SERVIZOS

A DEPUTACIÓN MELLORA A SEGURIDADE VIARIA NO ACCESO A SAN ANDRÉS DE TEIXIDO

A Deputación da Coruña acaba de licitar por 607.086,65 euros as obras de ampliación e modificación do trazado da estrada provincial DP 2204 ao seu paso polo núcleo de Pontigas, no municipio de Cedeira. Trátase, en palabras do presidente do ente provincial, Valentín González Formoso, «dun dos proxectos máis ambiciosos que está a desenvolver actualmente a Deputación», pois se trata da mellora dun viario «que conduce a un dos principais destinos turísticos da provincia da Coruña, Santo André de Teixido».

O proxecto supón un investimento de 731.188,53 euros, dos que 607.086,65 destinaranse a sufragar a execución das obras e os restantes 124.101,88 euros ás expropiacións necesarias para a realización dos traballos, que requiren a ocupación de 16.000 metros cadrados de terras de monte, prado e labradío.

As empresas interesadas en participar na licitación poden presentar as súas ofertas ata o 12 de novembro e prevese que os traballos poden estar en execución no primeiro trimestre do 2019.

González Formoso destacou que «a construción da variante permitirá evitar o tráfico no núcleo de Pontigas, nunha zona de curvas que discorre moi próxima ás vivendas» e apuntou que as obras «pemitirán mellorar a seguridade vial ancheando a estrada ata os oito metros e dotándoa de beiravías e dunha mellor visibilidade».

A modificación do trazado do viario, que rexistra un importante volume de tráfico debido á circulación de autobuses en dirección a San Andrés e os miradoiros dos cantiis da zona, realizarase coa construción dunha nova variante cunha lonxitude aproximada de 1,2 quilómetros e o acondicionamento dun viario de ligazón de 330 metros que permitirá rodear o núcleo de Pontigas, onde as vivendas están moi preto da vía.

Fonte: La Voz de Galicia

Pode consultar a nova na seguinte ligazón:

IR Á LIGAZÓN A Deputación mellora a seguridade viaria no acceso a San Andrés de Teixido

A ACTUACIÓN DE MELLORA DA ESTRADA DE CEDEIRA A VALDOVIÑO CONTEMPLA A IMPLANTACIÓN DE CARRÍS DE ADIANTAMENTO E MELLORAS NO TRAZADO

Os alcaldes de Cedeira e Valdoviño, Pablo Moreda e Alberto González, xunto á primeira tenente de alcalde da vila, María Xosé Rodríguez, desprazáronse a Santiago para coñecer as intervencións de mellora deseñadas pola Xunta

As xestións de Cedeira e Valdoviño ante a Xunta traduciranse a curto prazo en actuacións concretas en zonas quenon requiren avaliación ambiental

Os obxectivos: mellorar a mobilidade, reforzar a seguridade vial e acurtar os tempos de percorrido facilitando a súa conexión co resto de Galicia

Valdoviño, 16 de outubro de 2018. Lograr unha mellor mobilidade, á par que se reforza a seguridade vial, e reducir os tempos de percorrido entre os municipios de Cedeira e de Valdoviño, facilitando así a súa conexión coas principais cidades galegas, é un obxectivo prioritario para ambos concellos e, nos últimos tres anos, un traballo conxunto no que hoxe se deu un paso adiante. Os alcaldes de Cedeira, Pablo Moreda, e Valdoviño, Alberto González, xunto á primeira tenente de alcalde da vila, María Xosé Rodríguez, desprazábanse ata Santiago de Compostela para manter unha xuntanza de traballo co Xefe de Planificación e Programación da Consellería de Medio Ambiente, Carlos Lefler, e a súa homóloga de Proxectos, María Jesús Tejada. A eles incorporábase tamén o Director Xeral da Axencia Galega de Infraestruturas, Francisco Menéndez. No encontro, dábase a coñecer a proposta de mellora na AC566, estrada de titularidade autonómica máis coñecida como estrada de Cedeira a Valdoviño.

Nese documento, recóllense toda unha serie de actuacións a executar a curtomedio prazo, xa que non requiren de estudos de avaliación ambiental previos que, sen dúbida, aplazarían as solucións durante anos. Medidas máis ambiciosas ás que non renuncian ambos concellos, pero ás que non queren esperar sen adoptar actuacións previas que permitan mellorar a mobilidade nun curto espazo de tempo. Esas actuacións concretas concentraranse especialmente nos primeiros quilómetros da estrada, e contemplan a implantación de dous carrís de adiantamento de 700 e 1.700 metros. Unha medida que desconxestionará sen NOTA DE PRENSA dúbida o tráfico nun tramo con tránsito habitual de vehículos pesados. Melloras no trazado, especialmente coa corrección de curvas, completan as intervencións propostas.

Ademais, na xuntanza, os responsables municipais trasladaron a necesidade de incorporar algunha outra actuación concreta como habilitar un terceiro carril para facilitar os adiantamentos na zona do Barral, en Esteiro. Así mesmo, tamén se solicitou a actuación na intersección da estrada AC566 co vial provincial de acceso ó CPI Atios, na mesma entrada ó núcleo urbano de Valdoviño.

Esta e outras propostas serán agora estudadas polo departamento autonómico co ánimo de incorporalas ó documento, paso previo para a súa aprobación e inicio do expediente administrativo para sacar a contratación as intervencións. Precisamente, o compromiso adquirido pola Xunta foi ter concluído o proxecto constructivo antes de que remate o ano de modo que a partir de aí pase a información pública. Así, o alcalde de Cedeira e o de Valdoviño solicitarán unha entrevista co presidente da Xunta, Alberto Núñez Feijoo, para impulsar o proxecto.