Skip to content Skip to left sidebar Skip to footer

PARTICIPACION

O CLIA COMEZA A TRABALLAR PRIORIZANDO E TRASLADANDO VARIAS PROPOSTAS AO GOBERNO MUNICIPAL

O Consello Local da Infancia e a Adolescencia de Cedeira, constituido a finais do pasado ano, está xa a traballar para cumprir co seu obxectivo de ser un espazo de reflexión e debate sobre a realidade do municipio e ter un papel activo como órgano consultivo que é para o goberno municipal. Nas súas primeiras reunións, os 30 nenos e nenas e mozos e mozas que integran o CLIA decidiron o seu nome, “Ondiñas da vila” e acordaron dar prioridade a tres das liñas de traballo que están contempladas no Plan de Infancia e Adolescencia de Cedeira.

Así, a promoción da Saúde mental entre os menores, a organización de obradoiros sobre sexualidade para alumnado do IES Punta Candieira e a participación do CLIA como grupo asesor da programación de actividades culturais e deportivas son as cuestións sobre as que o consello decidiu focalizar os seus primeiros esforzos e que xa ten trasladado ás diferentes concellerías do goberno municipal. Decidiuse isto despois dunhas reunión mantidas, a finais de febreiro, con representantes do CEIP Nicolás do Río e o IES Punta Candieira.

Outras cuestións que tamén están no Plan de Infancia de Cedeira e nas que o CLIA ten previsto traballar son a organización de xornadas de limpeza nas praias, unha campaña para previr a violencia sexual e ofrecer información sobre os recursos nesta materia, a instalación dun merendoiro en San Isidro, o autocine de verán e unha programación de cine no Auditorio. Igualmente, xunto co nome, o CLIA traballa no deseño dun logo que o identifique.

O CONCELLO DE CEDEIRA INICIA CO ALUMNADO DE 3º DE ESO O CUARTO PROCESO DE ORZAMENTOS PARTICIPATIVOS

O alcalde de Cedeira, Diego Pablo Moreda Gil, e o concelleiro de Mocidade, Noel López, participaron recentemente na sesión de arranque do cuarto proceso de Orzamentos Participativos no IES Punta Candieira. Un ano máis, o Concello implica neste programa ao alumnado de terceiro curso de ESO, confiándolle a decisión sobre o investimento de 20.000€. Un parque de calistenia e un ciclo de auto-cine, a mellora da pista do Floreal e a compra de novo equipamento para o ximnasio municipal foron as actuacións acometidas nas tres edicións anteriores.

Os orzamentos participativos, tal e como destaca o alcalde, representan un exercicio de democracia no que os rapaces e rapazas se implican con moito entusiasmo e interese. Son unha fórmula para aprender como funciona a administración local, cales son os seus órganos de decisión e áreas de xestión, os trámites que hai que cumplimentar, etc. O proceso abrangue o debate do alumnado sobre as necesidades que detectan na súa vila e a elaboración de propostas, que despois serán votadas e deberán pasar polos servizos administrativos do Concello para seren orzamentadas e validadas, no sentido de comprobar que son viables técnica e economicamente.

Segundo o calendario previsto, o alumnado participará de xaneiro a marzo en diferentes obradoiros nos que coñecerán como funciona o Concello, reflexionarán sobre as necesidades do pobo e elaborarán os seus proxectos. En abril analizaranse as propostas polos servizos municipais e xa no mes de maio está previsto que se celebre no instituto a asemblea na que rapaces e rapazas votarán entre os diferentes proxectos para elixir aquel ou aqueles que irán ao pleno. Nese mesmo mes de maio presentarase a resolución ante a corporación para a súa aprobación definitiva.
Cómpre recordar que a experiencia de Orzamentos Participativos de Cedeira foi exposta no mes de decembro en Santiago, no marco das V Xornadas Formativas de Cidades Amigas da Infancia, como exemplo de participación a mocidade no proceso de decisión dunha administración pública. Acudiron ao acto tres representantes do Consello Local da Infancia e a Adolescencia de Cedeira, que xa antes, en novembro, tivo a súa estrea no XI Foro da Infancia que Unicef celebrou no Parlamento de Galicia. En ambos os dous actos, os voceiros e voceiras da mocidade de Cedeira destacou a importancia de participar no deseño de políticas públicas que tamén lles afectan.

O CLIA DE CEDEIRA ESTREOUSE NO XI FORO DA INFANCIA UNICEF QUE SE CELEBROU ONTE NO PARLAMENTO GALEGO

O Consello Local da Infancia e Adolescencia de Cedeira participou onte no XI Foro da Infancia Unicef que se desenvolveu no Parlamento de Galicia, no que tamén tomaron a palabra integrantes dos outros once municipios que contan con este organismo de participación. Anxo Moreda actuou como voceiro do CLIA cedeirés e abriu a quenda de intervencións subliñando a importancia de que nenos, nenas a mocedade conten á hora de deseñar políticas públicas e poidan opinar sobre os cambios que se producen na sociedade “porque a nós tamén nos afectan”.
O voceiro do CLIA de Cedeira apelou ao Parlamento Galego para que faga seus os mesmos obxectivos que ten o consello local e garanta que a infancia e adolescencia ten voz tamén na Xunta de Galicia.

Xunto co consello de Cedeira participaron na sesión representantes dos organismos de participación de Laracha, A Coruña, Burela, Nigrán, Moeche, Ponteareas, Redondela, Teo, Tomiño e Viveiro. Cómpre recordar que o CLIA cedeirés acaba de crearse –o pleno de aprobación do seu regulamento celebrouse o pasado día 17- e está formado por trinta nenos e nenas, rapaces e rapazas tanto do CEIP Nicolás do Río como do IES Punta Candieira.