interese e así poidan coñecer aínda mellor a realidade cultural, social e municipal da poboación na que viven.

Neste último número a veciñanza ten moitas noticias, desde as intervencións que está a acometer o equipo de goberno na recta final do ano ata os pormenores da reforma do edificio da biblioteca para facelo accesible para todos, ademais de ser un proxecto innovador noutros moitos aspectos.

A reportaxe sobre o labor que desde hai anos realiza a Asociación de Pais e Nais Picapeixe do colexio Nicolás del Río tamén axuda a comprender mellor a importancia destas entidades á hora de detectar necesidades, crear recursos e reclamar ante as administracións.

O boletín de outubro recolle así mesmo a iniciativa do Concello en materia de normalización lingüística coa intención de introducir o galego no sector da hostalería e nas familias. A mobilización en demanda dunha sanidade pública de calidade tamén ten un oco nunha publicación na que se dá conta, ademais, das campañas de limpeza ás que foi sometido o río Condomiñas, de que o equipo de goberno xa ten listo o proxecto básico e de execución para a ampliación da escola infantil e das previsións que apuntan que ata o ano 2018 levarase investido en Cedeira máis dun millón de euros en obras de saneamento.

Pode consultar o novo número de “As 7 Parroquias” na seguinte ligazón:

IR Á LIGAZÓN Boletín nº 8 “As7parroquias” novembro