CULTURA

UN TOTAL DE 16 LOCAIS PARTICIPARÁN NO PRIMEIRO CONCURSO DE TAPAS DE OUTONO

Un total de dezaseis locais de hostalería de Cedeira tomarán parte no primeiro concurso de Tapas de Outono, organizado polo Concello, que se celebrará a última fin de semana do mes (días 27 e 28).

A idea é promocionar a hostalería local, fomentar a gastronomía da zona e aproveitar esta época do ano para ofrecer unha oferta gastronómica diferente da habitual, segundo os convocantes.

Os locais participantes terán que ter en conta que é obrigado facer uso de produtos de tempada, como poden ser os cogomelos, as castañas ao as cabazas, así como presentar unha única tapa feita expresamente para o certame. O xurado estará formado polas persoas que proben as tapas e para poder participar só é preciso cubrir a tarxeta de votación que haberá en todos os locais participantes.

A organización establece así mesmo o feito de degustar cinco propostas distintas para poder emitir o voto. Serán os propios encargados dos locais os que terán que selar ou asinar a tarxeta de votación para validala e, aínda que se recomenda probar todas as tapas e conseguir o maior número de selos, só será posible votar por cinco dos locais visitados. Non se pode repetir unha puntuación, que vai de 1 a 5 puntos e só se admitirá unha tarxeta por persoa sempre que cumpran os requisitos esixidos.

O prezo das tapas será de 1,5 euros por unidade e todos aqueles que participen cun voto válido serán incluídos no sorteo dunha cea para dúas persoas no local gañador do concurso.

Os negocios de hostalería participantes nesta primeira edición do certame son: Restaurante Brisa, T. Praza do Peixe, mesón San Antón, mesón JoJó, mesón Marieta, restaurante Vila Vella, mesón A ría, mesón A Balandra, cervecería Rosi, mesón O Amanexo, pizzería Sheriff, cafetería Auditorio, O Mesón, bar California, mesón Alitas e bar o Marisco.

O GRUPO TEATRO SEMENTE ACTUARÁ ESTE SÁBADO NO AUDITORIO COA OBRA “HTC (HOXE TOCA RIR)”

O Ciclo de Teatro Afeccionado terá continuidade este sábado, día 20, coa posta en escena da obra “HTC (Hoxe Toca Rir)” a cargo da agrupación Teatro Semente (Neda). Será ás 20.00 horas no auditorio municipal e o prezo da entrada é de dous euros.

Trátase dunha obra sobre a violencia de xénero. Unha representación que se interrompe por momentos para que un grupo de vítimas doutros tempos animen, critiquen e reflexionen sobre o pasado, o presente e o futuro da muller.

O ciclo, organizado polo grupo Teatro da Vila, pecharase o día 28 coa interpretación do grupo O Aturuxo de Melpómene (Narón) do texto “Terapia de bar”.

A XV XUNTANZA DE PALILLEIRAS SERÁ O SÁBADO NO POLIDEPORTIVO DE CEDEIRA

A Xuntanza de Palilleiras de Cedeira chega este ano á súa decimoquinta edición. O programa, organizado pola Asociación de Amas de Casa e co que colaboran o Concello e máis a Deputación, terá lugar o próximo sábado, día 20, en horario de 10.00 a 14.00 e de 16.00 a 19.00 horas.

Segundo as estimacións, serán arredor de cincocentas persoas as que este ano participen nunha celebración na que haberá exposición e venda de traballos, agasallos, sorteos e demostracións en vivo de patchword, encaixe e bordado tradicional. Moitos dos asistentes chegan de fóra.

As actividades darán comezo coa apertura do polideportivo municipal para acoller aos participantes así como aos primeiros visitantes das moitas persoas que ao longo do día pasarán por estas instalacións deportivas.

O primeiro dos sorteos terá lugar á unha da tarde. Botellas de viño, estancias para dúas persoas en aloxamentos da zona, roupa e ata décimos de lotería só son algúns dos agasallos que a organización rifará este ano grazas á axuda desinteresada do comercio, da hostalería e de negocios de Cedeira para facer aínda máis atractiva unha celebración que incide moi positivamente na economía local. Un segundo sorteo celebrarase a media tarde e tamén haberá agasallos para a persoa de máis idade, para a máis nova, para a agrupación máis numerosa e a que chega desde máis lonxe.

A presidenta das Amas de Casa, Ángeles Villar Fraguela, agradece a colaboración recibida por parte de entidades, empresarios e da veciñanza para celebrar unha cita que xa está a ser todo un clásico no arranque da tempada de outono na vila de Cedeira, ademais de invitar aos veciños da contorna a achegarse o próximo sábado á Cedeira para participar na Xuntanza.

A día de hoxe á Asociación de Amas de Casa de Cedeira pertencen unhas oitenta persoas. A entidade traballa a prol de conservar a tradición das labores feitas a man pero tamén contribúe á dinamización social da vila con cursos e mesmo co recoñecemento anual á “Muller da vila”.