SERVIZOS

O CONCELLO DE CEDEIRA ADXUDICA POR MÁIS DE 98.000€ A AMPLIACIÓN DA REDE DE SANEAMENTO NAS PONTIGAS

A Xunta de Goberno do Concello de Cedeira aprobou na reunión celebrada o pasado venres a adxudicación da obra de ampliación da rede de saneamento nas Pontigas. O proxecto executarase por un presuposto de 98.364,34€ e servirá para darlle servizo a máis de trinta vivendas dos núcleos das Pontigas e Pardiñeira, ampliando a rede que xa se instalara con anterioridade e que conta cunha nova depuradora ecolóxica e un colector xeral.

A extensión do saneamento instalarase por pistas situadas ao norte e ao sur da estrada DP-2206 terá sete colectores e catro novos pozos de rexistro e enganchará ao antedito colector xeral. A nova rede abranguerá seis ramais que suman máis dun quilómetro e medio de percorrido. Tres deles sitúanse ao norte da estrada provincial DP-2206: un de 420 metros, outro de 50 metros e outro que vai nun tramo principal pola marxe esquerda da citada estrada e que ten outro tramo que vai pola marxe dereita, sumando 350 metros. Os outros tres suman 350 metros por un lado e 285 metros por outro, en ramais que discorren entre A Pardiñeira e As Pontigas, e 50 metros máis doutro que está en Pardiñeira.

O Concello de Cedeira conta con fondos do Plan de Obras e Servizos da Deputación da Coruña para levar adiante este proxecto, co que se avanza no proceso de levar a rede de saneamento ás zonas rurais. O prazo de execución das obras é de catro meses.

O CONCELLO CONTRATA POR MÁIS DE 68.500€ AS OBRAS PARA DOTAR DE REDE SEPARATIVA DE SANEAMENTO Á RÚA REGUEIRO

O Concello de Cedeira adxudicou por 68.544€ as obras de creación da rede separativa de saneamento na rúa Regueiro, que servirán tamén para mellorar a mobilidade peonil porque se vai aproveitar para facer máis ancha a beirarrúa. Desde o goberno local recordan a importancia de ter sistemas separados para recoller as augas pluviais e as fecais e destacan o avance que nesta materia experimentou Cedeira nos últimos anos.

A obra ten un prazo de execución de dous meses. A rúa Regueiro ten uns 120 metros de percorrido e por ela vai o tráfico rodado nunha única dirección, con aparcamento en liña e unha beirarrúa. As obras incluirán a instalación dunha nova rede de pluviais, á que se conectarán os sumideiros e tamén as baixantes das casas, así como a ampliación da zona para o tránsito peonil, que vai pasar a ter 1,40 metros de ancho e vai mellorar sensiblemente as súas condicións de accesibilidade. A rúa manterá invariables o mesmo número de prazas de aparcamento para vehículos.

Contar cunha rede separativa, que xestione por un lado as augas residuais das vivendas e por outra as pluviais, tanto da propia rúa como das baxantes das casas, fai que a rede de saneamento non sufra sobrecargas en momentos de chuvia e que a EDAR funcione mellor.

O CONCELLO ADXUDICOU A RENOVACIÓN DA ILUMINACIÓN PÚBLICA EN TODA A AVENIDA AREA E PARTE DE CASTELAO

O Concello de Cedeira vén de adxudicar a obra de renovación do alumeado público nas avenidas Area e Castelao por un importe de 84.095€ (IVE incluído). O proxecto ten un prazo de execución dun mes e consiste en cambiar o vello sistema con lámpadas de vapor de socio polo novo, máis eficiente, tipo LED. En total van renovarse 35 luminarias, dúas delas na avenida Castelao e o resto na Area. O alcalde, Pablo Diego Moreda Gil, subliñou o esforzo realizado nos últimos anos na eficiencia da rede de iluminación, co que “actualmente Cedeira ten o 99,99% do seu alumeado público con tecnoloxía LED”.

Segundo destaca o alcalde, Pablo Diego Moreda, “ter mellor iluminada este vial, no que hai moito comercio e actividade, vai redundar en que teña máis afluencia, en maior seguridade para o tráfico e para os peóns, ademais de reducir o consumo eléctrico”. O contrato inclue a colocación dos novos farois sobre columnas de oito metros de alto, as canalizacións subterráneas, a posta a terra e as arquetas de paso, así como a retirada das luminarias actuais. É unha obra que o Concello de Cedeira afronta con financiación da segunda fase do POS+Adicional 2022. As novas bombillas LED garanten un fluxo de luz acaído para as necesidades de cada zona, beirarrúa ou calzada ao tempo que permiten un grande aforro económico. Precisan menos da metade da potencia eléctrica que as lámpadas tradicionais, de vapor de sodio, para producir a mesma iluminación.

Con esta nova actuación, o alcalde reiterou o compromiso do Concello coa mellora da eficiencia enerxética e apuntou que os proxectos que xa se teñen levado a cabo neste eido permitiron que a suba do prezo da electricidade, especialmente durante o pasado ano, non impactase nas contas municipais.

No ano 2020 o Concello procedera a renovar o resto da iluminación da Avenida Castelao, cun investimento de máis de 47.000€ para o cambio de 97 puntos de luz. Agora, este novo proxecto permitirá rematar a modernización desta vía, coa substitución das dúas únicas farolas antigas que quedaban, na rotonda da que parte a avenida da Area. Nesta última vía instalanse os 33 restantes LEDs desta actuación.